2 Bok Kem Tau Hol Geta 4
4
Któbóng Ilaysa yóm sotu libun bolu
1Sotu kdaw, wen sotu libun bolu mógów ebè Ilaysa. Yóm yehenen tehe sotu bè yóm lumbuk yó kem tau tugod Dwata. Yó monen mò ke Ilaysa yóm libun bolu yó, “Deng matay yehenu yóm sotu tau tóbóng lówóhem. Deng tngónem se yóm tey klikoen ke Dwata. Okóm ni, sut yóm tau tehe gónón mutóng filak, ne tô nwahen yóm lewu kem ngà me mò heseken.”
2Snólók Ilaysa, “Tedu se tóbóngu kóm du? Tulónem do kun, boluyen yóm nô béléem bè gónóem?”
Bnalà yóm libun yó, monen, “Laen duen, tek són yóm sotu sobuy hnolo ulib.”
3Yó bud mon Ilaysa mò du, “Mógówi ebè yó kem dumum sebét, mdómi bélê le sobuy laen dù lem le balù kihu kwenen. 4Ominem husek elem gónóem, mung kóm yó kem ngaem logi ne tnikeb ye beng. Nwahem yóm sobuy hnolohem, ominem mlem yó kem sobuy ndómem. Ke deng hnok yóm sotu, htólóng ye.”
5Tahu se, nmò yóm libun bolu yó yóm hmò Ilaysa du, ominen husek elem gónóen mung du yó kem ngaen logi ne tnikeben bengen. Lemwót yó kem ngaen logi, nwit le ebéléen yó kem sobuy ndóm le laen dù lemen. Yó nmò yóm libun, nwahen yóm sobuy hnolohen, ne nlemen yó kem sobuy nwit le ebéléen yó. 6Tikóng deng gotu klem le kul yó kem sobuy yó, yó mon yóm libun bolu mò yóm sotu ngaen, “Budi mit do sobuy edini.”
Okóm yó balà ngaen du, monen, “Laen duen ne.” Ominen tódô teflok kolo yóm hnolo.
7Ominen mógów ebè Ilaysa yóm libun bolu yó, ne yó mon Ilaysa mò du, “Gotu hbaluem lu ne yó kem hnolo ulib anì gbayadem yó kem utóngem, ne yóm filak dù tebel béléem mò lowil ye yó kem ngaem.”
Ilaysa ne yóm libun boi bè benwu Suném
8Sotu kdaw, lemwót Ilaysa mógów ebè Suném yóm benwu gónón nô yóm sotu libun boi. Lemwót yóm boi yó tinoken Ilaysa mken bè gónóen. Lenwóten bè yó ne, ket kógów Ilaysa ebè Suném gel slob mken bè gónô yóm libun boi yó.
9Sotu kdaw, yó mon yóm boi yó mò ke yehenen, “Tódô tngónu nim tau tendo slob bélê te ni, du se tau Dwata laen dù belenen. 10Yake mò te béléen dfél ditu te ketef mò gónón tungô,#4:10 Yóm kul kmò gónô yó kem tau Israél honò botu, bede datal ketefen mò gónó le hnos. ne nmò te lemisahen ne bangkuen ne wen soloken anì yó ke gel slob bè ni, wen gónón tungô.”
11Sotu kdaw bè yó, bud mógów ebè Suném Ilaysa ne bud slob bè yó, ne ditu ta bè yóm dfélen gónón hegnô. 12Yó mon Ilaysa mò ke Gihasi yóm tau tóbóng lówóhen, “Tulónem yóm libun boi móyóe stulón du.” Tahu se, bè yóm kkólen bè yó yóm libun yó, 13yó mon Ilaysa mò ke Gihasi, “Tulónem du yóm tey kehyu nawa te bè yóm deng nmoen bélê te ni. Snólókem béléen dé ke wen hmoen kut mò balà te du, monem mò du, wen udél hwitem kum kô ebè yóm tau hol geta, duhen ke bè yó kem kmandér bè yó kem sendalù?”
Okóm yó balaen du yóm libun boi yó, monen, “Là. Deng gsengel nawahu du ne yóm knóu bè ni mung bè yó kem dou fes lówó.”
