2 Bok Kem Tau Hol Geta 5
5
Kehkó Ilaysa yóm des Naaman
1Yó boluy yóm kmandér bè yó kem sendalù yóm tau hol geta bè Aram, duhen Naaman. Nim tau ni tey bong boluyen, ne tey nadat yóm tau hol geta bè Aram, abay se lemwót béléen gónó Dwata hegmò yó kem sendalù Aram bè yó kem hohon le. Tey hulung mit sfatay, bede deng mom gemnóm des mifù.
2Bè yóm sotu tehe kundug le bè Israél yó kem sendalù Aram, wen sotu ngà libun Israél negef le, ne baling tóbóng lówó yehen Naaman. 3Sotu kdaw, yó mon yóm ngà libun yó bè yóm amohen libun, “Ke yó dum mógów ebè yóm tugod Dwata nô bè Samarya yóm amohu, kaem hkóhen yóm des mifuen.”
4Tahu se, mógów ebè yóm tau hol geta Naaman, tulónen du yóm udél yóm ngà libun lemwót bè benwu Israél yó. 5Yó monen mò ke Naaman yóm tau hol geta bè Aram, “Mógówi etu sen ebè yóm tugod Dwata yó, ne hemwite sulat ebè yóm tau hol geta bè Israél anì tngónen u.”
Tahu se, lemwót Naaman, wen tlu latu fat folò kilu blówón bukay nwiten, ne hitu folò kilu tahu blówón, ne sfolò tengeb kem nes tiloben. 6Wen sulat nwiten ebè yóm tau hol geta bè Israél. Yó lem yóm sulat nwiten, monen, “Nim sulat ni mò gónóm temngón du nim Naaman ni, tau tóbóng lówóhu. Yake hkóhem yóm des mifuen.”
7Tikóng senfala yóm tau hol geta bè Israél yóm sulat yó, botong kenséen nesen lemwót bè alì sidek kegnómen du, yó udélen, monen, “Tum nahen hemwit udél ebéléu yóm tau hol geta ni anì hkóhu des mifù nim tau ni? Ilóem Dwatahe kô, wen kfasangu hlowil tau duhen ke hmatay tau? Là hyuhen nim nmoen ni, tô mebel lan anì wen gónó me seglius.”
8Okóm timbow gungol Ilaysa yóm tau Dwata, yóm deng keksê yóm tau hol geta du yóm nesen, yó gónón hemwit udél ebéléen, monen, “Moen du ke kenséem nesem? Hógówem edini yóm tau yó, tódô tngónen he wen tahu tugod Dwata bè ni bè Israél.”
9Tahu se, lemwót Naaman wen kem kudà mit klitun tók nwiten, ne htengen mdà bè bak dól gónô Ilaysa. 10Timbow ton Ilaysa Naaman, ominen mdók yóm sotu tau tóbóng lówóhen anì tulónen ke Naaman, monen, “Holi mógów etu bè Él Jurdan nam e dyo ditu hitu dulék anì mkó yóm des mifuem, ne angat bud hyu kulitem.”
11Okóm mom lembut Naaman, tódô lemwót, monen, “Ofo do ke hewà ebéléu, ne mni béléu bè yóm Dwatahen, ne ke diwelen sigelen eta yóm desu anì mkó yóm des mifuu. 12Igoen yó he yó kem él bè Damaskus, yóm Él Abana ne Él Farfar, tey hyu senta yó kem kdéen él bè Israél. Tumù nawaw dyo ditu anì mkó yóm desu.” Duhen yó, tódô lemwót Naaman, ne tey kebuten.
13Okóm stulón le du yó kem tóbóng lówóhen, mon le mò du, “Ó Sér, ke wen mgel hmoen kóm yóm tugod Dwata, tódô nmoem. Ne ni, moem là dyo du, lómón yóm deng monen anì mkó yóm desem.” 14Tahu se, mógów ebè Él Jurdan Naaman, ne hitu duléken lemneb lówóhen ditu, lómón yóm deng hloloen du yóm tau Dwata, ne tódô gotu mimot mkó se yóm desen. Yóm kuliten, hol lómón ke kulit ngà.
