2 Bok Kem Tau Hol Geta 21
21
Là gomongen bè nili yóm tsaptér 21. Yó tulónen bè nim tsaptér ni yóm kogot Manasi ngà Hisikaya yóm benwu Juda. Hanà sfolò lewu he halayen bè yóm kbuten mogot du, ne yó kegenen mogot benwu botong limu folò limu halay. Nmoen se kun yóm là hyuhen bè kton Dwata du, loloen yóm sidek alì nmò yó kem tau tehe gna menwu bè yó. Deng mom hemdà yó kem gónó demsù ebè yó kem dwata kéng bè lósól yóm Gónô Dwata. Balù kun ngà botong gbeken hkekeb du ebè dwata kéng. Lelen yó he, hdà lem Gónô Dwata yóm ilô yó kem dwata kéng, ne nalaken yó kem tau bè Juda tmaba ebè yó kem dwata kéng yó.
Yó gónóm mon, ni se udél Dwata bè 21:11-13, yóm Dwata yó kem tau Israél, monen,
11“Deng nmò Manasi yóm tau hol geta bè Juda yó kem nmò alì kenbê, nmoen yóm alì sidek senta yó kem sidek tehe nmò yó kem tau Amurayt, yó kem tau tehe gna nô ta nim tonok ni gu laanu là deng bemlay du bè yó kem tau Israél. Deng niten tmaba ebè dwata kéng yó kem tau bè Juda.
12Duhen ni, ni se udél yóm Dwata yó kem tau Israél, Angat wen tey hlayam hwitu ebè Jirusalim ne ebè Juda, ne ket tau mungol du yóm hlayam yó, angat tey sidek klikoen.
13Genbau Jirusalim lómón kegbau syudad Samarya. Gotu genlau yó kem tauhen lómón keglau yó kem fes lówó Ahab. Lómón kmou du, lómón ke molobe huyów, ominu hmokob du.”
Timbow matay Manasi, yó bud tles tau hol geta bè Juda, duhen yóm ngaen Amon. Loloen se kun yó kem sidek nmò maen efet hnatay yó kem tau tóbóng lówóhen bè gónô bongen. Okóm bud wen kem tau hmatay kul se kul yó kem tau hmatay ke Amon yó. Ne yó bud tles tau hol geta bè Juda, duhen yóm ngaen Jusaya.
Currently Selected:
2 Bok Kem Tau Hol Geta 21: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
