Kem Lingón 25
25
Lingón Dabid
1Ó Dwata, ebéléem yóm gónów mni.
2Tey ksaligu kóm, Dwata.
Béem abay henyak ou, duhen ke hefligalem yó kem hohonu bè yóm là kegmou.
3Laen kô dù gónón myak kun yóm tau smalig béléem,
okóm yó myak yó kem tau snukaten kem dumun tau.
4Hol hegfanem dou, Dwata, yóm lan hloloem dou.
Tolokem dou yóm kóm lan.
5Hol nalakem ou lemwót bè yóm ktahuhen lemwót béléem,
ne hol tolokem ou, abay se uu yóm Dwata deng gel lemwà dou.
Tódô knoyungu kdaw tendo smalig béléem.
6Hol hentulónem nawa, Dwata, yóm kbong nawam tau ne yóm kkodum tau,
yóm tehe kehegfanem du bè gnan kdaw ekni.
7Hol hnifótem dou yó kem salà tehe nmou bè yóm klomihu tau.
Lemwót bè yóm là konolen yóm kbong nawam, hol hentulón nawam ou, Dwata,
abay se uu yóm Dwata alì hulung kmodu.
8Tey hyu yóm Dwata, ne tey tedeng yó kem gel nmoen.
Gel toloken yó kem tau gemsalà yóm lan mò lolò le.
9Toloken yó kem tau hulung heglaan yóm tedeng,
ne toloken kul yóm kun lan.
10Yó nmò Dwata, bè yó kem tau là mulé du yóm deng tehe senfasad le,
nalaken lu hlanen bè yóm là konol yóm kbong nawahen kul ne hlanen bè yóm kteneben bélê le.
11Ó Dwata, hol hnifótem dou yóm kdê salau mò gónón megdóyón boluyem.
12Yóm tau wen klikoen ke Dwata, hegfan Dwata béléen yóm lan mò loloen.
13Angat mdengen klowil le, ne angat gfun kem ngà le yóm tonok le.
14Yóm keswè ke Dwata, són yó kem tau wen klikò le du.
Lu se gónón hetngón du yóm deng tehe senfasad le yó kem tehe fù le ekni.
15Són ebè Dwata gónów temngel mò tmóbóng dou,
tek són sem du gembek lemwà dou lem holot yó kem hohonu.
16Beklili ebéléu, Dwata, ne hol knoduhem ou,
yakem wen sem dumuhu, lelen tey sidek kegnómu du.
17Hol kóhem dou yóm kdê sbeweg lem hendemu.
Hol lenwaem ou bè yóm kdê gónów glayam.
18Tenngelem, Dwata, yóm ksidek kegnómu du ne yóm tey keglayamu.
Hol hnifótem ou bè kdê yó kem salau.
19Tonem yóm tey kwen yó kem hohonu,
ya tey sidek kutó nawa le dou.
20Nofinem ou, ne lenwaem ou lem hólól le.
Béem nmò gónów myak ke lu gemmò,
yakà uu du gónóhu e mlo.
21Yóm dou kgulit ne dou ktedeng yóm gel mofin dou,
abay se uu yóm nefet nawaw.
22Ó Dwata, hol nsokem yó kem kóm tau Israél lem yó kem gónó le glayam.
Currently Selected:
Kem Lingón 25: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
