2 Bok Kem Tau Hol Geta 6
6
Kebtangen elem él yóm bak beyung
1Sotu kdaw, yó mon le mò ke Ilaysa yó kem tugod Dwata gel galak béléen, “Tonem kô nim gónó tekuy stifun ni, tey udì bélê tekuy. 2Yake hógówem mi ebè Él Jurdan anì mofok me koyu ditu yóm ket kum na sotu mò ngom gónô tekuy, hemdà me gónô ditu mò gónó tekuy stifun.”
Mon Ilaysa se, “Yó sen.”
3Ominen mudél yóm sotu bélê le, monen, “Ke hyu béléem, mungi kum dé.”
Mon Ilaysa se, “Yó ne, munge kuy.”
4Tahu se, mung kul. Timbow le kól bè Jurdan, nbut le se mofok koyu. 5Okóm tikóng mofok koyu yóm sotu bélê le, tódô lemsò bak beyungen ne tódô btang etlem él. Botong lemangat, monen, “Wóyô, Sér, igou mdóm du yóm beyung tu.”
6Ominen smólók du yóm tau Dwata, “Gónón seblà btang du?” Timbow toloken du yóm gónón seblà btang, omin Ilaysa kemleng ngà koyu udì, ne tudaen elem él bè yóm gónón seblà btang, ne tódô hetówen eta se yóm bak beyung. 7Yó mon Ilaysa mò du, “Géhél nwahem.” Tahu se, hgong yóm tau yó, nwahen yóm bak beyung.
Ksukat Ilaysa yó kem sendalù Aram
8Bè yóm kwiten sgida bè Israél yóm tau hol geta bè Aram, yó nmoen hmungol udél bè yó kem genlalen, ominen bud mélék du yóm benwu gónó le kmamfù.
9Okóm tódô kendel hemwit udél Ilaysa ebè yóm tau hol geta bè Israél, monen, “Hol bê ye abay mlan bè yóm sotu benwu yóó, abay se angat le nô bè yó yó kem sendalù Aram.” 10Tahu se, lemwót yóm tau hol geta bè Israél, bud hemwit udél ebè yó kem tau menwu bè yóm benwu deng tulón Ilaysa du anì eles le temgama. Deng dê dulék Ilaysa ne gel mò du bélê le yóm lómónen ni.
11Lemwót bè nim nmò Ilaysa ni, tey sidek kebut yóm tau hol geta bè Aram. Gotu htabahen yó kem genlalen, yó monen mò kul, “Tmau du bélê ye deng tmifù? Tmau du se tmulón du bè tau hol geta bè Israél yóm atulu?”
12Ominen mudél yóm sotu bè yó kem genlalen, monen, “Là mi du, Sér. Kaem Ilaysa yóm tugod Dwata bè Israél, fen tmulón du bè tau hol geta yóm kdê udélem. Balù yóm udél lifutem ditu bè gónóm tungô, gotu tulónen.”
13Omin yóm tau hol geta mdók, monen, “Géhél ye lemwót, hol hnebel ye gónó Ilaysa nô anì hekfóu.”
Ne wen tmulón du bè yóm tau hol geta, “Bê Dutan gónó Ilaysa nô.” 14Duhen yó, sotu kifu bè yó, tey kem sendalù wen hwit yóm tau hol geta bè Aram, mung kul yó kem kudà demyol klitun tók anì na le e snibut yóm benwu yó. 15Timbow hlafus btik yóm tau tóbóng lówó Ilaysa ne mógów ebè lewà, tódô tonen yó kem tey sendalù wen, mung kul yó kem kudà demyol klitun tók, deng gotu snibut le yóm benwu yó.
Yó monen mò ke Ilaysa yóm tau tóbóng lówóhen, “Étey Sér, kmò te ni du?”
16Bnalà Ilaysa se, monen, “Béi hlikò, yó kem mofin kut, bong le wen senta yó kem mung bélê le.” 17Omin Ilaysa mni bè Dwata, monen, “Ó Dwata, hol htonem bè yóm tau tóbóng lówóhu yó kem mofin kum.” Tahu se, hton Dwata du, ne tódô tonen se yó kem bulul hmilol kul deng tódô tfeng kudà ne klitun tók hono ofi.
