Job 32
32
Yóm udél Ilihu ebè Job
1Lemwót bè yóm tendo kmon Job du laen dù salaen, yó gónó le deng tódô tmakas mudél ebéléen yóm tlu kem ween.
2Okóm wen sotu tau nô bè yó boluyen Ilihu ne là bud gafasen du ne yóm kebuten lemwót bè yóm kehtedeng Job knóen ne lemwót bè yóm ksel Job ke Dwata bè yóm tey gfaen. Nim Ilihu ni ngà Barakél ne semfu gu bè yóm tehe Bus ne lemwót bè kun ktol yóm tehe Ram. 3Bud lenbut Ilihu snéen yóm tlu kem wè Job lemwót bè yóm là khulung le malà ke Job. Lemwót bè yóm là khulung le malà du deng mom Dwata yóm hennulék le bè nim gfà Job. 4Lemwót bè yóm ketwoli Ilihu, yó gónón tódô hmungol se kun efet gotu deng kudél yóm tlu kem wè Job. 5Timbow ton Ilihu yóm là khulung le malà ke Job yó kem ween, yó gónón lembut ne tódô mudél, monen,
6“Twolihe bélê ye se do ne tóe likò tmulón du kuy yóm dou nô lem hendem, yakà twogu ye sentahu. 7Yó hendemu, hyu se ke yu fen mudél yakà yu du yóm deng tmuha, abay se nô bè yó kem tau deng tmuha yóm khulung hedem. 8Okóm bè ktahuhen, yóm khulung tau hedem kaem lemwót bè yóm Tulus yóm Dwata alì gembek. 9Là kóen na a lemwót bè deng ktuha tau. Ne là se lemwóten bè deng ktuha le yóm khulung le dmilô du yóm tedeng. 10Duhen ni, hol hnungol ye o na tulón kuy yóm dou hol nô lem hendem.
11Bè yóm igò ye mudél tey khungolu se dou, hnungolu yóm kbalà ye ke Job. Ne nangatu yóm udél gónón gfan yóm khulung ye mudél. 12Tey keheklinguhu du yóm mon ye, okóm laen dù bélê ye gembek tmulón du ke wen gónón là tódô yóm udél Job ne là gbek ye malà du yóm udélen. 13Bê ye abay mon mò do, ‘Temngón senta me se kun ke Job. Tek són Dwata gembek malà du.’ 14Ke yó dum ebéléu yóm gónón e mudél Job, kaem là kô yó du balau du yóm kuy deng balà du. 15Ó Job, ngem tódô le yem laen dù bud balà le kóm. 16Tódóe mangat ne kô igò le là bud mudél se kul? Ngem tódô le mdà bè yó laen dù bud udél le. 17Là hyuhen ke tódóe yem se dou ke là bnalau kóm na tulón kóm yóm dou nô lem hendem. 18Là gbeku du ke là mudéle. Là bud gbeku mafas yó kem tô monu. 19Ke là mudéle, lómón kegnómu du lómón ke gbà kfuhu, lómón yóm sning kulit btù ke tolo kmodok yóm ninum nô lemen. 20Là gbeku du ke là mudéle. 21Laen dù nfihu bè nim keskuya ye ni ne laen se dù saluu. 22Là hulunge smalù se dou. Ke yó tô nmou, kaem tódô kendel tnafak Dwata o.
Currently Selected:
Job 32: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
