Kem Lingón 119
119
1Hligal le kul yó kem tau laen dù
belen le, yó kem tau lemolò du yóm hlau Dwata.
2Hligal le kul yó kem tau mimón du yó kem hlolò Dwata kul,
ne hol lemwót lem but blutut le yóm kebel le ke Dwata.
3Laen dù sidek nmò le.
Són lolò le yóm kun klan Dwata.
4Deng wen hmoem kum, Dwata,
duhen yóm hol kimón me yó kem hlauhem kum.
5Hyu nawahu ke hol gfan bè kdê nmou yó kem deng hloloem kum.
6Ke gotu nimónu yóm kdê hlauhem kum,
laen kô dù gónów myak.
7Ke deng dnalangu yó kem hlauhem hono tedeng,
yó gónón hol tahu duhen yóm kdóyónu kóm, laen kô dù belenen.
8Gotu nimónu yó kem hloloem kum.
Hol béem abay bayà ou.
9Tedu nmoen du yóm logi lomi lemnok
anì laen dù belenen yóm gel kmoen?
Yó nmoen, nimónen yó kem hlauhem, Dwata.
10Béléu do, tódô hotuhu nawahu mò du yóm hmoem do.
Hol tnóbóngem ou anì là guléhu du yó kem hlauhem.
11Eles tendo hendemu yó kem hlauhem
anì là gemsalae béléem.
12Dóyónu uu, Dwata
yóm hol gónóhu mogot.
Hol tolokem dou yóm kóm lan.
13Angat tendo gel sensulit monu yó kem deng hlauhem kum.
14Tey kehligalu lemolò du yó kem hlauhem
senta yóm kwen kendengenu.
15Hennagiu yó kem gel hloloem kum,
ne tey kehedemu du yó kem tolokem.
16Tey kehyu nawahu du yó kem hlauhem,
ne là kô klifótu du yóm udélem.
17Ó Dwata, hol nmoem yóm hyu béléu,
yóm tau tóbóng lówóhem,
anì mowile, ne nimónu yóm udélem.
18Htonem do yóm ktahuhen alì tennga lem yóm hlauhem.
19Olohu tau milo ta nim tonok ni,
wen tey muhu du yó kem hlauhem mò malak do,
hol béem bnos béléu.
20Senflósen hol nô bè nawahu
yóm óyóu temngón du yó kem hlauhem.
21Hol nudélem yó kem tau heklabak, yó kem tau deng megtafak,
yó kem tau là mimòn du yó kem hlauhem.
22Hol béem abay lus lu ke henskong le o ne ke henwog le o,
yakà deng gel nimónu du yó kem hloloem kum.
23Baluen ke stifun yó kem ngà tau hol geta ne mudél le sidek etahu,
okóm do, tendo hendemu yó kem hlauhem.
24Hligale du yó kem hloloem do,
tey tilob yóm kehlau le do.
25Lemwót bè yóm ksidek kegnómu du, tódóe masà lem kfung.
Bud hlowilem ou hlanen bè udélem.
26Deng tulónu kóm yó kem atulu, ne deng bnalaem se ou.
Ne ni hol tolokem do yó kem hloloem do.
27Tnóbóngem o anì hol tngónu lanen yó kem hlauhem,
senflósu hemdem du yó kem hentaw ton gel nmoem.
28Tey sidek kebà nawahu,
hol ten-gelem o mlan bè udélem.
29Hol hlayukem o bè yóm lan là tedengen.
Ne lemwót bè yóm tey kehyuhem, tolokem do yó kem hlauhem.
30Deng eles néléku yóm kimónu kóm.
Hol kóyóu ke lolou yó kem hlauhem.
31Ó Dwata, tey ksaligu du yó kem hloloem kum.
Hol béem bayà ou anì là wen gónóhu myak.
32Ke tnóbóngem ou,
hotuhu gelu lemolò du yó kem hlauhem,
33Hol tolokem do, Dwata,
anì lolou kdê yó kem hlauhem.
34Benlayem ou khulung temnef anì nimónu yóm hlauhem,
ne hewótu lem but blututu yóm kimónu du.
35Hloloem do yóm lan lemwót bè yó kem hlauhem,
yakà bè yó du gónów hligal.
36Benlayem ou óyô mimón du yó kem hlauhem
anì là kendengenu du yóm hnebelu.
37Kóhem bè ketngelu yó kem laen dù muhen,
ne hlowilem o mlan bè udélem.
