Kem Lingón 118
118
1Hol tekuy gel bemlay slamat bè
Dwata abay se tey hyu yóm kmoen.
Laen kô dù sónen yóm kbong nawahen tekuy.
2Yu kem tau Israél, hol gel mon ye dé,
“Yóm kbong nawa Dwata, laen kô dù tul sónen.”
3Yu kem tau gel demsù ebè Dwata, hol gel mon ye se kuy,
“Yóm kbong nawa Dwata, laen kô dù tul sónen.”
4Kdê yó kem gel tmaba ebéléen, hol mon ye se kuy,
“Yóm kbong nawa Dwata, laen kô dù tul sónen.”
5Bè yóm alì sidek kegnómu du, tmabahe ebè Dwata.
Tahu se, bnalaen o, ne lenwaen ou.
6Tendo nô béléu Dwata, laen kô dù bang knikou.
Laen kô dù gmò le béléu yó kem tau.
7Dwata yóm tendo tmóbóng dou.
Deng eles tngónu, angate gemmò bè yó kem hohonu.
8Bong hyu he yóm smalig bè Dwata
senta yóm smalig bè tau.
9Bong hyu he yóm smalig bè Dwata
senta yóm smalig bè yó kem tau mogot benwu.
10Tey wen kem hohonu tehe hmilol do,
okóm gotu genlau lu mlan bè kfasang Dwata.
11Tódô gotu snibut le ou,
okóm gotu genlau lu mlan bè kfasang Dwata.
12Yó kem hohonu yó, lómón tô le yê nuhag,
deng le gotu lememek hilolu.
Okóm lómón tô le loob mékéng ke mton ofi, là kóen legen.
Gotu genlau lu mlan bè kfasang Dwata.
13Tey tehe kuluk le do yó kem hohonu.
Tek udì duen gónóhu tô là gemmò bélê le, okóm Dwata tmóbóng do.
14Wen tey kfasang blayen do,
ne hekgisen ou, ne deng lenwaen ou.
15Hol hnungol ye dé yóm tey hensag le bè kamfù le yó kem tau Dwata.
Hnigal le yém deng kegmò le. Yó mon le,
“Tódô lemwót bè yóm tey kfasang Dwata
yó gónó tekuy gemmò.
16Mlan bè yóm tey kfasang Dwata,
yó gónó tekuy gemmò bè yó kem hohon tekuy.
Tey kfasangen yóm Dwata bè gida.”
17Là kô na le e ghatay do yó kem hohonu,
tódô sana klowilu,
ne angat tulónu yóm deng nmò Dwata béléu.
18Tey deng ktafaken dou Dwata,
okóm là kô lensónen du klowilu.
19Hennas ye dou dé yó kem bak tikeb yóm Gónô Dwata,
yóm bak tikeb gónó le gel mlan yó kem tau tedeng kmò le.
Angate husek elemen naw e slamat bè Dwata.
20Ni se yóm bak tikeb yóm Gónô Dwata.
Són olo husek elemen, són yó kem tau mimón ke Dwata.
21Tey kdóyónu kóm, Dwata, abay se deng hnungolem ou,
ne deng hegmoem ou bè kem hohonu.
22Yóm botu tehe senkbê yó kem tau hdà gónô,
ofo kul ke botu laen dù muhen,
anì monem, hol botu bong muhen bè kdéen mò hembegel yóm gónô hdà le.
23Yó se yóm deng nmò Dwata,
ne tey hentaw tekuy yóm kmoen du.
24Deng ni se yóm kdaw kegmò Dwata bè kem hohon me.
Hol tekuy hligal bè yóm deng nmoen.
25Hol lenwaem mi, Dwata,
hol lenwaem mi lem tdok yó kem hohon me.
Hol tnóbóngem mi anì wen gendeng me.
26Dwata he hol kmudung du yóm tau sut bè ni mit yóm kun boluy Dwata.
Lemwót lem nim kun Gónô Dwata, mni me béléem tóbóng bè Dwata.
27Dwata se yóm gónó tekuy mogot.
Tey hyu yóm deng nmoen bélê tekuy.
Nbut tekuy yóm kehligal nmò kuy béléen.
Mógów ye lemibut yóm gónó ye gel demsù ebè Dwata,
kmulóng ye kem ngà hanga koyu.
28Uu se yóm dou Dwata, tey keslamatu béléem.
Tendo heglalagu yóm tey kegetahem.
29Hol tekuy bemlay slamat bè Dwata, yóm gónó tekuy mogot,
abay se tey kehyu yóm kmoen.
Laen kô dù sónen yóm kbong nawan tekuy.
Currently Selected:
Kem Lingón 118: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
