Kem Udél Hlalak Tehe Selumun 25
25
Kem udél hlalak gbak ebè kem tau hol geta
1Ni bud wen kem udél hlalak tehe
Selumun,
yóm tehe nulit snulat yó kem tau smugung bè yóm tehe Hisikaya yóm tau hol geta bè benwu Juda.
Ni sii lu yó kem udél hlalak yó.
2Lemwót bè yóm là gotu ketngón tau du yóm kdéen, gónón megdóyón Dwata
ne bud le megdóyón se yó kem tau hol geta bè khulung le mebel yóm ktahuhen ne ktedeng kukum.
3Yóm nô lem hendem yóm tau hol geta là kô glileb te du,
lómón yóm là ketngón te du kegeta yóm longit ne knelem yóm mohin.
4Ke kóhem bolen yóm tembaga futì, gbek yóm tau temwél hembaling du yóm kihu tilob nóyô nmoen.
5Hdóhem klohok yóm tau hol geta yó kem tau gel mò sidek
ne yóm kun kogot yóm tau hol geta yó baling mbegel bè ktedengen.
6Ke mdai bè solu yóm tau hol geta béem salù knóem
ne béi se hegbol lem blóng yó kem tau bong boluyen.
7Mom hyu he ke nan wen mon du mò kóm,
“Myóni klohok yó kem tau bong boluy le,”
olo ke mon le mò kóm, “Yake mdóhi ne blayem yóm tau bong boluyen yóm gónóm myón.”
Kem udél hlalak gbak ebè dumu te sebét
8Béem kendel hegefet ebè gónô skukum yóm deng tonem,
déke muléki myak du ke wen hemkéng du béléem.
9Ke wen gónóm là segtud yóm dumuhem tau tódô lifut sentulón ye
ne bê ye bud hból.
10Déke henyaken uu yóm tau hmungol du ne laen tul kkóhen tahem yóm yakem.
11Tey tilob mungol du yóm tau hulung temblà ne semgtón du yóm udélen.
12Yóm kbólów yóm tau deng hulung hedem tey bong muhen bè yóm tau mimón
senta yóm tising blówón megélék.
13Yóm tau gsalig henyuhen nawa yóm tau mdók du
lómón kehyu kegnómen du lómón ke minum él tnaw bè kkinì kdaw.
14Yóm tau fmasad bemlay laen tul kdohoen
mkél bè yóm tmengeb ne lenos laen kulónen.
15Yóm tau manay nawahen gwahen nawa yóm tau kmamal
ne yóm udél ganag gbeken mgoy yóm tau mgel kuluhen.
16Ke mtoni tneb tenblaem kkenem du déke lemwóli du.
17Olò bnatulem klawahem bè gónô yóm dumum sebét,
déke tmakas béléem ne mutó nawan kóm.
18Yóm tau tmifù kéng hnayamen kdumun lómón ke hlayamen du bogul
duhen ke sudeng ne duhen ke hanak.
19Yóm ksidek smalig yóm tau là gsalig du bè yóm kwen hlayam
lómón se yó yóm ksideken yóm ngihi temduk duhen ke yóm ti deng tugô.
20Yóm semngal bè yóm tau alì sidek keblat nawan lómón ke nlusen kgalen yóm tau tennaw
duhen ke lenunolem kahì yóm halì.
Kem udél hlalak gbak ebè kem hohon te
21Ke bitil yóm hohonem, henkenem
ne ke meeng, hinumem.
22Ke ni se nmoem ebè yóm hohonem
tey sidek kyaken lemwót bè yóm kehyu kmoem ebéléen
ne Dwata he bemlay kóm ofol lemwót bè yóm nmoen yó.
23Yóm kdohò yóm lenos nbol kulón lemwót fi gu bwak
lómón se yó kdohò kebut tau du yóm tau lemnek ksumóngen.
24Mom hyu he ke nô bè gónón hnas yóm tau
senta ke setnù le tuha libunen yóm tendo gel mit du sgés lem gónô.
Kem udél hlalak gbak ebè kut knô
25Yóm kehyu kegnóm tau du yóm kungolen yóm tulón hyu lemwót gu bè benwu mayuk
lómón ke gemtob él tnaw yóm tau alì sidek kleengen.
26Yóm kegmung yóm tau tedeng kmoen bè yóm tau gel mò sidek,
hol lómón yóm kokol duhen tbul él deng sidek.
27Là kóen hyu ke gedlug kkenem tneb,
senged se là kehyu yóm kesgaluhem kegsalù kem tau kóm.
28Yóm tau là gbeken mafas nawan laen dù gmoen,
lómón ke yóm benwu bong laen dù labat hilolen tódô mngal bè hohonen.
Currently Selected:
Kem Udél Hlalak Tehe Selumun 25: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