38Dnohoem yóm tehe fasadem do, yóm tau tóbóng lówóhem,
yóm fasad nmoem bè yó kem tau wen klikò le kóm.
39Tnóbóngem ou anì kóhu yóm nmò gónóhu myak,
yakà teyen hyu béléu yó kem hlauhem.
40Tey kóyóu mimón du yó kem hlauhem.
Hnomihem klowilu lemwót bè yóm tey kehyuhem.
41Ó Dwata, hegfanem béléu yóm tey kbong nawam do là monolen,
duhen yóm kegewà deng tehe fasadem do.
42Ominu yó wen gónóhu malà kul yó kem tau hemwog do,
abay se snaligu yóm udélem.
43Hol benlayem o khulung mudél du yóm ktahuhem,
yakà bè kem hlauhem du gónón wen nefet nawahu.
44Laen dù tul sónen yóm tendo kimónu du yó kem hlauhem.
45Laen dù bud gónów gfét,
abay se hotuhu nawahu mimón du yó kem hlauhem.
46Là kóe myak tmulón du bè yó kem tau hol geta yó kem hlauhem.
47Tey kehligalu mimón du yó kem hlauhem,
abay se bong nawahu kul.
48Tey nadatu yó kem hlauhem, lelu kembong nawa kul.
Ne sónmou hemdem du yó kem hloloem kum.
49Hol hentulónem nawa yóm tehe fasadem do,
yakà tek són yó du yóm nefet nawahu.
50Yóm fasadem do yó, yó yóm hmomi klowilu,
ne mifa do bè kdê yó kem gónóhu glayam.
51Tey kehwog le do yó kem tau heklabak,
okóm là kô naw e knogol du yó kem hlauhem.
52Ke gel hendemu, Dwata, yó kem tehe hlauhem ekni,
yó se hemyu nawahu.
53Ke gel tonu yóm kekbê le du yó kem hlauhem yó kem tau mò sidek,
tey sidek kebutu kul.
54Yó kem hlauhem mò utóm lingónu
bè yóm klawihu milo lem nim benwu ni.
55Ke sok kifu, Dwata, gel hendemu uu,
ne yó gónów mimón du yó kem hlauhem.
56Lemwót bè kimónu du yó kem hlauhem gónóhu hligal.
57Ó Dwata, tek són uu yóm dou Dwata.
Fasadu kóm yóm kimónu yó kem udélém.
58Hotuhu nawahu mebel kóm.
Knoduhem ou lómón yóm deng fasadem.
59Ke henklolu yóm dou kmò,
fasadu kóm yóm klolou yó kem hloloem do.
60Là kóe tlek hanggà,
tódô kendel nimónu yó kem hlauhem.
61Tô hebtang le o bè salà yó kem tau gel mò sidek,
okóm là kô klifótu du yó kem hlauhem.
62Ke deng sóól buteng, btike, dóyónu uu,
abay se hono tedeng yó kem hlauhem.
63Hol weu yó kem tau wen klikò le kóm,
yó kem tau mimón du yó kem hlauhem.
64Bè klamangen benwu, Dwata, gfan yóm kbong nawa là monolen.
Hol tolokem do yó kem hlauhem.
65Deng tey dê ne yó kem hyu deng nmoem béléu, Dwata,
lómón yóm deng fasadem.
66Deng hentahuhu yó kem hlauhem.
Ne ni, benlayem o khulung temnef ne ketngón.
67Gu laanem là deng semtódô do, denge tlas,
okóm ni, hol nimónu yóm kóm udél.
68Tey hyu kmoem yóm uu,
ne kdê yó kem nmoem, sal hyu.
Hol tolokem do yó kem hlauhem.
69Gel tnifù le o kéng yó kem tau heklabak,
okóm do, hol lemwót lem but blututu yóm kimónu du yó kem hlauhem.
70Yó kem tau heklabak yó koni, là hulung le temnef,
okóm do, hligale du yóm hlauhem.
71Tey hyu béléu yóm kehlayamem do
anì dnalangu yó kem hlauhem.
72Tey mebtes béléu yó kem hlauhem
senta bè yó kem hilu katihen tahu blówón ne blówón bukay.
73Uu se tehe mò do, Dwata.
Ne ni benlayem o khulung temnef anì lolou yó kem hlauhem.
74Ke ton le o yó kem tau wen klikò le kóm, hyu ke wen kligal le,
abay se deng nefet nawahu yóm udélém.