14Bud snólók Ilaysa Gihasi, monen, “Tedu se tô nmou béléen du kun?”
Yó balà Gihasi ke Ilaysa, monen, “Deng tey tuha ne yóm tuha logihen, ne laen kô dù ngà le.”
15Yó bud mon Ilaysa mò ke Gihasi, “Bud hógówem edini.” Tahu se, mógów ebè yó yóm libun boi yó, mdà bè bak dól. 16Ne yó mon Ilaysa mò du, “Lómón ni kdaw halay hulin, angati smiwi ngà logi.”
Tey ketnga yóm libun yó, monen, “Là, Sér. Béem abay tnulón o kéng, tau Dwata.” 17Tahu se, là legenen bè yó mlutut yóm libun yó. Bè yóm halay hulin, mngà logi, tódô tahu e du yóm deng mon Ilaysa.
18Tikóng deng bong yóm ngà logi yó, sotu kdaw ktesen maen etu bè gónó le mò hulu mung bè yó kem tau muta bélê le. 19Bè yóm kkólen ditu, tódô mkik ebè maen, monen, “Adéy mà, tey des kuluhu.”
Ne yó mon maen bè yóm sotu tau tóbóng lówóhen, “Etedem bè yéen nim ngà ni.”
20Tahu se, nwit yóm tau tóbóng lówó ebè yeen yóm ngà yó, ne ngang yéen smiwi du efet kól kemdaw, ne matay yóm ngà. 21Yó nmò yóm yéen, nwiten etu ta bè dfél yóm tau Dwata yóm ngà yó, hlasaen bè yó ta katri, ominen tmikeb yóm beng ne tnagaken. 22Ominen hemwit udél ebè tuha logihen, monen, “Hemwiti edini sotu tóbóng lówó ne sotu kudà asnu anì géhéle mógów ebè Ilaysa yóm tau Dwata. Kendele bud semfulék kdeng.”
23Yó monen mò du yóm tuha logihen, “Moen du ke hol kemdaw ni kógówem igoen sundu ni du yóm kdaw kehegnô, duhen ke kdaw kehligal bè yóm lomi bulón?”
Okóm yó balaen ke tuha logihen, monen, “Kihu se.” 24Ominen semyà yóm kudà asnu yóm libun boi yó, ne yó monen mò yóm tau tóbóng lówóhen, “Hol hesloem hógów du yóm kudà asnu, béem hganag ke là monu du mò kóm.”
25Tahu se, kewót le bè yó mógów le etu bè Bulul Karmél bè yóm tau Dwata. Bè yóm igoen tolo mayuk yóm libun yó, ton yóm tau Dwata. Yó mon Ilaysa mò ke Gihasi yóm tau tóbóng lówóhen, “Tenngelem dé, mógów edini yóm libun lemwót bè Suném. 26Géhél senlongem, ne snólókem, ‘Laen dù tódô kóm kô? Laen dù tódô bè yehenem, duhen ke bè ngaem logi?’ ”
Ne yó balaen ke Gihasi, monen, “Laen duen.”
27Okóm bè yóm kkólen bè yóm tau Dwata ditu ta bulul, tódô hegluduk bè solu Ilaysa ne nogoten tihen. Bè yóm kton Gihasi du yóm nmoen yó, tô tuluden. Okóm yó mon Ilaysa mò du, “Bayaem ne, abay se tey sidek kegnómen du, ne là deng tulón Dwata du do nim ni.”
28Yó monen mò ke Ilaysa yóm libun boi yó, “Ó Sér, uu se yóm deng mon du angate mngà logi. Ne ni deng tey gbulug nawahu.”
29Omin Ilaysa mon du mò ke Gihasi, “Hesloi etu, nwitem tugedu. Ke wen tau geslongem, béi mudél ebéléen, ne béem abay kenmón se ke wen tau kemlô kóm bè lan. Tódói hlós etu bè gónóen, hlasaem ta yóm ngà yóm tugedu.”
30Ne yó mon yóm yê yóm ngà yó, “Safau bè yóm Dwata là matayen ne bud safau bè yóm kóm klowil se kóm, là kóe mulék ke là mungi do.” Omin le lemwót yóm lewu le.
