Kem Lingón 18
18
Lingón Dabid
1Ó Dwata, tey kbong nawaw kóm.
Uu yóm gel hekgis dou.
2Dwata se dou botu gónó heklung, gónóhu hofin,
ne du se lemwà dou.
Dwata se yóm dou botu gónó e mlo.
Du se gónów heklung, kun kgis hewà dou,
ne du se dou gónó hofin hol mbegel.
3Tmabahe ebè Dwata, yóm knóón sendóyón,
yakà gel lenwaen ou lem hólól yó kem hohonu.
4Yóm hatay, hol lómón ke fét bkes bè lówóhu,
ne hol lómón ke dunuk bong kmifus tahu.
5Lómón ke deng nféten ou hatay.
Lómón ke deng wen holoten suen bè lanu.
6Okóm bè yóm alì ksidek kegnómu du,
tmabahe ebè Dwata, htóbónge béléen.
Tahu se, hnungolen ou bè yóm kun gónó nô.
Gungolen yóm tey kehkoduhu béléen.
7Lemwót bè yóm alì kebut Dwata yó kem hohonu,
tódô leminol, ne megsinsig tonok,
botong kmingò yó kem but bulul lemwót bè yóm alì kebut Dwata.
8Hol lómón ke wen kebel semfut gu lem ilungen,
ne lómón ke wen ofi msut gu lem baken,
mung du bala ofi kemyóngón.
9Hennasen longit, ominen mnaul elaan.
Ya tey kifu mget gónón mdà.
10Wen sotu hógówen alì kemgis snakayen boluyen sirubim.
Móyóng, ne tey kehlóngen mung bè balu lenos.
11Wen tey kifu mget nmoen hmilol du,
hono yóm tey lobun mfól mom hitem, hono él nô du.
12Ya tey keslinangen, tódô sut gu lem yó kem lobun.
Hkulónen bulók kulón, mung du bala ofi.
13Heték Dwata gu bè longit,
mensag yóm Dwata hol dandónen geta.
14Gentien yó kem hohonen, ne gotu le sekla.
Ya tey kehsilaen du, botong le mlóy.
15Lemwót bè kbólówem yó kem hohonem, Dwata, bè yóm tey kehtéem kul,
botong gfan sokol mohin dalang se tud blóngón tonok.
16Sigelen se mogot dou lemwót gu ta,
ne nkayen ou gu lem yóm tey él nelem.
17Lenwaen ou lem hólól yó kem hohonu alì mbegel,
kem hohonu alì kmutó nawa dou, lel le tey kemgis sentahu.
18Bè yóm kdaw laen dù gmou, kulel se kul kundug dou yó kem hohonu,
okóm Dwata se temgel dou.
19Nwiten ou ebè yóm gónón laen dù hemenu.
Lenwaen ou, abay se maan nawahen béléu.
20Deng tey któbóng Dwata dou lemwót bè ktedeng nmou.
Lemwót bè yóm klaen dù deng sidek nmou gónón hyu kbalaen dou.
21Abay se deng lolou yóm kun lan Dwata,
ne là kô knogolu du ke tô nmou yóm sidek.
22Abay se yó kem hlau Dwata, là kô klifótu kul.
Là kô knogolu du yó kem hloloen kum.
23Laen dù gónóhu mulé du.
Deng senyahu yóm sidek.
24Yó gónóm mon, deng tey któbóng Dwata dou lemwót bè yóm ktedeng nmou,
ne lemwót bè yóm klaen dù sidek tonen béléu.
25Ó Dwata, teyi teneb bè yó kem tau teneb béléem.
Ne teyi hyu bè yó kem tau hyu ktonem kul.
26Bè yóm tau laen dù belenen, bud hegfanem béléen se yóm kóm klaen dù belen.
Okóm bè yó kem tau sidek nmò le, bud sidek se nmoem bélê le.
27Sal gel lenwaem yó kem tau hulung heglaan,
okóm yó kem tau hegeta knô, gel heglaanem lu.
28Ó Dwata yóm Dwata hol gónóhu mogot,
uu se dou layag.
Tendo hlayagem yóm gónón kmifu béléu.
29Lemwót bè yóm kehekgisem dou,
gbeku gemlà yóm tey lumbuk sendalù.
Ne gbeku mkaf balù kihu beng hmilol yó kem syudad.
30Yóm kun klan Dwata, hono tedeng.
Sal dohò ke wen fasaden.
Dwata se klung yó kem tau gel hofin béléen.
31Laen kô dù dumu Dwata, són yóm Dwata hol gónó mogot.
Laen dù dumu botu gónó heklung, són yóm kut Dwata.
32Du se yóm Dwata tendo hekgis dou,
ne tendo mentey dou bè lanu anì laen dù hemenu.
33Tey kehekgisen yó kem tihu lómón kgis ti uhu,
ne yó gónóhu gembek mlan ta yó kem tfusù bulul.
34Toloken ou bè gida anì gbeku bemtul yóm boho nmò le bè tembaga.
35Yóm deng kehewaem dou, lómón ke yó se klungu.
Sigel kwananem semflós hdà dou,
ne yóm któbóngem dou gónóhu alì gboluy.
36Deng hlamangem yóm lan hloloem dou,
yó gónów là tlidus.
37Deng ktesu yó kem hohonu, ne gafitu lu.
Là kóe mulék efet gotu genlau lu.
38Gotu himotu lu, ne là kô le bud gebtik,
gotu le masà laan tihu.
39Deng hekgisem ou bè gida, Dwata.
Lemwót béléem gónó le là gemmò béléu yó kem hohonu.
40Gotu hlóyem yó kem hohonu.
Deng gotu genlau yó kem tau kmutó nawa dou.
41Tey ktaba le anì wen tmóbóng kul,
okóm laen dù tau sut mò lemwà kul.
Tmaba le ebè Dwata, okóm là kô bnalaen kul.
42Deng gotu bnibuu lu lómón kfung mung holis bè lenos.
Lómón ke fól yóm kbotu kul.
43Deng lenwaem ou, Dwata, bè yó kem tau gel tmifù dou.
Ne deng bud nmoem ou mò mogot kem benwu,
ne deng le mogot béléu yó kem tau là deng dou hnikót tngón du.
44Uni le mungol dou, tódô henmung nimón le ou.
Gotu le heglaan béléu yó kem tólóng tau.
45Balù udì ke wen bud klóbô le,
tódô setbol kkel le igò le hewà gu bè yóm gónó le hofin.
46Mowil yóm Dwata. Dóyónu yóm gónóhu heklung alì mbegel.
Hegetahu yóm dou Dwata yóm Dwata gel lemwà dou.
47Du se Dwata fen meles yó kem hohonu.
Heglaanen yó kem tau bè dumu benwu mò hogoten dou,
48ne lenwaen ou lem hólól yó kem hohonu.
Tey kehegetahem dou, Dwata, senta yó kem hohonu.
Deng lenwaen ou lem hólól yó kem tau mahil hmatay tau.
49Lemwót bè nim nmoem ni, Dwata,
yó gónów dmóyón kóm lem blóng yó kem tau bè tólóng benwu,
ne lingónu yóm lingón dmóyón kóm.
50Deng dê dulékem ne hegmò dou, yóm tau hol geta deng nélékem.
Ne tendo hegfanem béléu yóm là konolen yóm kbong nawam dou.
Laen dù tul sónen yóm kbong nawahem dou efet kól bè yó kem lugodu.
Currently Selected:
Kem Lingón 18: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