75Tngónu, Dwata, tedeng yóm kkukumem.
Yó gónóm semtódô do abay se wen muhen béléu.
76Yó hem kbong nawam là monolen hol hemyu nawahu
mlan bè yóm deng fasadem do, yóm tau tóbóng lówóhem.
77Hol knodum o anì mowile,
yakà bè hlauhem du gónów hligal.
78Yó kem tau tmifù do kéng, yake hol henyakem lu.
Okóm do, tendo hendemu yó kem hlauhem.
79Hyu ke hol le mógów ebéléu yó kem tau wen klikò le kóm,
yó kem tau temngón du yó kem hlauhem.
80Hyu ke laen dù belenen bè yóm kimónu yó kem hlauhem
anì laen dù gónów myak.
81Botong laen dù bud kgisu mangat du yóm kehewaem do,
okóm ken-gel nawahu yóm udélem.
82Denge bned mangat du ne kdohoen yó kem deng fasadem do.
Kilón de kehyuhem nawahu?
83Laen dù bud muhu ne, hol lómón ke mkéle
bè yóm sning kulit deng sidek.
Balù lómón ni kmou, là kô klifótu du yó kem hlauhem.
84Kegenen de dù kangatu?
Kilón de ktafakem kul yó kem tau hemsidek do?
85Yó kem tau heklabak yó, kem tau deng kembê du yó kem hlauhem,
deng wen sol ngelem nokol le mò gónó le hebtang do.
86Kdê yó kem hlauhem, hono gsalig.
Hol nofinem o bè yó kem tau tô hemsidek do là duón.
87Udì duen gónó le là hmatay do,
okóm là kô knogolu du yó kem hlauhem.
88Lemwót bè yóm kbong nawam là monolen,
hol lenwaem klowilu anì henlósu mimón du yó kem hloloem kum.
89Yóm kóm udél, Dwata,
laen kô dù tul sónen yóm tey kbegelen dyó bè longit.
90Yóm ktenebem bélê me gefet bè kdê bud lugod tau,
yóm kbegelen lómón yóm tonok deng dlimunem.
91Efet ni kmoen ni, sana yó ne kegseb yó kem hlauhem,
yakà tódô kdê le mò du yóm kóm kóyô.
92Ke là gel hefligalen do yó kem hlauhem,
denge matay ne bè yóm alì keglayamu.
93Là kô klifótu du yó kem hlauhem,
abay se mlan bélê le gónóm hlowil dou.
94Hol lenwaem ou, yakà uu du mfun dou.
Deng hotuhu gelu mimón du yó kem hlauhem.
95Tô hnékét le o bè lan yó kem tau gel mò sidek,
okóm tendo hendemu yó kem hlauhem.
96Yóm kdê tonu, sal gel wen gónó le là ket,
okóm yó kem hlauhem, tódô ket du kdéen.
97Tey kbong nawaw du yó kem hlauhem, Dwata,
seflósu kdaw tendo hemdem kul.
98Benlay le ou khulung hedem senta yóm kul khulung hedem yó kem hohonu,
yakà senflós le tendo malak do.
99Bong he do khulung temnef senta yóm kul khulung temnef yó kem tau tmolok do,
abay se do tendo eles nulón nawaw yó kem hloloem do.
100Wen khulungu hedem senta yóm kul khulung hedem yó kem tuha,
abay se tendo nimónu yó kem hlauhem.
101Elese gel temgama anì là lolou du yóm lan mit do elem sidek,
abay se móyóe mimón du yó kem udélem.
102Là kô deng snonolu kul yó kem hloloem do,
abay se hol uu, Dwata, yóm gel tmolok dou.
103Kehlingónu du yóm gel hloloem kum,
tey mi senta tneb.
104Lemwót bè yó kem hlauhem yóm khulungu hedem.
Yó gónóm mon, tey kenbéu yóm nmò sidek.
105Yóm kóm udél, Dwata, lómón ke solok tendo gónóhu galak,
ne lómón ke layag mò hlayag lanu.
106Tey mget yóm tehe fasadu kóm,
duhen yóm kimónu yó kem tedeng gel hloloem kum.
107Tey sidek kegnómu du, Dwata, yó kem gónóhu glayam.
Hol hlowilem ou lómón yóm deng fasadem dou.
108Hnungolem yóm keslamatu béléem, Dwata,
ne hol tolokem do yó kem hlauhem.