15Omin Naaman bud semfulék ebè Ilaysa, mung du yó kem kdê tauhen. Tódô mdà bè solu Ilaysa, ne monen mò du, “Deng hol tngónu ne, laen dù dumu dwata bè klamangen benwu, tek són yóm Dwata yó kem tau Israél. Yó gónóm mon, Sér, hol henmóyóem dou nim basahu kóm.”
16Okóm yó balà Ilaysa du, monen, “Mlan bè boluy yóm Dwata là matayen, yóm dou tendo nimón, là kô henmóyóu du yóm basahem do yó.” Tey kubug Naaman du anì henmóyóen yóm basahen du, okóm là kô nwa Ilaysa du.
17Omin Naaman bud mon du, “Ke là henmóyóem du se nim basahu kóm ni, olohem bemlay dou tonok dé lemwót bè nim benwu ni yóm kóyów lulón le mulék yó kem lewu kudà asnuhu. Lenwóten bè ni ne, là bude demsù ne là bude hkekeb ógóf bè yó kem dwata kéng, tek són bè yóm hol tahu Dwata. 18Okóm Dwata he hol hmifót dou bè yóm sotu gel nmou bè yóm gel kmungu yóm amohu bè yóm gel kógówen ebè gónô yóm kun dwata lennged boluyen Rimun, ne tmaba ebéléen igoen mogot bè sigelu, ne tódóe mung bè yóm ktuden uyóhen bè seel. Bè yóm nmou yó, Dwata he hol hmifót dou.”
19Yó mon Ilaysa, “Dwata he henek nawam.” Omin Naaman lemwót. Là dengen hol mayuk he lan Naaman, 20yó hendem Gihasi, yóm tau tóbóng lówó Ilaysa, “Tódô kem hewóten Naaman yóm tau lemwót bè Aram, yóm amohu là kô dog henmóyóen du yóm tô blayen du. Mlan bè boluy yóm Dwata là matayen na ktes dé anì wen nwahu béléen.” 21Tahu se, lemwót Gihasi, ktesen Naaman.
Tikóng ton Naaman yóm tau kemtes huli du, ominen kmó ta klitunen nan e senlong, ne snólóken, “Laen dù sidek gefet bélê ye kô?” 22Mon Gihasi se, “Là, dóken o yóm amohu, abay se lomi ni koni gdek béléen yóm lewu kem tugod Dwata lemwót bè yó kem ngà bulul bè Ifraim, ne kóyóen ke benlayem lu tlu folò fat kilu blówón bukay ne lewu sukub nes.”
23Mon Naaman se, “Yake nem folò wolu kilu blówón bukay dé blayu kóm.” Tey kubug Naaman ke Gihasi anì henmóyóen yóm filak yó, hyu suen lem yóm lewu bag, mung du yóm lewu tengeb nes. Blayen bè yó kem tóbóng lówóhen anì lu fen mit du tukô gna ke Gihasi. 24Tikóng le kól bè yóm bulul udì gónó Ilaysa nô, nwa Gihasi yóm lewu bag, ne nwiten elem gónóen. Ominen hulék yó kem tóbóng lówó Naaman.
25Omin Gihasi bud husek elem gónô Ilaysa, ne mdà bè soluhen. Snólók Ilaysa, “Gónóm gu de Gihasi?”
Bnalà Gihasi se, monen, “Laen dù gónów gu, Sér?”
26Okóm yó mon Ilaysa mò du, “Ilóem là tngónem du kô yóm knóu béléem bè yó bè yóm kekmó Naaman ta klitunen nan e keslong kóm? Sundu ni du yóm kdaw kehmóyô filak ne nes ne gónó hmulu koyu ulib ne gónó mulu grép, duhen ke kehmóyô ubiha ne safì ne kem tóbóng lówó. 27Lemwót bè nim nmoem ni, mili ebéléem ne bè yó kem sfuhem yóm des Naaman, ne laen dù sónen yóm kegnóm ye du.” Ominen lemwót Gihasi, tódô gnómen se yóm des Naaman, ne tódô bukay kuliten.
Currently Selected:
2 Bok Kem Tau Hol Geta 5: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
