Kem Udél Hlalak Tehe Selumun 28
28
Kem udél hlalak gbak ebè kimón te kem hlau
1Tódô mlóy là wen kemtes du yóm tau
gel mò sidek,
okóm yóm tau tedeng kmoen lómón klóbóen liyun.
2Sok heguluk yó kem tau lem yóm benwu, són moen se stólóng tau stufì mogot du,
okóm mbegel yóm benwu ke hulung le temnef ne temngón yóm tau mogot du.
3Yóm tau élél ke bud hen-gnoken yóm dumun élél hol lómón ke yóm kulón hemsidek hulu.
4Yó kem tau là nimón le du yóm hlau Dwata mom dóyón le yó kem tau gel mò sidek,
okóm ke nimón le yóm hlau Dwata kenbê le yóm tau gel mò sidek.
5Yó kem tau gel mò sidek là bud getnef le du yóm hol ktedengen,
okóm kul yó kem tau gel mimón ke Dwata gotu getnef le yóm ktedengen.
6Mom hyu he yóm tau élél laen dù kéngen senta yóm tau là tedeng kmoen anien ke wen kendengenen.
7Yóm logi nimónen yó kem hlau Dwata du se yóm logi hulung hedem,
okóm yóm logi dnumuhen yó kem tau gel mò sidek henyaken maen.
8Yóm tau hgengónen kendengenen lemwót bè kkaf keswahen ne bè kongoen kem dumu tau,
yóm kendengenen yó mom mógów ebè yóm tau gel masa yó kem tau élél.
9Tey kenlit Dwata yóm tau kmogol yó kem hlauhen
ne là kô hnungolen du yóm knihen.
10Yóm tau snukaten yóm tau laen dù kéngen ebè yóm nmò sidek mom du bud tawan sukaten,
okóm yóm tau laen dù belenen bong umunen.
Kem udél hlalak gbak ebè kem kendengen tau
11Yóm tau wen kendengenen bè kun kehedem du deng hulung hedem ne kun,
okóm yóm tau élél hulung temnef yóm kmò tau ne dilóen yóm ktahuhen bè yóm tau wen kendengenen yó.
12Tey le hligal yó kem tau ke baling kmamal yó kem tau tedeng kmò le,
okóm ke kmamal yó kem tau gel mò sidek là kô le hol gliwà yó kem tau knamal le.
13Yóm tau limengen salaen laen kô tul kehyu klowilen,
okóm yóm tau tódô benkasen bè Dwata yóm salaen ne knogolen, tódô hnifót Dwata.
14Wen kligalen yóm tau gel nimónen Dwata,
okóm yóm tau hgelen kuluhen bè Dwata wen glumfaken.
15Yóm tau élél laen kô dù gmoen bè yóm tau hol geta gel mò sidek,
tey sidek klóbóen hol lómón ke mngel yóm mon le liyun,
ne yóm klóngónen sembitek yóm mon le bér.
16Yóm tau hol geta là hulungen temnef laen dù koduhen,
okóm yóm tau hol geta ke kenliten yóm tódô gel ma mlan bè là ktedengen htahaen ktauhen.
17Yóm tau deng monok són moen metem efet katayen, béen wen tmóbóng du.
18Yóm tau laen dù belenen tey hyu knóen,
okóm yóm tau là tedeng kmoen mekto keglaen.
19Yóm tau gel mò nmò bè tonok són moen gengón kenen,
okóm yóm tau gel mmung yóm atul laen dù muhen, tódô gotu du gónón élél.
20Yóm tau laen dù belenen tódô seflós kuyag Dwata du,
okóm yóm tau hensloen kwen kendengenen ne ke mlan bè là ktedengen, là kô tódô lugun Dwata du là tnafak.
21Là kóen hyu yóm tau kmukum ke mtukul nfihen,
okóm wen se tau mahil kmoen du yóm là tedengen baluen ke olon udì blay du.
22Yóm tau seglom kóyóen ke géhél wen kendengenen
ne là kô tngónen du ksuten béléen yóm kélélen.
23Yóm tau ke bnólówen kdumun, tonen kogolen se yóm tey kehyu nawahen ebéléen yóm tau yó
senta yóm tau olon smalù là tahuhen.
24Yóm tau mnagaw bè kem tuhahen ne monen là kô salà du
hol lómón ksideken yóm nmoen yó lómón ksidek yóm kul kmò yó kem tau gemlà.
25Yóm keseglom tau gónón lemwót kesbólów,
okóm yóm tau smalig bè Dwata hyu klowilen.
26Book yóm tau tódô doen yóm kun kehedem,
okóm yóm tau hulung hedem gewà bè yóm sidek.
27Yóm tau gel benlayen yóm tau élél là kóen mulék élél,
okóm yóm tau là kenmónen yó kem tau élél tey dê tau mudél sidek etahen.
28Là kô le hol gliwà yó kem tau ke baling kmamal yó kem tau gel mò sidek,
okóm sok là bud le kmamal yó he bud kul kogot benwu yó kem tau tedeng kmò le.
Currently Selected:
Kem Udél Hlalak Tehe Selumun 28: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