109Balù yóm deng klonihen béléu hatay,
okóm là kô naw e klifót kul yó kem hlauhem.
110Yó kem tau gel mò sidek, wen tô holot le dou,
okóm là kô naw e knogol kul yó kem hlauhem.
111Yó kem hlauhem, Dwata, yó se yóm dou nfun,
ne laen kô dù sónen yóm kfunu du.
Yó se gónón lemwót kligalu.
112Deng eles hendemu ne yóm kimónu du yó kem hlauhem
efet kól bè kukol towoku.
113Tey keklitu kul yó kem tau megewu nawa le kóm,
okóm dou, tey bong óyóu mimón du yó kem hlauhem.
114Uu se yóm dou gónó e hles ne dou gónó heklung.
Són udélem yóm tendo gónón mefet nawahu.
115Yu kem tau gel mò sidek, hlayuk ye béléu,
yakà són hlau yóm do Dwata yóm dou lolò.
116Ten-gelem ou, Dwata, lemwót bè yóm deng fasadem do, anì mowile.
Blayem do yóm nefet nawahu anì laen dù gónóhu myak.
117Ntudem ou, ne angate gewà
ne tódô hlós gel nimónu yó kem hloloem kum.
118Okóm deng hol kenbéem yóm kdéen tau mulé du yó kem hloloem.
Bè yóm là kimón le, olo le hegsukat knô le.
119Yóm kdéen tau gel mò sidek talak tonok,
lómón ktonem kul, lómón desenfól gel kóhem.
Yó gónón bong óyóu lemolò du yó kem hloloem kum.
120Botong setbol kkelu lemwót bè klikou kóm,
knikou yóm angat kkukumem do.
121Deng nmou yóm tedeng ne yóm hyu,
hol béem bayà ou bè yó kem tau gel hmohon dou.
122Hol fasadem do yóm któbóngem do, yóm tau tóbóng lówóhem.
Béem bayà o ke hen-gnok le ou yó kem tau heklabak.
123Hfuhu imaku mangat du yóm kehewaem do,
anì tonu yóm kdohoen yóm deng fasadem do.
124Ou yóm tóbóng lówóhem.
Nmoem béléu yóm kóyóem hlanem bè yóm kbong nawahem do là monolen,
ne hol tolokem do yó kem hloloem do.
125Benlayem ou khulung milô, yóm tau tóbóng lówóhem,
anì getnefu yó kem hloloem.
126Ni se yóm kdaw ktafakem kul, Dwata,
abay se deng gotu nulé le yó kem hlauhem yó kem tau gel mò sidek.
127Tahu se, tey kbong nawahu du yó kem hlauhem
senta kbong nawahu yóm tahu blówón, balù yóm blówón hol tahu duhen.
128Lemwót bè yóm ktedeng yóm ket hlauhem,
yó gónóhu meklit du yó kem sidek nmò tau.
129Tey hyu yó kem gel tolokem kum, Dwata,
tódô hotuhu nawaw mimón du.
130Bè yóm ktolok le udélem, lómón ke layag.
Balù yó kem tau laen dù tngón le, wen gwa le du.
131Tey kesgalu nawahu du yó kem hlauhem.
132Bninguyem ou, Dwata, ne hol knoduhem o,
hol lómón yóm kkoduhem yó kem tau kembong nawa kóm.
133Hol nalakem ou hlanem bè udélem,
anì là gmunge bè yó kem sidek.
134Lenwaem o lem tdok yó kem tau gel hemgnok dou,
anì gbeku mimón du yó kem hlauhem.
135Knudungem ou mlan bè yóm kbong nawahem dou.
Hol tolokem dou yóm kdê hlauhem.
136Ke gel hendemu yó kem tau là mimón du yó kem hlauhem,
tey sidek kkiku.
137Ó Dwata, tey ktedengem,
ne tey tedeng yó kem hlauhem.
138Yó kem deng hloloem kum, laen kô dù gónón là ket,
hono gsalig.
139Tey sidek kkinì kuluhu bélê le yó kem hohonu,
abay se là kenmón le du yó kem udélem.
140Sal gel dohò yó kem fasadem.
Yó gónóhu kembong nawa kul.
141Balù yóm klaen dù muhu, ne baluen ke kenhisik le o,
okóm là kô klifótu du yó kem hlauhem.
142Yóm ktedengem, Dwata, laen kô dù tul sónen.
Ne hono tahu yó kem hlauhem.
