2 Bok Kem Tau Hol Geta 22

Kogot Jusaya yóm benwu Juda

1Yóm kbut Jusaya kmamal bè Juda, hanà wolu he halayen. Yó kegenen mogot du, botong tlu folò sotu halay, ne bè Jirusalim gónóhen nô. Yó boluy yéen, Jidida ngà Adaya lemwót bè benwu Buskat. 2Bè ket nmò Jusaya, tey tedeng kton Dwata du, ne tendo loloen yóm tehe kun kmò yóm tehe fuen Dabid, sal loloen yóm tedeng.

3Bè yóm gesfoloen wolu halay deng kogot Jusaya benwu, hógówen ebè Gónô Dwata yóm tau fen gel smulat béléen boluyen Syafan ngà Asalaya, témê Misulam, monen mò du, 4“Mógówi etu bè Hilkaya yóm geta bè yó kem tau gel blóng ebè Dwata. Hsóhem du yóm kdê filak deng nwit yó kem tau ebè Gónô Dwata, yóm gel sentifun yó kem tau blóng ebè Dwata gel mentey bè bak tikeben. 5Tulónem du, blayen yóm filak yó bè yó kem tau deng gónón gsigang yóm bud ketlob yóm Gónô Dwata anì lu smukéy yó kem tau bud temlob du, 6duhen yó kem tau wen kenhulung le bè koyu ne yó kem tau hulung semsyón botu. Yó mu le du dumuhen yóm filak yó mò bli le koyu ne kem botu kenleng mò tloben. 7Yó kem tau gónón gsigang yóm filak yó, laen dù mu tekuy mni du bélê le lista yóm filak deng nô lem hólól le, abay se tey le gsalig.”

Kton Hilkaya yóm Bok Hlau

8Tahu se, lemwót Syafan yóm tau fen gel smulat, mógów ebè Hilkaya yóm tau gel blóng ebè Dwata. Yó mon Hilkaya mò ke Syafan, “Deng tonu yóm Bok Hlau lem Gónô Dwata.” Omin Hilkaya bemlay du ke Syafan yóm bok yó ne senfala Syafan.

9Omin Syafan bud semfulék ebè yóm tau hol geta, ne monen mò du, “Deng gotu sulék nwa yó kem genlalem yóm filak deng sentifun le bè Gónô Dwata, ne deng blay le bè yó kem tau deng gónón gsigang yóm bud ketlob le du.” 10Bud tulón Syafan yóm tau hol geta, monen, “Wen bok blay Hilkaya do, yóm tau gel blóng ebè Dwata.” Ne hgel Syafan semfala du bè yó bè solu yóm tau hol geta yóm bok yó.

11Timbow gungol yóm tau hol geta yóm udél nô lem yóm Bok Hlau yó, tódô gekséen nesen, botong ksidek kegnómen du. 12Ominen kendel mdók kul le Hilkaya yóm tau gel blóng ebè Dwata ne Ahikam ngà Syafan ne Akbor ngà Mikaya ne Syafan yóm tau fen gel smulat ne Asaya yóm tau gónón gel hmungol hlau, monen mò kul, 13“Lemwót ye do, snólók ye kum bè Dwata, ou ne yó kem tau ne yóm kdéen tau bè Juda yóm udél deng nô lem nim bok ton me ni. Tey sidek kebut Dwata tekuy, abay se là kô nimón kem fù tekuy du yóm udél deng snulat lem nim bok ni. Ne là se deng nmò tekuy du tedu mon yóm bok ni bélê tekuy.”

14Tahu se, lemwót le Hilkaya yóm tau gel blóng ebè Dwata, ne Ahikam ne Akbor ne Syafan ne Asaya, mógów le ebè yóm sotu tugod Dwata libun boluyen Hulda yehen Syalum ngà Tikba témê Harhas, menwu bè yóm lomi lebét Jirusalim. Yóm Syalum du fen gel mentey yóm gónó gel hemyu nes lem Gónô Dwata. 15Yó udélen ebélê le yóm libun yó, monen, “Ni se deng udél Dwata yóm Dwata yó kem tau Israél. Tulón ye yóm tau deng hógów kuy ebéléu, yó udél Dwata, monen, 16‘Angat genlau nim syudad ni gomong yó kem tau nô lemen, ulitu bè yóm deng tulónen lem yóm bok lomi senfala yóm tau hol geta bè Juda. 17Lemwót bè yóm deng ktebel le do yó kem tauhu, ne deng le tmaba ebè yó kem tólóng dwata lennged, kem dwata nmò tdok le, yó se gónóhu alì lembut kul. Lenbutu nim benwu ni, ne là kóen teflok yóm kebutu du.’

18Bong bè yó dum tau hol geta bè Juda deng hógów kuy na a smólók ke Dwata, tulón ye du, ‘Ni se udél Dwata yóm Dwata yó kem tau Israél gbak bè yóm udél lomi gungolem. 19Bè yóm kungolem du yóm udélu eta yóm syudad ni ne eta yó kem tau nô lemen, ne bè yóm kungolem yóm kehmulau yóm benwu ni anì laen dù bud tauhen, botongi hegsel ne heglaani béléu, botong gekséem nesem, lelem mkik bè yóm kehegselem. Duhen yó, deng gungolu se yóm knihem béléu, mon Dwata. 20Yó gónóm mon, bè yóm igoem tolo mowil, là tagad genlau du yóm syudad ni. Là kô tagad nmou du ke là dengi matay, ne ke là deng lebeng le kóm ne igoen tolo menek benwuhem. Là kô tonem du yóm kdê heglumfaku yóm benwu ni.’ ” Ni se udél Dwata hlanen bè yóm sotu tugoden boluyen Hulda, ne nwit le mulék nim udél ni ebè Jusaya yóm tau hol geta.

Currently Selected:

2 Bok Kem Tau Hol Geta 22: tbl

Highlight

Copy

Compare