Kem Udél Hlalak Tehe Selumun 27
27
Kem udél hlalak gbak ebè kmò yóm klowil te
1Béem salù yóm angat nmoem e lem
haya, là kô tngónem du ke tedu angat kmoen.
2Yake dumu tau dé smalù kóm béen mom uu
yake tau milo dé ne là uu du mon du.
3Yóm botu ne helek tey blat okóm udì he keblat ni kem ni
ke hsenged te bè yóm keblat yóm keglayam lemwót bè yóm tau book.
4Yóm kebut tau tey sidek ne tey te glayam du okóm udì he nim ni
ke hsenged te bè yóm keglayam te du yóm klenget tau.
5Mom hyu he ke tódô benkasem yóm kbólówem yóm tau
senta ke yó hendemen là bong nawahem du.
6Mom hyu bè yóm tau ke ween semtódô du abay se gsaligen
olo ke hohonen hmingón mit du swè abay se olohen smukat du.
7Yóm tau ke deng gemtu balù yóm tneb sana kbéen du,
okóm ke bitil balù yóm ken héét sana knómen béléen.
8Yóm tau htabag hekawang
mkél bè yóm onuk koyu tmagak sala hkawang.
9Yóm gel hboo ne yóm hnolo tilob boohen hefligalen tau,
okóm yóm hlayam fen sembeweg du yóm kenek nawahen.
10Béem klifót yóm weem ne kun wè maem, déke wen glumfakem
anien he ke là htóbóngi bè yóm dumum setwoli deng mayuk béléem,
yakà wen yóm weem dumum sebét yó mahil któbóngen kóm.
11Ó Man, holi hfulung hedem ne hefligalem o
anì wen se balau du kihu tau semlón do.
12Yóm tau hulung milô eles dilóen yóm sidek ne senyahen,
okóm yóm tau là ngelem kehedemen mom mógów e du ne yó gónón glayam.
13Ke sok wen tau fmasad mayad utóng yóm tau là deng tngónen du
yake nan hlun sandà kdê kimuhen dé yóm tau fmasad yó mò gónón tahu.
14Yóm tau hnafusen bemtik yóm ween dumun sebét ne mekto khódóhen du lómón tô tnuleden.
15Tey hfulów yóm libun mit sgés bè tuha logihen,
mkél bè kehfulów yóm él tendo temdak.
16Là kô gbekem temfnô du yóm libun lómón yó kmoen,
lómón se yóm là kegbek temflok yóm lenos ne là kegbek mkem yóm hnolo.
17Yóm tau dmalang bè kem dumun lómón se yó nem suk benlét dumuhen suk.
18Yóm tau tendo sen-gifaen yóm koyu boluyen fig kenen se bunguhen
senged se yóm tau tendo sen-gifaen yóm gónón mogot, megdóyón se kun.
19Lómó kton tau yóm kun halas olung lem él,
bud lómón se yó kton tau du lem hendemen yóm kun kmò.
20Laen kô tul kengeben yóm benwu yó kem matay
lómón se yó nem knóyô tau laen kô tul ktakasen du.
21Bè ofi gónó tau tmilów du yóm tembaga futì ne yóm tahu blówón
ne yó se kun tilów yóm tau yóm kdóyón dumu tau du.
22Yóm tau book baluen ke ngangem moug du efet tô hatayen
là kô gbekem mkó du béléen yóm kbooken.
23Hol hentilobem gel semgifà kul yó kem safiem
ne hol kenmónem yó kem dumu ógófem.
24Yakà gelen hotok yóm kendengen tau
ne balù yóm kogot benwu sana là keglakiten yó kem lugod tau.
25Nam gna himot yóm bnes deng hyu mtób du mò ken ógófem
hlunem mangat yóm bud uléken.
26Ne nmoem mò nes ye yóm kul bul yó kem ubiha
ne gemblihi du tonok yóm filak ulék yó kem tubid.
27Ne bè yóm gatas yó kem dù tubidem gónó ye ma mò bè kken ye
ne gomong yó kem ngà libun mò nmò béléem.
Currently Selected:
Kem Udél Hlalak Tehe Selumun 27: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
