Kem Udél Hlalak Tehe Selumun 3
3
Hlau ebè yó kem logi lomi lemnok
1Ó Man, béem abay klifót yó kem toloku
kóm, okóm hol hnóem bè nawahem yó kem hlolou kóm.
2Yakà bè ni du gónón lemwót tahà ktauhem ne yóm klowil gsengel nawam du.
3Hol béem abay kó bè kmoem yóm kogot nawam bè Dwata.
Eles tendo suem te henmuem ne lem hendemem.
4Ke ni se nmoem, hligal Dwata ne gsengel nawan ebéléem, dalang se kem dumum tau.
5Hol hewótem lem but blututem yóm ksaligem ke Dwata, béem abay genléd nawa yóm kóm khulung temnef.
6Balù nô kihu nmoem nam na gel setngón ke Dwata ne du he malak kóm bè yóm lan tedeng.
7Béem tô hendem deng tey bong ne dou khulung hedem.
Yake hol knikoem Dwata ne béi bud mò sidek.
8Ke ni se nmoem, ni se henged bulung hemyu klówóhem ne hkó desem.
9Hol nadatem Dwata mlan bè keblayem du du yóm alì hyu bè kdê yó kem huluhem gefet.
10Ke ni se nmoem, tódô hnok folem ne balù yó kem gónóm hemsù yóm gel mò ninum gotu lembés.
11Ó Man, béem hentólóng ke wen gónón semtódô kóm Dwata ne béem kensidek nawa se yóm ktedengen kóm.
12Yakà gel tnedeng Dwata du yóm kun kenbong nawa lómón yóm mà ke kenbong nawahen yóm ngaen logi sal gel tnedengen.
Hol mu yóm khulung hedem
13Hyu nawan yóm tau deng baling hulung hedem ne tendo sen-galuhen yóm khulungen temnef.
14Yakà bong ofolem du yóm khulung hedem senta yóm tembaga futì ne tahu blówón.
15Yóm khulung hedem tey mebtes senta yó kem kimu legen mebtes ne balù kihu dumu nóyóem laen kô gemsenged du.
16Yó bunguhen yóm khulung hedem htahaen ktauhem, benlayen u kendengen ne kegdóyón.
17Yóm tau galak bè khulung hedem hligal ne laen knikoen.
18Yó gónón tahà ktauhen yóm tau lanen mmu yóm khulung hedem ne tey hyu nawan yóm tau mgen du.
19Dwata se deng mò du yóm tonok lemwót bè kun khulung hedem ne bud lemwót bè kun khulung temnef gónón gemmò yó kem longit.
20Bud lemwót bè kun ketngón gónón tendo hlel yó kem él ne yó kem lobun tendo hosok amù e talak tonok.
Hol henyu te kmò te ebè kem dumu te
21Ó Man, hol suem bè nawam yóm khulungem hedem ne yóm khulungem mit du hyu yóm kmoem.
Hol béem tnagaw nawa anì là lana le béléem.
22Yakà lu du gónón lemwót hyu klowilem ne heklóón yóm kóm kmò.
23Gel sen-galak le u bè lanem mógów anì laen dù hemenem ne là kói glokob.
24Ne ke soki lemwót tungô laen dù knikoem ne tilob ktungóem.
25Béi hlikò bè yóm knikò mekto ksuten duhen yóm kgefet yóm keglà yó kem tau mò sidek.
26Abay se bè yóm tendo kegléd nawam ke Dwata gónón hyu knóem ne là kô nwiten kóm e lem yó kem gónón sidek.
27Béem sen-gafas yóm tóbóng ebè yóm tau bang gónó e bemlay du ke wen se nô béléem mò tóbóngem du.
28Béem song imò tmóbóng du e lem haya yóm dumum ke wen se gónóm heblà ni.
29Béi mò atul sidek bè yóm dumuhem sebét, yakà uu du yóm snaligen.
30Béem nit segled yóm dumum ke laen dù duónem du.
31Béem hendémê kul kmò yó kem tau gel hmugus ne béen wen dnalangem du yóm kul kmò.
32Yakà gel kenlit Dwata kul yó kem tau là tedeng kmò le, okóm sen-gbóten yó kem tau tedeng kmò le.
33Tnuled Dwata yó kem gmónô gel mò sidek, okóm fen nuyagen yó kem gmónô tedeng kmò le.
34Hnohonen lu yó kem tau gel heklabak, okóm gel knoduhen yó kem tau heglaan le knô le.
35Yó kem tau hulung hedem guta le kdóyón tau kul, okóm yó kem tau book mulék le myak.
Currently Selected:
Kem Udél Hlalak Tehe Selumun 3: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
