Kem Udél Hlalak Tehe Selumun 15
15
1Hebóhen kebut tau yóm balà ganag,
okóm yóm udél des mom hebuten tau.
2Lemwót bè yóm kun kudél yóm tau hulung hedem gónón lemwót mahil dmalang du yóm ketngón,
okóm yóm tau book laen kô muhen yóm kun udél legas.
3Balù nô, gotu ton Dwata yóm kdéen,
gotu tenngelen se ke sidek duhen hyu yóm nmò tau.
4Yóm udél hemyu nawa tendo lenowilen tau,
okóm yóm udél wen keseblékê nô du, henblaten nawa tau.
5Yóm tau book hennéen hlau kem tuhahen,
okóm yóm tau hulung milô kenmónen yóm kbólów le du.
6Yóm tau tedeng kmoen tey wen kendengen lem gónóen,
okóm yóm kun guta yóm tau gel mò sidek, tódô kmanas lemwót bè yó kem gfaen.
7Hbólen yóm ketngón yóm kun kudél yóm tau hulung hedem,
okóm fen là kun yóm tau book.
8Tey keklit Dwata du yóm kedsuen ebéléen yóm tau gel mò sidek,
okóm yóm kni yóm tau tedeng kmoen hnigalen.
9Tey keklit Dwata du yóm kun kmò yóm tau gel mò sidek,
okóm yóm tau hol sen-galuhen yóm ktedengen kenbong nawahen.
10Yóm tau ke knogolen yóm nmò tedeng wen tey sidek tafaken
ne yóm tau kenbéen yóm kbólów du hukolen ktauhen.
11Yóm kdéen nô bè yóm gónó le nô yó kem matay gotu gfan bè Dwata,
ne milud he kegfanen béléen yóm nô lem but blutut tau.
12Yóm tau gel semdekà là kóen móyô bnólów
ne là se kóen halak bè yóm tau hulung hedem.
13Gfan ta se yóm kligalen yóm tau lingas nawahen,
okóm yóm tau gbeng lemen dilô se kebang nawahen.
14Yóm tau hulung temnef són moen semgalu ketngónen,
okóm yóm tau book mom gsengel nawahen du yóm kbooken.
15Yóm kul klowil yó kem tau élél senflósen mgel,
okóm yó kem tau menek nawa le senflósen wen kligal le.
16Mom hyu he yóm tau ke laen hol gónón ma ke wen klikoen ke Dwata,
senta yóm tau alì bong kendengenen mit du glayam.
17Mom hyu he yóm mutón lemnaw ke mung du yóm kesbong nawa,
olo yóm mutón tahu utón ke wen sutó nawa mung du.
18Yóm tau sunget són moen mit sbólów bè kem dumu tau,
okóm yóm tau là mahilen lembut fen gel senfyuhen yó kem tau sbólów.
19Yóm kun klowil yóm tau lemfu, lómón ke yóm lan tódô tfeng sual,
okóm yóm kun klowil yóm tau tedeng kmoen, lómón ke yóm lan tódô mló.
20Yó kem ngà hulung hedem hefligal le mà le,
okóm yó kem ngà book hennê le yê le.
21Yóm tau là hulungen hedem hligal du se kun yóm kbooken,
okóm yóm tau hulung temnef hentedengen kmoen.
22Là kóen baling yóm natul ke laen dù tau hemyu matul du,
okóm ke dê tau semsatul du baling hyu.
23Hyu nawan yóm tau ke knóón kbalaen udél sotu tau
ne ke gmonen yóm udél segtón ebè yóm nmò.
24Yóm tau hulung hedem loloen yóm lan eta ebè yóm klowil laen dù sónen
anì là gloloen du yóm lan e laan e lem hatay.
25Dwata se gemlà du yóm kul gmónô yó kem tau hegmón,
okóm sen-gyoken yóm kun tonok yóm libun bolu.
26Tey keklit Dwata du yóm kul kehedem yó kem tau gel mò sidek,
okóm hligal du udél yó kem tau laen dù belen kehedem le.
27Yóm tau seglom hnayamen kem fes lówóhen,
okóm yóm tau kenbéen yóm filak mò wa nawahen htahaen ktauhen.
28Yóm tau tedeng kmoen nan gel hendem yóm mò kbalaen kem dumun,
okóm yóm tau gel mò sidek tódô faen lemgas yó kem udél sidek.
29Hlayuk du Dwata yóm tau gel mò sidek,
okóm yóm tau tedeng kmoen hnungolen knihen.
30Tey hligal yóm tau ke tonen klingas lem uyó yóm dumun
ne hol néen ke wen tulón hyu sut tey hyu kegnómen du.
31Ke hnungolem yóm kbólów le kóm mò gónón hyu klowilem,
heneki lem blóng yó kem tau hulung hedem.
32Ke là kenmónem du yóm kehlau le kóm olom hmayam kóm knô,
okóm ke kenmónem yóm kbólów le kóm gutahem yóm khulungem temnef.
33Lemwót bè yóm klikò tau ke Dwata gónón megtolok bè yóm khulung hedem
ne là kô guta tau du yóm kegdóyón ke là nan na gna heglaan du knóen.
Currently Selected:
Kem Udél Hlalak Tehe Selumun 15: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
