Kem Lingón 144
144
Lingón Dabid
1Tey kdóyónu ke Dwata,
lómón ke du yóm botu bong gónów gel heklung.
Toloken o mit sgida,
ne wen kenhulung mit sfatay blayen do.
2Du se yóm Dwata kembong nawa do ne gónów gel hofin.
Bud du se yóm mbegel, mò do gónó e hles,
ne du se gel lemwà do.
Eles mdà bè soluhu mò klungu, ne ebéléen gónóhu e mlo.
Hogoten dou yó kem dumu benwu.
3Ó Dwata, olo me tau matay se kum, ewenem sana ketngónem kum.
Olo me tau tonok, ewenem sana kehedemem kum.
4Là kóen té klowil me, hol lómón ke olo nawa,
duhen ke olo olung kendel lana.
5Hennasem longit, Dwata, ne mnauli elaan,
tendólem yó kem bulul anì semfut kebel le.
6Hol heksilaem anì gotu le sekla yó kem hohonem.
Gentiem lu anì gotu le sekla mlóy.
7Hloyolem elaan sigelem ne lenwaem o.
Lenwaem o gu lem yóm él nelem,
gu lem hólól yó kem tólóng tau.
8Hono kéng btang bè sumóng le.
Igò le se smafà anì tulón le yóm ktahuhen, okóm kéng le.
9Wen lomi lingón nmou béléem, Dwata,
lingónu yóm kdóyónu kóm,
hmungu bè yóm gel kenbitu sfolò féten.
10Abay se gbekem hegmò yó kem tau hol geta.
Uu se yóm deng lemwà ke Dabid yóm tau tóbóng lówóhem.
11Hol kenlungem o bè bak suk.
Lenwaem o lem hólól yó kem hohonu.
Hono kéng btang bè sumung le.
Igò le se smafà ani tulón le yóm ktahuhen, okóm kéng le.
12Yó kem ngà me logi lomi lemnok,
hol tilob kenok le he lómón yóm hulu tilob kebud le du.
Yó kem ngà me libun lomi lemnok,
hol le knóón libun he lómón yóm hehek knóón bè gónô bong.
13Kólen bè yó kem tebungus me, hol le hnok he.
Dalang se yó kem ubiha me bè yóm gónó le mótób,
hol le mból he nsóhem bè libuhen,
baluen ke nsóhem bè sfolò libuhen.
14Ne yó kem safì me demyol klitun, hol tódô hungu he lulón le.
Laen dù hohon he ke gembek husek elem benwu me,
ne laen se dù tau negef bélê me,
ne laen se dù gungolem lemangat bè kem lan me.
15Tey kehligal le yó kem tau ke lómón ni klowil le.
Tey kehligal le kul yó kem tau ke yóm Dwata hol gónó mogot yóm kul Dwata.
Currently Selected:
Kem Lingón 144: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