143Tey keglayamu, ne sónmoen tafa nawahu.
Okóm lemwót bè yó kem hlauhem gónón wen kligalu.
144Hono tedeng yó kem hloloem kum.
Hol benlayem o khulung temnef anì mowile.
145Hol lemwót lem but blututu yóm ktabahu ebéléem, Dwata,
hol bnalaem o.
Tendo nimónu yó kem hlauhem.
146Htóbónge béléem, lenwaem o,
anì gbeku mimón du yó kem hloloem kum.
147Gu laanen là deng btù mata kdaw, denge sana htóbóng béléem.
Són ken-gel nawahu yó kem udélem.
148Sulóyu buteng là tungô,
hendemu yó kem deng fasadem do.
149Hol hnungolem o lemwót bè yóm kbong nawam là monolen.
Lemwót bè yóm ktedeng yóm kkukumem, hol hlowilem o.
150Deng le hloni ebéléu ne yó kem tau gel mò sidek tô malu do,
kem tau là mimón du yó kem hlauhem.
151Okóm monihi se kóm, Dwata,
ne hono tahu yó kem hlauhem.
152Deng kem tngónu tehe yu ekni bè yóm tolo kngau
yóm klaen dù nan e són yó kem hlauhem.
153Tenngelem dé nim tey hlayamu ne hol lenwaem o,
abay se là kô naw e klifót kul yó kem hlauhem.
154Nfihem ou, ne nsokem ou.
Hlowilem ou lómón yóm deng fasadem do.
155Yó kem tau gel mò sidek, tey mayuk bélê le yóm kehewaem kul,
abay se là kô kenmón le du yó kem hloloem kum.
156Tey bong kkoduhem tau, Dwata.
Hlowilem o lemwót bè yóm kukum tedeng nwitem.
157Tey dê kem hohonu hemsidek do,
okóm là kô knogolu du yó kem hloloem kum.
158Tey kkutó nawahu kul yó kem tau là hemtahu béléem,
abay se là kô nimón le du yó kem hlauhem.
159Tenngelem dé, Dwata, yóm tey óyóu lemolò yó kem hloloem.
Hlowilem o lemwót bè yóm kbong nawam do là monolen.
160Hono tahu yó kem udélem,
laen kô tul sónen yó kem hlauhem hono tedeng.
161Tey kehsidek le do yó kem tau mogot benwu baluen ke laen dù buten.
Okóm tek sotu gónóhu likò, duhen ke là nimónu du yó kem hlauhem.
162Ke hningónu yóm kehligalu bè yó kem fasadem do,
lómón kehligal yóm tau mton yó kem kimu mebtes tehe bnos le.
163Tey sidek kutó nawahu du yóm tau mò kéng,
okóm tey kbong nawahu du yó kem hlauhem.
164Botong hitu duléku dmóyón kóm ket kdaw,
abay se hono tedeng yóm kdê hlauhem.
165Yó kem tau bong óyô le mimón yó kem hlauhem,
tey wen kenek nawa le,
laen kô dù gembek hetlokob kul.
166Són nangatu yóm kehewaem do, Dwata,
ne deng nimónu yó kem hlauhem.
167Tendo nimónu yó kem hloloem kum,
tey bong óyóu lemolò du.
168Tendo nimónu yó kem hlauhem ne yó kem hloloem kum,
yakà gotu tngónem yóm kdê nmou.
169Ó Dwata, hol hnungolem yóm ktabahu ebéléem,
benlayem o khulung temnef lemwót bè udélem.
170Hol hnungolem do yóm knihu béléem,
lenwaem o mlan bè yóm deng fasadem do.
171Hono udél dmóyón kóm yóm angat btang bè sumóngu,
yakà deng tolokem du do yó kem hloloem kum.
172Lingónu yó kem udélem,
yakà hono tedeng kdê yó kem hlauhem.
173Elesi htifes nam e tnóbóng o,
yakà yó du deng néléku yóm kimónu yó kem hlauhem.
174Hfuhu imaku mangat yóm kehewaem do, Dwata,
ne són hefligal do, són yó kem hlauhem.
175Hlowilem o anì tendo dóyónu u,
ne yó kem hlauhem yóm tendo tmóbóng do.
176Denge tabag lómón ke yóm ubiha lana,
géhél hnebelem ou, yóm tau tóbóng lówóhem,
abay se là kô naw e klifót kul yó kem hlauhem.
Currently Selected:
Kem Lingón 119: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
