Kem Udél Hlalak Tehe Selumun 14
14
1Yóm libun hulung hedem tey tilob
kwiten gu lem gónóen,
okóm kun yóm libun book mom genbaen yóm kun gónô lemwót bè kbooken.
2Knikoen Dwata yóm tau tedeng kmoen,
okóm là kun yóm tau sigol kehedemen mom sendekaen.
3Yóm tau book bè kun kudél hegmón gónón lemwót boug,
okóm kun yóm tau hulung hedem, bè kun kudél fen mit du hyu.
4Là kóen meglem yóm fol sok laen dù ógóf mò nmò,
okóm ke wen ógóf mò nmò, gengón se ken gefet.
5Là kóen tmulón kéng yóm tau ke gel tahu yóm tifuen,
okóm yóm tau gel tmifù kéng, sal kéng se yóm gel tulónen.
6Yóm tau gel semdekà gel hnebelen yóm khulung hedem, okóm laen dù tonen,
okóm kun yóm tau hulung temnef, mahil wen tngónen.
7Holi hlayuk bè yóm tau book
yakem wen se ketngón gwahem béléen.
8Yóm khulung tau milô hetngón du du yóm kun kmò kekdol,
okóm yóm tau book, gsukat bè ksalà kehedemen.
9Yóm tau book mom hnowonen yóm salà,
okóm kun yóm tau tedeng kmoen, gnómen yóm kehyu nawa Dwata ebéléen.
10Tódô ket tau gemnóm du yóm kun ksidek nawa
ne yóm kun kligal ne laen dù dumu tau gemnóm du.
11Yóm tau gel mò sidek meglà yóm kun kmuleng,
okóm yóm tau tedeng kmoen mobung yóm kun kmuleng.
12Wen se atul lómón ke tedeng bè kehedem tau du
okóm yó sónen hatay.
13Ke blat nawahen yóm tau baluen ke kmuli, là kóen mkó béléen yóm keblat nawahen
ne kogol yóm kkulihen bud senged se yóm keblat nawahen.
14Yóm tau seblékê kehedemen gutahen bungu yó kem deng nmoen
ne yóm tau hyu kmoen gutahen se bunguhen yóm kun gel nmò.
15Yóm tau là ngelem kehedemen tódô hentahuhen kihu gungolen,
okóm yóm tau hulung milô sal nan gel hendem kmò klanen.
16Yóm tau hulung hedem eles mabung ne knogolen yóm sidek,
okóm yóm tau book tey kosut nawahen ne tódô doen ktauhen.
17Yóm tau sunget tey mahil kmoen ungel
ne yóm tau hulung matul mò du yóm sidek knutó nawa kem dumun.
18Yóm tau là ngelem kehedemen són moen temnù kungelen,
okóm yóm tau hulung milô són moen gel temnù yóm ketngónen.
19Yó kem tau gel mò sidek gel le hegdanà
bè yó kem tau tedeng kmò le ne hkodu le bélê le snéen.
20Yóm tau élél balù kem dumun sebét gotu hmisik du,
okóm yóm tau wen kendengenen tey dê ween.
21Wen salaen yóm tau sendekaen yó kem dumun tau,
okóm hligal yóm tau knoduhen yó kem tau élél.
22Gemsalai du ke geli matul mò sidek,
okóm ke geli matul mò yóm hyu, tonem yóm ksalig ne yóm kadat le kóm kem dumu tau.
23Yóm tau mò nmò sal gel wen gutahen,
okóm yóm tau olon beyen stulón yó se mit du élél.
24Yóm kun kendengen yóm tau hulung hedem duhen yó se yóm ofolen,
okóm yóm tau book olon tótól bè yóm kbooken.
25Yóm tau gel tmifù yóm tahu hegewaen kem dumu tau,
okóm yóm tau gel tmifù kéng hfatayen kem dumu tau.
26Yóm tau kmikò ke Dwata wen gónón smalig
ne hyu knóen, dalang se yó kem ngaen.
27Yóm klikò tau ke Dwata gónó le tendo lemowil
anì gkogol le yó kem nmò mit kul e lem hatay.
28Yóm tau hol geta tendo mobung tauhen tey megdóyón,
okóm ke tendo mtón tauhen laen kô gónón e kól.
29Yóm tau là mahilen lembut tey hulung temnef,
okóm yóm tau sunget mahil gemsalà.
30Yóm tau menek kehedemen hyu klówóhen,
okóm yóm klenget tau hengoken lem tiolen.
31Yóm tau hen-gnoken yóm tau élél, tnondohen yóm Dwata deng tehe mò du,
okóm yóm tau knoduhen yóm tau élél, megdóyón béléen Dwata.
32Lemwót bè yóm sidek nmoen gónón meglà yóm tau gel mò sidek,
okóm yóm tau tedeng kmoen wen gónón e mlo bè katayen.
33Yóm khulung hedem tódô henek lem but blutut yóm tau hulung temnef,
okóm yóm tau book là kô tngónen du kun.
34Yóm htótól du yóm benwu bong duhen yóm ktedeng kmò kem tau nô du,
okóm salà hemyak yó kem tauhen.
35Tey hligal yóm tau hol geta bè kehyu kmò yó kem tau smugung béléen,
okóm tey sidek kebuten du yó kem tau mò yóm gónón myak.
Currently Selected:
Kem Udél Hlalak Tehe Selumun 14: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
