Kem Lingón 19
19
Lingón Dabid yóm kegfanen bè longit yóm kegeta Dwata
1Tódô dilô bè kdéen ton bè longit yóm
kegeta Dwata.
Tey mtukul kegfanen yóm deng gendeng Dwata.
2Tódô ket gel kwasen,
lómón ke tendo heglalagen yóm kegeta Dwata.
Ne ket kkifuhen, lómón ke bud sensuliten heglalag du yóm tey kegetahen.
3Okóm bè yóm keheglalagen du, laen kô dù udél gungolem, ne laen se kô dù kem muni.
4Bede tódô lenngeben klamangen benwu yóm gel tulónen.
Laen dù benwu talak tonok ke là tngónen du yóm heglalagen yó.
Wen hol mdengen gónó Dwata hemsù du ditu bè longit yóm kdaw.
5Ket hlafusen hligal msut,
hol lómón kligal yóm logi bè yóm kdawen myehen,
duhen ke yóm kligal yóm tau módód skuya mlóy.
6Yóm kógówen, lenwóten fi dmata kdaw kól desdef.
Laen kô gónón glilung yóm kkinien.
Lingón bè yóm hlau Dwata
7Yóm hlau Dwata, tódô ket du,
sal gel hnomihen kgis tau.
Tey gsalig yóm hlau Dwata.
Benlayen khulung hedem yóm tau là mnagien.
8Yóm hlau Dwata, hol tahu duhen.
Hligal le kul yó kem tau mimón du.
Ne yó kem hlolò Dwata, tey tedeng.
Yó se gónón lemwót yóm khulung hedem.
9Tey hyu ke wen klikò tekuy ke Dwata.
Laen kô dù sónen yóm kehyuhen.
Tey tedeng yóm kukum Dwata.
Laen kô mtukul nfihen.
10Tey kesgalu nawahu du yó kem hlau Dwata.
Bong kesgaluhu kul he senta tahu blówón.
Ke kenu yóm hlau Dwata,
tey mi senta tneb.
11Yó kem hlau yó mò eles gel hetgama dou.
Tey ofolu bè yóm gel kimónu du.
12Laen kô dù tau ke dilóen yóm kun gónó là tedeng.
Yó gónóm mon, tnóbóngem ou, Dwata, anì là gwiten dou yóm là tedengen bè yóm là dilóu du.
13Hol hensengem ebéléu yó kem salà alì nóyô nmò tau.
Hol béem abay bayà ou bè yóm óyóu mò du.
Ke tnóbóngem ou, yó se gónóhu gulit,
ne là bud gféten dou ne yóm óyóu mò sidek.
14Hol tnóbóngem ou, Dwata,
bè yóm kmò kudélu ne bè yóm kmò kehedemu
anì hyu nawahem du.
Són uu se yóm gónóhu e mlo,
ne són uu yóm deng msok dou.
Currently Selected:
Kem Lingón 19: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
