Kem Udél Hlalak Tehe Selumun 26
26
1Tey móngó bè yóm kdawen mnóng ke
hemdeeni du bulók kulón
ne lómón se yó kóngó dmóyón du yóm tau book.
2Yóm tuled là kóen sut béléem ke laen dù duónen,
hol lómón yóm onuk koyu olon móyóng hegluk.
Kem udél hlalak gbak ebè kem tau book
3Gel nfes ne knakang yóm kudà
ne bnoug yóm tau book anì megtolok le.
4Ke bnalaem yóm tau book béem ulit bè yóm kun kbook
déke momi mkél béléen.
5Bnalaem yóm tau book bè yóm udél gembólów du bè yóm kbooken anì dilóen yóm là khulungen hedem.
6Yóm tau hemwit tinok bè yóm tau book lómón ke kenlengen tihen, olon mò gónón lebà nawahen.
7Là kóen wen muhen bè yóm tau yó kem tihen kihod,
senged se klaen dù mu yóm udél hlalak gu bè yóm tau book.
8Senged ungel le yóm tau dmóyón yóm tau book, yóm tau mom bkesen bè tdadol yóm botu.
9Yóm tau book mit du yóm udél hlalak, hol lómón ke yóm tau lengel mkem yóm koyu snual,
hnayam le kem dumu le.
10Yóm tau hmò nmò gfan yóm là khulungen hedem
ke tódô kihu tau book duhen ke tau lengel hmoen nmò.
11Yóm bud gel kdilut ohu yóm lewólen,
hol lómón se yó yóm tau book ke là kóhen du yóm kbooken.
12Mom hyu he yóm tau book senta yóm tau bè kun kehedem du deng tey hulung hedem ne kun.
Kem udél hlalak gbak ebè kem tau lemfu
13Mon yóm tau lemfu, “Wen liyun bè lan ne senged se bè yó kem dumu lan.”
Mò dawahen là mò nmò.
14Lómón yóm tendo kilóy yóm sasà beng bè bak tikeb laen dù gónón e mógów
lómón se ni yóm tau lemfu tendo khilóyen ta gónón tungô.
15Yóm tau lemfu olon mnok te huyówen
ne lemwót bè kduken là dog gsungiten du kenen.
16Bè kun kehedem du yóm tau lemfu bong yóm kun khulung hedem
senta yóm hitu kem tau hulung le malà udél.
Kem udél hlalak gbak ebè yó kem tau lemnek ksumóng le
17Yóm tau tódô gbót bè yóm kesbólów laen dù kun du wen gfaen
lómón kwen gfaen yóm tau kemfô ohu ke nogoten bè klinguhen.
18Yóm tau nungel tendo sembiling suk gónó matay
19hol lómón ksideken yóm tau snukaten kdumun ominen mon du olohu hmowon du.
20Matay yóm ofi ke laen dù snuken
lómón se yó yóm keteflok yóm kesbólów ke laen dù tau lemnek ksumóngen.
21Yóm using mò hbala hekyóngón yóm ofi ne yóm snuk hdilóf du
ne lómón se ni kehbólen kesbólów yóm tau gel mit segled.
22Yóm udél yóm tau lemnek sumóngen lómón ke ken alì mnóm
tey le beyen mungol du yó kem tau.
23Yóm tau olon hmingón hemtilob kestulónen blaem sidek kehedemen
mkél bè yóm lebwón tonok olon btulaen tilob du là kóen hyu yóm lemen.
24Yóm tau olon hningón hemyu ta kestulónen igoen mutó nawahen gu lem, bnosen ksukaten.
25Anien ke hentiloben kudélen yóm tau yó béem hentahu
yakà dengen hnok lem but blututen yóm utó nawahen.
26Baluen ke gebnos yóm utó nawahen senged bud kegfanen bè kmoen snéen yóm sidek nmoen.
27Yóm tau mokol sol mò gónón hebtang kdumun mom du bud btang e lemen
ne yóm tau hemluy botu ebè kdumun mom du yóm bud gónón e mluy.
28Yóm tau mò kéng mom knutó nawahen yóm tau gembunù du yóm kéngen
ne yóm tau olon smalù là tahuhen olon hemsidek kdumun.
Currently Selected:
Kem Udél Hlalak Tehe Selumun 26: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
