Kem Lingón 101
101
Lingón Dabid
1Ó Dwata, sngalu yóm
kbong nawahem tau ne yóm ktedeng kkukumem.
Dóyónu u mlan bè yó kem sngal.
2Hol ten-gamahu yóm klaen dù gónóhu megsanil.
Kilón de któbóngem dou?
Bè yóm dou gónô nô, hol nmou yóm laen dù kéng du.
3Là kóe móyô temngel du kihu yó kem nmò sidek.
Tey keklitu du dou yó kem nmò le là tedengen yó kem tau là hemtahu bè Dwata.
Là kóe móyô mò du dou yó kem gel nmò le yó.
4Kenbéu yó kem atul sidek nô lem hendem tau.
Hnayuku yóm kdéen sidek.
5Là kô tódô bayau du kul yóm gel ktifù le kéng bè kem dumu le sebét
ne yó kem tau heklabak ne kem tau hegeta knô.
6Tendo bnenteyu lu yó kem tau mò du yóm tedeng anì mung le henek menwu béléu.
Són yó kem tau kembê du yóm sidek yóm henmóyóu mò tmóbóng do.
7Là kóe móyô du ke mò le nmò bè gónóu yó kem tau hulung smukat.
Là kóe móyô du ke mdà le bè soluhu yó kem tau mò kéng.
8Tódô ketu kdaw smidok mebel kul yó kem tau mò sidek,
ne lohu lu mayuk gu bè yóm syudad Dwata.
Currently Selected:
Kem Lingón 101: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
