Kem Udél Hlalak Tehe Selumun 13
13
1Yóm logi hulung hedem hnungolen
yóm hlau maen du,
okóm yóm tau sedekà là kóen hmungol bólów.
2Sal gel guta tau yóm kehyu ofol lemwót bè kehyu yóm kun udél,
okóm yóm tau là gsalig du són moen semgalu yóm khugusen.
3Nabungen klowilen yóm tau eles hendemen kudélen
ne yóm tau tódô óyóen bemkó yóm udél sidek hensideken knóen.
4Laen kô tul kgutahen du yóm nóyóen yóm tau lemfu,
okóm yóm tau mefesek gotu gutahen yóm gónón gsengel nawahen.
5Tey kenbéen yóm tulón kéng yóm tau tedeng kmoen,
okóm yóm tau gel mò sidek yóm kun udél hol tahu gónó myak.
6Yóm kemlung yóm tau laen dù belenen duhen yóm ktedengen,
okóm yóm sidek gel nmò yóm tau gemsalà yó se mit du meglà.
7Wen se tau hlingu tau mdengen okóm laen kô gónón ma
ne wen se tau hlingu tau élél okóm tey wen kendengenen.
8Lemwót bè kendengenen gónón gemsok knóen yóm tau ke wen tau gmaga du,
okóm yóm tau élél laen kô gmaga du.
9Yóm tau tedeng kmoen lómón ke layag mtataw knóngen,
okóm yóm tau gel mò sidek lómón ke solok móyón mlef.
10Yóm kehegmón tau gónón gel mbut yóm kesbólów,
okóm yóm tau hulung hedem gel móyô htolok.
11Tey mahil se kgotuhen yóm kendengen là gnayam du,
okóm yóm kendengen gnayam balù ket na udi kaem mból.
12Lebà nawahen yóm tau ke golun yóm sen-galu nawahen,
okóm sok dohò yóm hendeenen tey hyu nawahen.
13Hensidek le knô le yó kem tau gel semdekà yó kem hlau,
okóm yó kem tau lolò le yó kem hlau wen ofol le.
14Lenowilen kem dumu tau yóm kun tolok yóm tau hulung hedem,
anì gkogol le yó kem nmò mit kul e lem hatay.
15Yóm khulung tau temnef gónón gmuta yóm kadat tau du,
okóm yóm tau là gsalig du yóm kun lan mit du meglà.
16Sal na le eles hendem kdê nmò le yó kem tau hulung milô,
okóm yó kem tau book mom hegfan le yóm kbook le.
17Hnayamen kem dumu tau ke dókem mit tulón yóm tau gel mò sidek,
okóm yóm tau gsalig ke dókem mit tulón, heneken nawa tau.
18Baling élél ne henyaken knóen yóm tau là kenmónen yóm kehlau le du,
okóm yóm tau kenmónen yóm kbólów le du, megdóyón.
19Tey hligal yóm tau bè kdohò kgutahen du yóm hendeenen,
okóm yóm tau book tey kehegféten bè yóm nmò sidek.
20Baling hulung hedem se kun yóm tau tendo gel slomong yó kem tau hulung hedem,
okóm yóm tau gel dnumuhen yó kem tau book hensideken knóen.
21Són moen gel wen hlayam le yó kem tau gemsalà,
okóm yó kem tau tedeng kmò le, kehyu klowil yóm kul ofol.
22Yóm tau hyu kmoen gel tnebelen umun yó kem téméen,
okóm yóm kul kendengen yó kem tau gemsalà, nô bè yó kem tau tedeng kmò le.
23Tey hyu huluhen yóm tonok yóm tau élél hanà lomi kebà du,
okóm lemwót bè yóm là ktedeng nmò kem dumu tau fen heklanas du.
24Là kóen bong nawahem du yóm ngaem ke olom beyen móló mfes sok sidek nmoen,
okóm ke kenbong nawahem yóm ngaem tendo tnedengem anì gulit.
25Sal gel gsengel kkenen yóm tau tedeng kmoen,
okóm yóm tau gel mò sidek són moen bitil.
Currently Selected:
Kem Udél Hlalak Tehe Selumun 13: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
