Kem Udél Hlalak Tehe Selumun 29
29
Kem udél hlalak gbak ebè yóm kgel kulu tau
1Yóm tau là kenmónen du yóm
kbólów du ne mom temnù kgel kuluhen
wen glumfak mekto sut béléen ne là kô bud lowilen du.
2Hligal kem tau ke kem tau tedeng kmò le mogot benwu,
okóm ke kem tau gel mò sidek yóm mogot benwu tey sidek kegnóm kem tau du.
3Yóm tau alì sen-galuhen yóm khulung hedem, hefligalen maen,
okóm yóm tau dnumuhen yóm libun hdóyón tódô namaen hkawang yóm kendengenen.
4Yóm tau hol geta tedeng kogoten benwu baling mbegel yóm benwu nogoten,
okóm ke són sen-galuhen kwa tau nawahen, hebaen yóm benwu nogoten.
5Yóm tau là tahu ksaluen kdumuhen hensideken kun knô.
6Yóm tau gel mò sidek mom gholot bè yóm kun salà,
okóm yóm tau tedeng kmoen mom semngal ne hligal se kun.
7Yóm tau tedeng kmoen són sen-galuhen yóm kguta kem tau élél du yóm kukum tedeng,
okóm là kun yóm tau gel mò sidek là kô hendemen du yóm kukum tedeng.
8Yó kem tau gel semdekà gbek le hebut yó kem tau bè sotu benwu,
okóm yó kem tau hulung hedem gbek le hebó du yóm kebut le yó.
9Laen dù gónón e kól yóm tau hulung hedem ke nwiten skukum yóm tau book
abay se són moen mudél lembut ne hemnê kun yóm tau book.
10Yó kem tau tendo módód hmatay tau, knutó nawa le yóm tau laen dù belenen,
okóm yó kem tau tedeng kmò le, gel kenlung le yó kem tau laen dù belenen yó.
11Yóm tau book là kô gafasen du kebuten,
okóm yóm tau hulung hedem gel nafasen nawan.
12Yóm tau mogot benwu ke nmungen yóm kéng gotu le baling mò kéng se kul yó kem tau smugung béléen.
13Yóm tau élél ne yóm tau hemgnok kul senged le bè keblay Dwata kul mata mò hton le.
14Yóm tau hol geta ke tedeng yóm kkukumen yó kem tau élél, nan tahà kogoten benwu.
15Lemwót bè kfes du ne kbólów du mit du hulung hedem yóm ngà,
okóm ke tódô lugun du kun kóyô henyaken yéen.
16Ke yó kem tau gel mò sidek yóm mogot benwu, deng mom temnù kmò le sidek yó kem tau,
okóm ton yó kem tau tedeng kmò le he yóm keglà le.
17Sentódóem yóm ngaem logi anì temnù nawahem béléen ne tey wen he gónón hefligal kóm.
18Yó kem tau là hmungol le udél Dwata tódô kihu knóyô nmò le,
okóm hligal yóm tau gel mimón yóm udél Dwata.
19Wen se hesek là kóen kóyów ke sentódóem ke olom mudél du
baluen ke tngónen yóm monem là kô nmoen du.
20Mom hyu he yóm tau book senta yóm tau tódô faen mudél là nan hendem du.
21Yóm tau ke tódô blayen bè yóm heseken yóm kun knóyô lemwót bè kegenen udì,
wen kdawen tódô gfunen yóm kdê kendengen yóm tau yó lómón ke hol ngaen.
22Són moen mit sbólów bè kem dumu tau yóm tau sunget
ne yóm tau gel mahil lembut tey dê gónón gemsalà.
23Yóm keheklabak mit du genef yóm tau,
okóm yóm tau heglaan gutahen kadat tau du.
24Yóm tau momung ne lemimeng yóm tau mnagaw igoen temngón du megtuled du, hensideken knóen.
25Yóm tau tnafa nawahen yóm kehedem dumu tau ebéléen henged holot gónón bekó,
okóm yóm tau snaligen Dwata hyu knóen.
26Tey dê tau hemdeen yóm tey kehyu nawan ebélê le yóm tau mogot benwu,
okóm tek són Dwata gónó tau gmuta yóm ktedengen.
27Yóm tau tedeng kmoen kenliten yóm tau gel mò sidek
senged se yóm tau gel mò sidek bud kenliten yóm tau tedeng kmoen.
Currently Selected:
Kem Udél Hlalak Tehe Selumun 29: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
