Kem Udél Hlalak Tehe Selumun 4
4
Hol kehlom du nawa yóm khulung hedem
1Ó kem ngà, hol hnungol ye yó kem tolok mà ye. Hol kenmón ye ne baling ye hulung temnef.
2Yakà teyen hyu se yóm dou tolok kuy.
Yó gónóm mon du, hol sù ye lem hendem ye.
3Bè yóm hanà kegenu ngà ekni tek són o ngà yê.
Ne yóm tolo keglébédu bélê le
4gel tolok mà do, monen, “Hol suem lem hendemem yó kem hlolou kóm ne hol nimónem anì tahà ktauhem.
5Hol béem abay klifót ne béem abay knogol yó kem monu.
Nwahem bè nawahem yóm khulung hedem ne khulung temnef.
6Béem kó bè nawahem yóm khulung hedem; yó se yóm semgyok kóm.
Hol hnóem du nawam ne yó se mentey kóm.
7Yóm khulung hedem alì lemyu bè kdéen.
Yó gónóm mon, hol hegna nwahem bè nawam yóm khulung hedem ne balù kihu dumu nwahem hol nam na hegna nwa yóm khulung temnef.
8Henlomem nawa yóm khulung hedem ne hegkayen uu.
Hol béem kó lem nawahem yóm khulung hedem, yakà megdóyóni du.
9Ke hulungi hedem, ni se mit kóm knóón ne gónóm megdóyón.”
Ni se koni yóm tehe tolok Mà do.
Bê ye nmung kmò yó kem tau mò sidek
10Ó Man, hol hnungolem o ne suem lem hendemem yó kem monu anì tahà ktauhem.
11Deng gotu toloku kóm yóm lan ebè yóm khulung hedem ne deng nalaku u bè yóm lan ebè yóm ktedeng kmò.
12Bè yóm kmò kógów klowilem, yó kem tô hemseng kóm tódô kmanas ne bè yóm nmoem meslò laen kô gónóm glokob.
13Hol negenem ne béem glus yó kem deng hlauhu kóm.
Hol nabungem, yakà bè yó du gónón tahà ktauhem.
14Béem lolò yóm kul lan yó kem tau mò sidek ne béem dnalang se yóm kul kmò.
15Hol senyatem yóm kul lan yó ne béi abay mlan e du.
Hol senyahem ne tódô henlósem yóm kóm klan.
16Yakà là kô le gtungô ke là nan wen sidek nmò le, duhen ke là nan wen dumu tau nwit le mò sidek.
17Yó kem sidek nmò le lómón ke henged ken le ne él ninum le.
18Yóm kun kmò kógów klowil yóm tau tedeng kmoen lómón ke layag kdaw, són moen minut mtataw efet talak kemdaw.
19Okóm yóm kul kmò kógów klowil yó kem tau gel mò sidek lómón ke són moen mget kkifuhen.
Són mò le tlokob, okóm là kô ton le du yóm hetlokob kul.
Ketgamahem kóm kmò
20Ó Man, hol kenmónem yóm dou udél ne hol henklinguhem yóm toloku kóm.
21Béem kó te henmuem ni kem ni ne hol suem lem hendemem.
22Yakà yó du yóm gónón tahà ktau yóm tau gemtnef du ne gónón hyu klówóhen.
23Hol ten-gamahem bè kdéen yóm kmò kógów kehedemem, yakà bè kóm kehedem du gónón lemwót yóm kóm kmò.
24Hol béi abay mò tulón seblékê ne béi se mò kéng.
25Hentedengem kmò kógów klowilem lómón yóm tau là tlek kun mógów kudung wen kenyaken.
26Hol eles hendemem yóm kmò klanem ne balù kihu yóm nmoem sal hyu.
27Hol henktengem lemolò du yóm lan tedeng ne hol senyahem yó kem nmò sidek.
Currently Selected:
Kem Udél Hlalak Tehe Selumun 4: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
