2 Bok Kem Tau Hol Geta 20
20
Kkó des Hisikaya
1Bè yóm kdaw yó, gemnóm des Hisikaya, ne tey leed yóm desen, ne yó gónón tô matay. Nauy Isaya yóm tugod Dwata ngà Amus, ne yó monen mò du, “Ni se udél Dwata ebéléem, Elesi tmebel udél lem gónóem, yakà angati matay, là buden mkó desem.”
2Bè yóm kungol Hisikaya du nim ni, ominen beklil ebè beng ne mni ebè Dwata, 3monen, “Ó Dwata, hol hentulónem nawa yóm klawihu mowil, lemwót lem but blututu yóm klolou kóm ne yóm kmou du yó kem gónóm hligal.” Ne tódô btù dlumu Hisikaya.
4Bè yóm kulék Isaya, gu laanen là deng gemsóól yóm lósól yóm gónô bong, wen udél Dwata ebéléen, monen, 5“Budi semfulék ebè Hisikaya, yóm tau malak yó kem dou tau. Tulónem du, ‘Ni se udél Dwata ebéléem yóm Dwata tehe fuem Dabid. Deng gungolu yóm hnihem, ne deng tonu yóm lewokem. Hkóhu yóm desem. Tlu ni angati btik ne budi mógów ebè Gónô Dwata. 6Ne bud tennuu sfolò limu halay he klowilem. Ne lenwau uu lem hólól yóm tau hol geta bè Asirya dalang se nim syudad ni. Nofinu nim syudad ni lemwót bè yóm kbong nawa me du lewu me Dabid.’ ”
7Omin Isaya mdók yó kem tóbóng lówó Hisikaya, monen mò kul, “Lenumang ye yóm bungu fig deng muna yóm hisahen.” Tahu se, nmò le, ne bud mulék hyu kegnóm Hisikaya du.
8Snólók Hisikaya Isaya, “Tedu se ilô Dwata du ke angat mkó yóm desu, ne ke tlu ni angate bud mógów ebè Gónô Dwata.”
9Yó mon Isaya mò du, “Ni se ilô lemwót bè Dwata mò gónóm hemtahu du kdohoen yóm deng fasaden kóm. Bè yóm gónóm gel temngel ilô kdaw bè lósólem, mahil du nélékem, móyói kô ke yóm olung bè yóm ilô kdaw ke mógów kmulu sfolò bangen duhen ke mógów hudul sfolò bangen?”#20:9 Bè yóm kun kdaw Hisikaya, yóm kmò yóm gónó le gel temngel kógów kdaw, lómón tô bang slikan yóm kmoen, wen gónó le hdà du bè gónón gnóng kdaw talak lósól le. Yóm bang slikan yó, wen ilô sù le du ne tódô loloen olung kógów yóm kdaw. Bè yó gónó le temngón du yóm uras.
10Bnalà Hisikaya, monen, “Mahil ke senflósen mógów kmulu. Yake hógów hudul dé.” 11Omin Isaya mni bè Dwata, ne mógów hudul sfolò bangen yóm olung kdaw bè yóm ilô kdaw tehe hmò Ahas.
Yó kem tau hógów yóm tau hol geta bè Babilun ebè Hisikaya
12Bè yóm kdaw yó, gungol yóm ngà yóm tau hol geta bè Babilun boluyen Mirudak-baladan yóm alì kleed des Hisikaya. Yó gónón wen kem tau hógówen mò henwiten sulat ne basa. 13Tey kehduf Hisikaya kul yó kem tau yó, gotu toloken kul yóm kdê nô lem yóm gónón gel hemyu kimu legen alì mebtes, kem tahu blówón ne kem blówón bukay, kdê kem kay som, ne kem hnolo alì tilob boohen, ne yó kem ngomen sfatay. Tódô kdê yó kem kimu mebtes nô bè gónóen ne bè yóm benwu nogoten, gotu toloken kul, laen dù bnosen bélê le.
14Lemwót Isaya yóm tugod Dwata mógów ebè Hisikaya, snólóken béléen, “Tedu se henduf le yó kem tau yó? Ne gónó le gu lemwót?”
Bnalà Hisikaya, monen, “Tey mayuk yóm gónó le gu lemwót bè Babilun.”
15Yó bud snólók yóm tugod Dwata, “Tedu se ton le lem gónóem du?”
Bnalà Hisikaya, monen, “Gotu ton le yóm kdê nô lem gónô bongu, laen dù bè yóm kdê kendengenu ke là gotu toloku du kul.”
16Omin Isaya mon du mò ke Hisikaya, “Hnungolem yóm udél Dwata ebéléem. 17Angat kól yóm kdawen, yóm kdê nô lem gónô bongem, ne yóm kdê kendengenem deng tehe henyu yó kem fuem, angat gotu negef le etu bè Babilun. Laen kô dù tebel, mon Dwata. 18Angat wen bè yó kem lugodem angat negef le, ne angat le baling tau kafun bè gónô bong yóm tau hol geta bè Babilun.”
19Omin Hisikaya mon du mò ke Isaya, “Hyu yóm udél Dwata tulónem.” Okóm yó hendem Hisikaya, “Kihu se, syan ke wen kenek kbenwu bè yóm igou tolo mowil.”
20Yó kem dumu deng gendeng Hisikaya bè yóm igoen mogot benwu, yóm tey kfasangen, ne yóm kmoen busung él, ne yóm kmò kholohen du elem syudad yóm él yó, deng gotu snulat bè yóm bok boluyen Tutul yó kem Tau Geta bè Juda. 21Timbow matay Hisikaya, yó bud tles tau hol geta, duhen yóm ngaen boluyen Manasi.
Currently Selected:
2 Bok Kem Tau Hol Geta 20: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
