Kem Udél Hlalak Tehe Selumun 30
30
Yó kem udél Agul gbak ebè kun knô
1Ni se kem udél yóm sotu tau
boluyen Agul ngà Jaka. Yó monen, “Là nóen béléu Dwata.
Là nóen béléu Dwata, ne laen kô dù gmou.
2Bè kdéen tau, ou se yóm laen dù tngónen ne là se nóen béléu yóm khulung tau temnef.
3Là kô deng dnalangu du yóm khulung hedem ne là se deng tngónu du yóm Dwata laen dù belenen.
4Tau du de deng gu bè longit bè yóm gónó Dwata nô?
Tau du de deng semtifun yóm lenos lem hólólen?
Tau du de deng hmunges nes yóm él?
Tau du de deng mò gónón gkilil yóm benwu?
Tedu de boluyen ne boluy yóm ngaen logi?
Tulón ye do ke tngón ye?
5Ket yóm fasad Dwata sal gel tahu ne du gel kemlung yó kem tau mlo ebéléen.
6Béem tennù yóm kun udél Dwata déke bnólówen u ne mom gfan ta yóm kwen kéngem.
7Ó Dwata wen lewu hol hnihu béléem, hol blayem do bè yóm klawihu mowil.
8Tanayen, hol tnóbóngem o anì là gemmoe kéng ne gewuhen, béem hdengen o ne béem hélél se o,
olom bemlay do yóm mò gel sfeng kenu.
9Déke alì wen gónóhu ma ne mom knogolu u ne monu laen dù muhu kóm.
Senged se ke éléle déke gnagawe ne henyaku u Dwata.”
Kem udél hlalak tehe tulón Agul.
10“Yóm hesek, béem tódô fà kmamo du bè yóm ogoten déke tnuleden u yóm hesek yó ne mom uu yóm gembô salà.
11Wen se kem tau tnuled le kem mà le ne là se dóyón le kem yê le.
12Wen se kem tau ofo kul hemdem du ke deng hono duhen yóm kul kmò,
okóm là dengen mkó ta le he salà le.
13Wen se kem tau alì salù le knô le abay se hendem le laen dù dumu tau gemsenged du yóm kul kehyu kmò.
14Wen se kem tau alì sidek kongò le yó kem tau élél mò lan le temnù yóm kul gónó wen.
15Wen sotu tau alì sbì lewu ngaen libun ne ni kem ngaen libun ni són mò le mon du, ‘Benlay mi.’
Mkél le bè nim tlu là wen tul kegsengelen, o fat dé yóm là kô mon le du,
‘Geblaen ni ne.’ Ni se lu:
16Yóm benwu yó kem tau matay ne yóm libun atil ne yóm tonok semgalu él ne yóm ofi là ghatay du.
Ni se koni yóm fat là wen tul kegsengel le.
17Yóm tau sendekaen maen ne là nimónen du yóm yéen tuha
yake tódô hlagas lówóhen sok matay anì bè yó gónó wak ne kofi semsesék du.
18Wen tlu yó kem hentawu, o fat dé yóm là geslemetu du.
19Duhen ni kem ni:
Yóm mò kóyóng yóm banug te kmawang ne yóm mò kkaf yóm ulal bè hagang
ne yóm mò klan yóm kafal gu te mohin ne yóm mò kiwol logi libun.
Ni se koni yóm fat yó kem là geslemetu du.
20Ni se kun kmò yóm libun mdà yehen: sok deng kkenen olon mifu sumóngen
ominen mon du, ‘Laen kô deng nmou sidek.’
21Wen tlu yó kem alì kenbê kem tau, o fat dé yóm là gehbala le du.
22Duhen ni kem ni:
Yóm hesek ke baling tau hol geta ne yóm tau là sikof kehedemen sok gemtu
23ne sok myehen yóm libun alì kenlit kem tau ne yóm hesek libun ke mò tles yóm ogoten libun.
Ni se koni yóm fat là gehbala kem tau du.
24Wen fat bè yó kem lemnek lemanaf te tonok,
okóm gfan bélê le yóm alì khulung le hedem.
25Ni sii lu: yó kem gulom balù yóm klaen dù kgis le
ewenem sana eles kwen ken sentifun le bè yóm kdawen wen ken mò tgama le bè yóm kdawen laen dù ken.
26Yóm sotu kay lemanaf mkél bè ungé balù yóm là keknu le
ewenem sana kmò le gónó le nô lem yó kem hagang.
27Yó kem tlangas balù yóm klaen dù yóm geta bélê le
ewenem sana ktilob kesegmung yóm kuluk le.
28Ne yó kem mangat balay tek hóyów lebeng lem hólól
ewenem sana ktonem kul bè gónô yóm tau hol geta.
Ni se koni yóm fat lemanaf te tonok alì hulung hedem.
29Wen tlu hyu mton du yóm klafang le, o fat dé, yóm tilob mton du kógów le.
30Duhen ni kem ni:
yóm alì kemgis bè kdéen ógóf, yóm mon le liyun ne laen se kô mtukul knikoen.
31Yóm mósól malak ufu ne yóm tubid logi malak kem dumun
ne yóm tau hol geta mdà bè solu yó kem tauhen.
Ni se koni yóm fat kem hyu mton du kógów le.
32Ke deng wen gónóm heklabak lemwót bè yóm kbookem ne duhen ke deng wen sidek natulem,
hol hendemem ne hol kóhem abay se sal gel wen uléken yóm nmò yó.
33Lómón se yóm lefò kenlut gutahem élen bè kekmesem du
ne yóm ilung ke ntungem, msut litóen.
Senged se bè yóm kebut tau, ke gendufem yó uléken kesbólów.”
Currently Selected:
Kem Udél Hlalak Tehe Selumun 30: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