31Deng eles gna kun ke Gihasi. Bè yóm kkólen ditu, hlasaen ta uyó yóm ngà yóm tuged Ilaysa, okóm balù udì ke tô kemdol yóm ngà duhen ke tô mnawa. Omin Gihasi semfulék, senlongen Ilaysa ne monen mò du, “Là kóen btik yóm ngà.”
32Tikóng kól Ilaysa bè gónô yóm libun boi yó, tonen bè gónón tungô yóm ngà hlékê deng matay. 33Tódô hlós elemen, ne tnikeben yóm bak dól ne mni ebè Dwata. 34Omin Ilaysa lemokob ta yóm ngà, yóm sumóngen kofien bè sumóng yóm ngà, ne yóm matahen bud kofien bè mata yóm ngà, dalang se yóm tdoken bud kofien bè tdok yóm ngà. Yóm igoen lemokob ta yóm ngà yó, nbuten se kini lówó yóm ngà. 35Omin Ilaysa mdà, mógów gu lem yóm dfél, ne ominen bud lemokob ta yóm ngà. Tódô bnón yóm ngà, botong hitu duléken, ne ominen temngel.
36Omin Ilaysa tmaba ke Gihasi, monen, “Tnabahem yéen nim ngà ni.” Tahu se, tnabahen. Tikóng kól bè yó yóm yê yóm ngà yó, yó mon Ilaysa mò du, “Ni, nwahem ngaem.” 37Tódô hegluduk bè ti Ilaysa, tuden uyóhen bè seel. Ominen mà yóm ngaen ne lemwót.
Yóm hentaw ton nmò Ilaysa igoen mbel bitil bong
38Timbow mulék ebè Gilgal Ilaysa, tódô glohen yóm tey bitil bong bè yó. Yóm igò le myón bè soluhen yó kem lumbuk tugod Dwata, yó mon Ilaysa mò yóm tau tóbóng lówóhen, “Suem ta kótóng yóm kuleng bong, tmógóhi sóbów bè ni kem tugod Dwata nii.”
39Wen sotu bè yó kem tugod Dwata yó mógów ebè gónó le mò hulu nan mebel lemnaw. Wen tonen hulu lemfà, ominen ma bunguhen, ne nwiten mulék yóm gbeken. Bè yóm kkólen ta, heneken, ominen mbol du bè yóm sóbów tnógó le, okóm là kô tngónen du boluyen yóm nwahen yó. 40Tikóng tógó, omin le mólól du bè yó kem tau. Okóm bè yóm igò le mken du, botong le lemangat, mon le, “Tau Dwata, milu kuy du nim tnógó le ni.” Ne là kô hlós ken le du.
41Yó mon Ilaysa mò yóm tau tóbóng lówóhen, “Mahi do arina.” Tahu se, ma. Omin Ilaysa mkok du elem yóm sóbów yó koni, ne monen mò yóm tau tóbóng lówóhen, “Nólólem bélê le anì ken le.” Ne tahu se, tódô ken le, ne là bud le milu du.
42Sotu kdaw, wen tau lemwót bè Baal-salisa mógów ebè yóm tau Dwata yó, ne wen nwiten ebéléen lewu folò mambang tahà lemwót bè yóm halay barli tanay nutahen, ne wen usok yóm halay barli yó nwiten snéen. Yó mon Ilaysa mò yóm tau tóbóng lówóhen, “Blayem yóm lumbuk tugod Dwata nim ni anì wen ken le.”
43Okóm yó mon yóm tóbóng lówóhen, “Kmò kkóyów kólólu du bè yóm lematu kem tau nim ni?”
Yó bud mon Ilaysa, “Blayem yó kem tau mò ken le, yakà deng mon Dwata du, ‘Angat le mken ne wen lukasen.’ ” 44Tahu se, blayen yó kem tugod Dwata ne ken le, ne wen lukasen, tódô uliten bè yóm deng mon Dwata hlanen bè Ilaysa.
Currently Selected:
2 Bok Kem Tau Hol Geta 4: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
