Kem Lingón 102
102
Kehkodu bè Dwata yóm tau alì blat nô tahen
1Ó Dwata, hnungolem dou
yóm hnihu, hnungolem dou yóm knihu tóbóng béléem.
2Béem abay henbnos ou bè yóm kdawu glayam.
Hgongi dou edini, géhél bnalaem ou ke tmabahe.
3Yakà móyónen kmanas lómón kebel yóm dou klowil,
ne yóm lem lówóhu là buden mgel.
4Hol lómó kegnómu du, lómón yóm bnes deng menes,
là kóen bud mnóm nawahu mken.
5Lemwót bè yóm alì gel kdolongu,
són dù nô béléu kulit ne tiol.
6Mkéle bè kang bè yóm benwu laen hol wen tauhen,
duhen ke bè yóm kang tek sótuhen nô bè yóm benwu laen hol wen tauhen.
7Là kóe gtungô,
mkéle bè yóm onuk koyu tek sotuhen nô ta ketef.
8Yó kem hohonu, snilef le kdaw tendo hemnê dou.
Tendo utóm le boluyu bè yóm kehmulà le.
9Yakà són du kohù kenu.
Yóm lewoku, tódô gel mlel lem ninumu
10lemwót bè alì ksidek kebutem dou.
Yakà deng nulutem dou, ominem bud mbot do.
11Yóm klowilu, hol lómón ke yóm olung móyón kifu mahil lana,
mkéle bè yóm bnes deng menes.
12Okóm uu se, Dwata, laen kô dù tul sónen yóm kkamalem.
Yóm tey któtólem, tódô senflósen efet kól bè yóm ket angat lugod le.
13Angati mdà nam e knodu Jirusalim,
ne ni se yóm kdaw bang kmodu du,
ni se yóm kdaw deng fasadem nam e któbóng du.
14Yakà tey hen-gulam le yó kem botu bengen yó kem tau tóbóng lówóhem,
balù yó kem kfung bè lan, tey kkamà le du.
15Yó kem benwu talak tonok, angat setbol kkel le bè solu Dwata.
Yó kem tau hol geta talak tonok, angat setbol kkel le bè yóm tey kegetahen.
16Yakà bud hdà Dwata du Jirusalim,
hegfanen yóm tey kegetahen.
17Angat bnalaen yóm hni yó kem tau laen dù gónó le ma.
Là kô nan e kenbê du yó kem hni le.
18Hol snulat ye nim ni anì tngón yó kem angat bud lugod ye,
anì angat dóyón le Dwata yó kem tau là deng le sut.
19Lemwót Dwata ditu bè kun gónô bè longit, temngel edini laan.
Lemwót ditu bè longit temngel edini talak tonok
20nan e hnungol dolong yó kem tau blanggù,
nan e lenwà yó kem tau deng kukum le kul hatay.
21Duhen yó, angat hnigal dóyón le yóm boluy Dwata bè Sayun,
dóyón le bè Jirusalim,
22ke deng le gotu stifun yóm kdéen tau,
ne ke deng le gotu stifun tmaba ebè Dwata yóm kdéen benwu.
23Là dengen gfu he yóm dou klowil,
deng sana hukol Dwata towoku.
24Okóm hkoduhe béléen, monu,
“Ó Dwata yóm Dwata là matayen,
béem tagad nwa do klowilu yóm igou hanà tolo lomi tau.
25Tehe là sekna ekni, hdaem begel tonok,
ne lan tdokem mò yóm longit.
26Angat le gotu kmanas se yó, okóm kóm, laen kô dù nam e són.
Hol le skél bè nes, angat le gotu bolok.
Gotu tenlesem lu lómón nes, ne tódô le lana lem matahem.
27Okóm kóm, sana uu, laen kô dù nam e són.
28Yó kem ngà yó kem tauhem, laen dù hemen le.
Yó kem lugod le, angat tey kbegel le bè soluhem.”
Currently Selected:
Kem Lingón 102: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
