Job 19
19
Kbalà Job ke Bildad
1Yó balà Job ke Bildad, monen, 2“Kmò kegenen de yóm tendo kudél ye sidek etahu ni? Kmò kegenen de yóm tendo ksolò ye dmelem do? 3Tódô ket kiwól ye hemyak dou ne là kô kenyak ye du mudél sidek etahu. 4Ne baluen se ke tahu deng wen salà nmou, dou nbô yóm yó sundu kuy du. 5Ilóem ofo kuy mon du ke yu hyu sentahu? Ofo kuy mon du ke ni gónón wen gfau lanu gemsalà bè Dwata? 6Kaem kun kehlan du Dwata nim gdek tahu ni. Deng wen holot nmoen mò aluhen do.
7Tey ktalawu du yóm sidek nmoen béléu ni, okóm là kô hnungolen do. Là kô blayen du do yóm kukum tedeng. 8Deng henseng Dwata béléu yóm lan anì là gehlóse. Deng hkifuhen yóm lanu. 9Deng gotu kóhen yóm tehe kadat le do yó kem tau ne deng genbaen ktauhu. 10Deng tódô keten kilil gónón hemsidek do ne tódô bayaen o matay. Yóm tô nefet nawahu gotu kenduten. Lómón kekdut koyu kmoen du. 11Tey sidek alì kebut Dwata do. Hol lómón kmoen do lómón ke hol hohonen ou. 12Tódô nundug le o yó kem sendaluen. Wen lan nmò le mò gemlà do. Tódô snibut le yóm gónóhu nô.
13Lemwót bè Dwata yóm but gónó le hlayuk béléu yó kem dumuhu setwoli. Ne yó kem tau dmilô dou hol lómón ke tauhe milo lem blóng le. 14Yó kem dumuhu ne yó kem hol weu là bud tngónem kul ne. 15Yó kem tau tehe gel tinoku bè gónóu deng klifót le o. Yó kem libun tóbóng lówóhu lem gónô, lómón kmò le ebéléu lómón ke tauhe milo ne lómón ke tólónge tau bélê le. 16Ke tnabahu yóm sotu tau mò nmò béléu là kô bnalaen do, baluen ke tey kehkoduhu béléen anì tnóbóngen o. 17Balù yehenu, là bud gbeken hembala du yóm tey ksidek boo lem baku ne balù yó kem hol dumuhu sulil-lem là kô le hloni ebéléu. 18Yó kem ngà tey khisik le do, tey keskuli le do ke ton le o. 19Yó kem hol dou dumu swè tey sidek ketngel le ebéléu. Ne yó kem hol tehe kenbong nawahu deng kenbê le o. 20Denge hono tiol ne ni. Tek udì duen gónów là matay.
21Yu se yó kem dou wè, hol knodu ye o. Deng dnofien o Dwata. 22Moen du ke alì hensidek ye o lómón yóm kun kehsidek do Dwata? Là dengen teflok he kô yóm kudél ye sidek etahu?
23Hol hendéméu dé ke wen tau hemtulón du nawa ni kem udélu nii ne gotu snulaten lu bè bok. 24Duhen ke hdanà snulat le lu bè botu anì là lanahen efet kól bè sónen.
25Okóm béléu do, deng eles tngónu du wen nô bè longit angat mfi do ne bè hol sónen angat mdà dini talak tonok yóm mfi do yó. 26Baluen ke gotu sidek yóm lówóhu yóm kmoen ni, ewenem angat bud tonu he Dwata. Ne bè yóm ktonu du bud wen lomi lówóhu. 27Tódô hol dou mata yóm angat mton du yóm mfi do yó, sundu mata dumu tau du. Tey kehdéméu du yóm kfihen do.#19:27 Bè kehedem Jobdu, yóm mfi du bè hol són kdaw yóm angat tmulón du bè yó kem tau dmelem du yóm klaen du salaen.
28Kihol ye tendo solò dmelem do yóm kmon ye du, ‘Kun salà se yó.’ 29Ke yó se udél ye, eles hetgamahu kuy olo ye hegtafak knô ye. Omin ye yó he temngón du wen sotu fen kmukum.”
Là gomongen bè nili yóm tsaptér 20 kól bè tsaptér 30.
Yó tulónen bè tsaptér 20 yóm gewu dulék Sufar mudél ebè Job ne bè tsaptér 21 yóm bud kbalà Job du.
Yó tulónen bè tsaptér 22 yóm getlu dulék Ilifas bud mudél ebè Job ne bè tsaptér 23 ne 24 yóm bud kbalà Job du.
Yó tulónen bè tsaptér 25 yóm getlu dulék Bildad mudél ebè Job ne bè tsaptér 26 yóm bud kbalà Job du.
Yó tulónen bè tsaptér 27 efet kól bè tsaptér 30 yóm hol són udél Job ebè yó kem ween.
Currently Selected:
Job 19: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