18Yóm igò le hemlel mundug yó kem sendalù Aram, bud mni bè Dwata Ilaysa, monen, “Ó Dwata, hol hbutóem lu.” Tahu se, bnalà Dwata yóm hni Ilaysa, gotu hbutóen lu. 19Omin Ilaysa hewà ne monen mò kul, “Tólóng nim gónó ye e gsut ni. Sundu ni du yóm syudad nundug ye. Lolò ye o, nwitu yu ebè yóm tau hnebel ye.” Tahu se, nwiten lu ebè Samarya. 20Bè yóm kusek le bè Samarya, bud mni bè Dwata Ilaysa, monen, “Ó Dwata, ni bud htonem lu.” Tahu se, bud htón Dwata lu, ne tódô ton le deng le nô lem Samarya.
21Timbow tonen lu yóm tau hol geta bè Israél, ominen smólók ke Ilaysa, monen, “Ó mà, hnatayu lu ne kô?”
22Bnalà Ilaysa se, monen, “Bê, béem hnatay lu. Ilóem tô hnatayem yóm tau deng gekfô bè gida? Là gi. Benlay ye lu ken dé, ne hinum ye lu, omin ye hulék kul ebè tum tau hol geta bélê le.”
23Tahu se, tey ken bong hmò yóm tau hol geta bè Israél mò hkenen kul. Tikóng deng kken le, ominen hulék kul ebè yóm tau hol geta bélê le bè Aram. Kogolen bè yó, là bud le mundug ebè benwu Israél ne yó kem tau Aram.
Kundug Bin-hadad ebè Samarya
24Tikóng deng legen udì bè yó, lemwót Bin-hadad yóm tau hol geta bè Aram, gotu sentifunen kdê yó kem sendaluen na le e nundug syudad Samarya ne kmamfù le hilolen. 25Yó uléken yóm kekamfù le yó, mbel yóm tey bitil bong lem Samarya, ngangen balù yóm kulu kudà asnu, sana kebli le du wolu folò botù blówón bukay, ne balù yóm sotu tegayan yóm sotu kay kê obun gel benli le, bentes le limu botù blówón bukay.
26Sotu kdaw, yóm igò yóm tau hol geta bè Israél mógów ta yóm beng syudaden, wen sotu libun tmaba du, monen, “Ó Sér, hol tnóbóngem o dé.”
27Bnalà yóm tau hol geta se, monen, “Ke là tnóbóng Dwata kóm, tedu se tô gmou du? Laen dù ken duhen ke tifas grép mò blayu kóm.” 28Okóm bud snólók yóm tau hol geta, “Moen de?”
Bnalà yóm libun yó, monen, “Nim libun nii, sotu kdaw monen mò do, ‘Ken te yóm kóm ngà kemdaw ni, haya bud ken te yóm dou ngà.’ 29Tahu se, tnógó me yóm dou ngà, ne ken me. Hayahen bè yó, monu mò du, ‘Hnatayem ne yóm kóm ngà anì wen ken te.’ Okóm deng mom bnosen yóm kun ngà.”
30Timbow gungol yóm tau hol geta yóm tulón yóm libun yó, botong kenséen nesen lemwót bè yóm alì ksidek kegnómen du. Yóm igoen mógów ta yóm beng hmilol yóm syudad, maan kton le du yó kem tau yóm knesen sakù fi lem yóm tahu nesen. 31Yó udél yóm tau hol geta, monen, “Dwata he hol hmatay do ke là heklengu du kulu Ilaysa ngà Safat nim kemdaw ni.”
32Lemwót yóm tau hol geta wen tau hógówen ebè Ilaysa. Tolo nô bè gónóen Ilaysa, mung seyón stulón bè yó kem tau malak bè Israél. Okóm gu laanen là deng sut yóm tau dók yóm tau hol geta yó, yó udél Ilaysa ebè yó kem tau malak, monen, “Yóm sotu tau monok, deng wen tau hógówen mò kemleng liholu. Ke sut yóm tau yó, hol tnikeb ye bak dól, bê ye abay hfusek, abay se huli du yóm tau hol geta.”
33Yóm igò Ilaysa tolo stulón kul, sut se yóm tau hol geta. Yó monen mò ke Ilaysa, “Nim hlayam nô ta tekuy ni, kaem lemwót bè Dwata. Moen se ke tô nangatu yóm tóbóng lemwót gu bè Dwata?”
Currently Selected:
2 Bok Kem Tau Hol Geta 6: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
