2 Tutul Israél 8
8
Yóm kdê gendeng Selumun
(1 Bok Kem Tau Hol Geta 9:10-28)
1Bè yóm deng kdeng yóm lewu folò halay Selumun hefdà yóm Gónô Dwata, dalang se yóm kun gónô bong, 2ominen bud hefgulék hefdà yó kem syudad blayen du yóm tau hol geta boluyen Hiram ne wen kem tau suen bè yó. 3Bè yó kem kdaw yó, nundug Selumun yóm benwu Hamat-suba ne gleden. 4Bud hetlob hdaen snéen yóm benwu Tadmor nô bè yóm benwu laen hol wen tauhen, dalang se yó kem benwu bè Hamat bud hdaen mò gónón hemyu yó kem wen mu le du. 5Bud hbegel hdaen snéen yó kem syudad bè Bit-horon Fi Leged ne bè Bit-horon Fi Bwak, hefgulék hefdaen yó kem beng le ne hefbegelen yó kem bak tikeb le. 6Bud hetlob hefdaen snéen yóm syudad boluyen Baalat ne yó kem dumu syudad mò gónón hemyu yó kem wen mu le du, ne mò gónón hemsù yó kem klitun tók ne kem kudà. Yóm kdê nóyóen gotu hefdaen bè Jirusalim ne bè Libanun ne bè yó kem dumu benwu nogoten.
7Wen kem tau tolo nô bè benwu le sundu kem tau Israél du. Lu se yó kem dù tau Hitayt ne kem tau Amurayt ne kem tau Pirisayt ne kem tau Hibayt ne kem tau Jibusayt dù tebel bè yó, 8sfu yó kem dù tau kanan tehe là sulék genlà kem tau Israél kul. Yó kmò Selumun kul, danda hmoen lu nmò, ne efet nim kmoen ni sana tolo kmò le du. 9Okóm kul yó kem tau Israél, là danda hmoen kul nmò. Lu se nmoen kem sendalù, ne kem genlal bè yó kem sendalù, ne kem kmandér bè yó kem sendalù mit klitun tók, ne bè yó kem sendalù smakay kudà. 10Wen lewu latu limu folò bélê le nélék Selumun yóm tau hol geta, mò fen malak yóm kdê hmoen yó kem tau danda hmoen nmò.
11Omin Selumun hili ke yehenen yóm ngà Faro libun gu bè Syudad Dabid, hakaten ebè yóm gónô lomi hefdaen mò kun gónó nô. Abay se monen, “Là hyuhen ke nô bè gónô bong tehe Dabid se kun, yakà dengen tehe nô bè yó yóm Slungan Dwata, ne deng mólós yóm tehe gónón nô yó.”
12Omin Selumun hedsù yó kem dsù hkekeben ebè Dwata ta yóm gónó demsù deng hdaen bè yó bè solu yóm Gónô Dwata. 13Loloen yóm tehe hedsù Musis kul bè yóm Kdaw Kehegnô, ne bè yóm kdaw ksut lomi bulón, ne bè yóm tlu gel hnigal le ket halay, duhen yóm Kehligal bè Kdaw Khius, ne Kehligal muta ne Kehligal bè Slung. 14Yóm hmò Selumun yó kem tau gel blóng ebè Dwata, tódô loloen yóm deng hlolò maen du. Yó hmoen yó kem dumu sfu Libay, lu fen halaken yó kem tau dmóyón ke Dwata, ne bud lu gel tmóbóng yó kem tau gel blóng ebè Dwata bè yóm gel nmò le bè yó bè Gónô Dwata ket kdaw. Dalang se yó kem tau gel mentey bè ket bak tikeb yóm Gónô Dwata, nólólen lu bè bung le, loloen yóm deng hlolò maen du yóm tau Dwata. 15Laen kô dù nulé Selumun du yóm kdê nmò deng hlolò Dabid yó kem tau gel blóng ebè Dwata ne yó kem sfu Libay, balù yóm nmò bè yóm gónó le gel hemyu kimu bè Gónô Dwata, gotu loloen.
16Deng tódô gotu deng ne yóm kehmò Selumun du yóm Gónô Dwata hefdaen, lenwóten bè yóm kdaw tehe kehefdaen yóm begelen efet kól bè yóm kdaw deng kdeng yóm kdéen.
17Omin Selumun mógów etu bè kilil Mohin Hulô bè yó kem benwu snakuf Idom, Isiyun-gébér ne Ilat. 18Wen kem kafal hwit Hiram ebéléen, ne hmungen bè yó kem kafal yó snéen yó kem tauhen deng kemnalam mit kul. Mógów le ebè Ufir mung kul yó kem tau Selumun. Bè yóm bud kulék le, tey tahu blówón nwit le ebè Selumun, botong móyón tô sfolò hitu libu kiluhen.
Currently Selected:
2 Tutul Israél 8: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
