Kem Udél Hlalak Tehe Selumun 12
12
1Yóm tau móyô hnau nóyóen yóm ketngón,
okóm yóm tau kenbéen yóm kbólów du, book.
2Yóm tau hyu kmoen gwahen yóm kehyu nawa Dwata ebéléen,
okóm yóm tau matul mò sidek tnuled Dwata.
3Là kóen mdengen ktauhen yóm tau gel mò sidek,
okóm yóm tau tedeng kmoen laen kô tul keskibolen yóm kun kehdolil.
4Hegdóyónen ne hefligalen tuha logihen yóm libun hyu kmoen,
okóm yóm libun henyaken tuha logihen lómón ke gel hengoken lem tiolen.
5Yó kem atul yó kem tau tedeng kmò le hono tedeng,
okóm yó kem tau gel mò sidek yóm kul udél hlalak hono sukat.
6Lemwót bè yóm ktifù le kéng yó kem tau gel mò sidek gónó le gemhatay tau,
okóm yóm kul udél yó kem tau tedeng kmò le fen lemwà kul.
7Gotu le meglà ne là kô wen bud sfu le yó kem tau gel mò sidek,
okóm yó kem tau tedeng kmò le laen kô sónen yóm kul sfu.
8Gel megdóyón yóm tau bè yóm kun khulung hedem,
okóm yóm tau là temnù kehedemen són mò le semdekà du.
9Mom hyu he kun yóm tau glaan mowil bè kmoen nmò,
senta yóm tau tô hlingu tau hol geta bede élél ken.
10Yóm tau tedeng kmoen tilob kesegyoken yó kem ógófen,
okóm yóm tau gel mò sidek sidek kógófen.
11Sal gel wen kenen yóm tau gel mò nmò bè tonok,
okóm yóm tau gel nmungen yó kem atul laen dù muhen là hulungen hedem.
12Mom gebà yóm gónón tô heklung yóm tau gel mò sidek,
okóm yóm tau tedeng kmoen laen kô tul keskibolen yóm kun kehdolil.
13Gholot lemwót bè kun ksidek kudél yóm tau gel mò sidek,
okóm yóm tau tedeng kmoen gewà gu lem hlayam.
14Gsengel nawahen du yóm tau hyu ulék yóm kun gel udél
ne sal gel gutahen yóm ulék geblà bè yóm kun gel nmò.
15Yóm tau book bè kun kehedem du tedeng yóm kun kmò,
okóm yóm tau hulung hedem gel hnungolen yóm kehlau le du.
16Mahil dilô yóm kun kebut yóm tau book,
okóm yóm tau hulung milô, tódô kem bayaen ke wen tô hemyak du hekawang.
17Yóm tau gel mutóm yóm ktahuhen sal tahu ke wen tifuen,
okóm yóm tau tmifù kéng smukat nmoen.
18Yóm tau gel sidek kebkóhen tey gbeng lem dumu tau du,
okóm yóm kun udél yóm tau hulung hedem, hemyu nawa.
19Laen kô dù tul sónen yóm udél tahu,
okóm yóm udél kéng tek likóten.
20Són ksukat nô lem hendem le yó kem tau gel matul mò sidek,
okóm yó kem tau matul yóm hyu bè kem dumu le wen kligal le se kul.
21Yóm tau tedeng kmoen laen kat sidek sut béléen,
okóm yóm tau gel mò sidek tódô són moen meflayam.
22Tey keklit Dwata du yóm tau tmulón kéng,
okóm yóm tau gel tulónen yóm ktahuhen tey kligalen du.
23Yóm tau hulung milô là kô saluen du ketngónen,
okóm yóm tau book mom gfan bè kudélen yóm kbooken.
24Du baling gónó galak yóm tau mefesek,
okóm yóm tau lemfu olohen hgel mò yóm hmò kem dumu tau du.
25Gel blat nawa tau du yóm gel klóngón nawa,
okóm yóm udél hyu lemwót bè kem dumun, fen gel hemyu nawahen.
26Yóm tau tedeng kmoen nalaken yóm dumun bè ktedengen,
okóm yóm kun kmò yóm tau gel mò sidek, hetlasen kem dumu tau.
27Là kô gutahen du yóm nóyóen yóm tau lemfu,
okóm yóm tau mefesek gutahen yóm kimu mebtes.
28Yóm lan tau ebè yóm ktahà ktauhen duhen yóm ktedeng kmò,
okóm yóm ksigol kmò lan tau e lem hatay.
Currently Selected:
Kem Udél Hlalak Tehe Selumun 12: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
