Kem Lingón 17
17
Kni Dabid bè Dwata
1Ó Dwata, hnungolem yóm
knihu béléem anì uu kmukum dou.
Hnungolem yóm kehtóbóngu béléem.
Henklinguhem dou yóm hnihu, abay se hono tahu.
2Bè yóm kkukumem dou, hegfanem yóm klaen dù salau,
yakà uu du temngón du yó kem tau mò du yóm tedeng.
3Bè yóm kifu deng kauyem dou sóól buteng,
deng hensokolem yóm nô lem hendemu
dalang se yóm nô lem but blututu,
ne laen kô dù sidek tonem béléu
Deng hol nô bè nawahu yóm là kegsalau ke mlan bè kudélu.
4Deng lolou yó kem kóm hlau kum,
yó gónóhu là lemolò du yóm kul klan
yó kem tau mahil hemsidek kem dumu le.
5Tendo lolou yóm kóm lan.
Là kóe tlokob bè yóm klolou kóm.
6Yó gónów mni béléem, Dwata, abay se tngónu yóm kbalaem dou.
Hol henklinguhem ou, hnungolem yóm knihu.
7Hol hegfanem béléu yóm là konol yóm kbong nawam dou.
Mlan bè kgisem yóm kehewaem yó kem tau mlo ebéléem bè yóm klóy le gu bè yó kem hohon le.
8Hol kenlungem ou lómón keklungem yóm kóm mata.
Bnosem ou bè olung yó kem hafakem.
9Nofinem ou bè yó kem tau gel mò sidek gel mundug dou,
yó kem hohonu slibut dou móyô hmatay dou.
10Laen kô dù keskodu bélê le.
Hnungolem dé yóm tey udél le heklabak.
11Yó nmò le ktes le ou, ne ni deng snibut le ou,
mebel le lan anì bot le ou te tonok.
12Hol lómón ke liyun le alì sidek kbitil le, nódód nsék le ou,
ne lómón kem ngà liyun hebnos, mangat le mò kenfô le.
13Hekmóni kut, Dwata.
Senfatayem lu dou yó kem hohonu anì gotu le meglà.
Nwitem sudengem, hewaem ou lem hólól yó kem tau gel mò sidek yó.
14Hol lenwaem ou, Dwata, mlan bè yóm alì kegbek sigelem.
Lenwaem ou bè yó kem tau són hendeen le ke wen gel guta le yóm igò le mowil.
Hol tnafakem lu, Dwata.
Ne yóm ktafakem kul yó, yake hol gefet bè yó kem ngà le efet bud kól bè yó kem lugod le.
15Lemwót bè kmou du yóm tedeng, yó gónów angat mton kóm.
Soke bud mowil gsengel nawaw, abay se deng te tódô suyó.
Currently Selected:
Kem Lingón 17: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
