Kem Lingón 143
143
Lingón Dabid
1Ó Dwata, hol hnungolem yóm
knihu béléem, hnungolem yóm kehkoduhu béléem.
Hol bnalaem o, abay se là kóen monol nawahem ebéléu,
ne tey tedeng yóm kóm kmò.
2Hol béem tagad knukum ou yóm tau tóbóng lówóhem,
abay se laen kô dù tau mowil talak tonok ke tedeng ktonem du.
3Deng ktesen o hohonu.
Deng tódô hlasaen o bè tonok.
Deng tódô lohen ou elem gónón kmifu,
hol lómón kmou yóm tau matay deng lebeng.
4Laen dù bud lanu ne.
Alì sidek klikou, laen dù gmou.
5Gtulón nawahu yóm kdaw gnan ekni.
Sónmou hemdem du yó kem tehe gel nmoem,
Ne bud hendemu snéen yó kem tey gendengem.
6Hdau eta sigelu bè yóm knihu ebéléem.
Tey sidek khahuu kóm,
mkéle bè yóm tonok mékéng hendeenen héfê bè kulón.
7Géhél bnalaem ou, Dwata,
abay se laen dù bud lanu ne.
Béem knogol o, kô mataye.
8Hol hfungolem do hlafus yóm là konolen yóm kbong nawam do,
yakà són uu genléd nawaw.
Tolokem do yóm nóyô hlanem do,
yakà són uu du gónóhu mni.
9Lenwaem o, Dwata, bè yó kem hohonu.
Mlóye ebéléem anì bnosem o.
10Tolokem o mò du yóm kóm kóyô,
yakà uu du yóm do Dwata.
Yó hem Tulusem he fen malak do anì laen dù gfau.
11Lenwaem ou, Dwata, mò gónón megdóyón boluyem.
Bè yóm tey ktedengem, yó gónóhu gewà bè nim gónóhu glayam.
12Lemwót bè yóm là konol yóm kbong nawam do,
sulék hnatayem kdê yó kem hohonu,
yakà ou du yóm tau tóbóng lówóhem.
Currently Selected:
Kem Lingón 143: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
