Job 31
31
Kdà Job du yóm kun ktahu
1Yó bud udél Job, monen, “Deng wen safà mget nmou ebè Dwata, duhen yóm là ketngelu ebè libun ke wen iwolu du gu lem. 2Ke yó se tô nmou, tedu se angat gutahu bè yóm Dwata nô bè longit? Tedu se angat balaen do du yóm Dwata alì gembek? 3Bè yó kem tau là tedeng nmò le wen hlayam hwiten ebélê le. Gotu genlaen yó kem tau gel mò sidek. 4Béléu do, tódô ton Dwata se kdê yó kem gel nmou ne ket lafangu sal tonen.
5Deng wen kéng nmou kô bè dumu tau? Deng wen lanu tmondo kul kô? 6Dwata he hol tmimbang dou bè yóm timbang là kmulangen anì tonen yóm klaen du salà nmou. 7Ke deng senyatu yóm lan tedeng, duhen ke deng lolou yóm gel nóyô matahu, duhen ke deng wen dumu sidek gel nmò tdoku, 8hol kem dumu tau he fen muta du yó kem deng huluhu ne fen gotu kemdut du yóm kdê deng huluhu yó.
9Ke deng niwolu yehen kem dumuhu ne ke deng gel nangatu bè bak dólen yóm yehen yóm dumuhu sebét 10hol bud yehen dumu logi he yóm dou yehen ne bud wen dumu logi he semtungô du. 11Yóm miwol dumu libun hol salà gónó myak, hol salà gónó megtafak. 12Hol lómón ke wen tey dilóf ofi mit do elem lanaw ofi, gotu kenen yóm kdê nfunu.
13Ke deng tmalaw yóm sotu tau mò nmò béléu, logi duhen ke libun ne ke là gel hnungolu du yóm ktalawen yó, 14tedu se tô kmou du du ke denge mdà bè solu Dwata? Tedu se tô balau ke Dwata du ke bangen kmukum do? 15Abay se yóm Dwata tehe mifil do yó, bud du se tehe mifil du se kun yóm tau mò nmò béléu yó.
16Là deng wen gónóhu tmóbóng kul he kô yó kem tau élél? Ne yó kem libun bolu gel htóbóng béléu, là deng gel tnóbóngu kul he kô? 17Dalang se yó kem ngà hikit, là deng gel benlayu kul ken kô igou fen mken? 18Bè klawihu mowil gel tenwónu yó kem ngà hikit ne gel tnóbóngu yó kem libun bolu. 19Ke wen tau tonu sidek kélélen laen dù nesen 20sal gel dóyón le o bè yóm nes gel blayu kul, yóm nes mfól lemwót bè bul yó kem dou ubiha anì là bud le tnaw. 21Ke deng wen ngà hikit deng ndau elaan bè gónô skukum ne ke deng wen nwahu béléen, 22hol tfok he sigelu ne hol skó bè yóm abalu. 23Là gbeku mò du yóm yó lemwót bè yóm tey sidek klikou yóm tafak Dwata. Ke deng nmou yó kem yó, tô kmò kdau du bè solu yóm Dwata hol dandónen geta?
24Ke són snaligu yó kem kendengenu, duhen ke són yó gónón mgel nawahu 25ne ke yó buten yóm kligalu lemwót bè yóm kwen kendengenu ne lemwót bè yóm kdê nfunu, Dwata he hol tmafak do. 26Ne sotuhen, ke gel tenngelu yóm kdaw bè yóm tey nóngen, duhen ke tenngelu yóm bulón bè yóm tey klinggelen, 27ke deng nô bè nawahu tô mtud bukol tmaba ebélê le, duhen ke mlan bè keleku henmù bè yóm kadatu kul, 28ke yó nmou, hatay se kukumen abay se deng hnalau yóm Dwata nô bè longit.
29Ne sotuhen, ke tonu kegbà klowil yó kem hohonu, duhen ke wen dumu glumfak le, là gele hligal se do. 30Là kô deng wen salà sumóngu he ke tô hnayamu yóm hohonu yó. 31Tódô kdê yó kem tau mò nmò béléu, gotu tngón le yóm tey kehdufu yó kem dumu tau gel sut béléu. 32Sal gel tinoku ebè gónóu yó kem tau milo lemwót bè benwu mayuk, là kô naw e htungô kul bè lan. 33Ke deng wen salà bnosu lómón yóm gel nmò yó kem dumu tau ne ke là tulónu du yóm salau yó 34lemwót bè klikou yó kem dumu tau ne lemwót bè yóm klikou yóm khisik le do, duhen ke hebnose lem gónô bè yóm klikou yó, Dwata he hol tmafak do.
35Yake wen tau hol hmungol du dé nim monu ni. Smafae kaem hono tahu yóm kdê monu ni. Yó hem Dwata fen malà do yóm Dwata alì gembek. Hyu nawahu ke snulat yóm hohonu yó kem delemen do anì tonu. 36Kaem là kóe myak semfala du. Tey mebtes béléu yóm snulaten yó, lómón kebtesen yóm kuruna blówón. 37Ke deng tonu yóm delemen do yó, gotu tulónu du yóm kdê deng nmou ne laen kô dù kenyaku bè yóm kdau bè soluhen.
38Ke deng tehe tódô nledu bè yó kem tau hol mfun du yóm tonok gónóhu mò nmò, 39duhen ke deng kenu yóm hulu tmowok tahen ne là benlihu du ne ke deng hnatayu yó kem tau mfun du, 40hol hono kluon he ne kmungig tmowok ta yóm tonok yó mò tles yóm halay gel hulu tahen.”
Yó se són yóm udél Job.
Currently Selected:
Job 31: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
