2 Tutul Israél 9
9
Kauyen ke Selumun yóm Libun Boi lemwót bè Siba
(1 Bok Kem Tau Hol Geta 10:1-13)
1Timbow gungol yóm libun boi bè benwu Siba yóm tey któtól Selumun, yó gónón mógów ebè Jirusalim anì tilów snólóken béléen yó kem tey sólók mgel. Tey dê tóbóng lówóhen mung du, ne wen tey kamél nwit le lemulón yóm kdê kay som, ne tahu blówón, ne yó kem botu sminang alì mebtes. Tikóng le ston Selumun, gotu snólóken bè Selumun yóm kdê nô lem hendemen. 2Gotu bnalà Selumun béléen se yóm kdê snólóken yó, balù udì ke tô mgel béléen malà du. 3Timbow getnef yóm boi bè Siba yóm khulung Selumun hedem ne tonen se yóm gónô bong hdaen, 4tey ketngahen botong hbongen knawahen. Ne bud tenngahen yó kem tey dê kay ken kay le eta yó kem lemisa Selumun. Bud tnga snéen yóm ktonen yóm ktilob kekdol yó kem genlal bè yó, ne yóm ktilob knes le, dalang se yóm kul knes yó kem tau gel mkay bélê le ninum. Bud sidek ketngahen snéen bè yóm tey dsù gel hkekeb Selumun bè Gónô Dwata.
5Botong monen mò ke Selumun, “Tey tahu yóm kdê deng gungolu bè dou benwu gbak bè yóm deng nmoem ne bè yóm khulungem hedem. 6Okóm là kô hentahuhu du yóm gel tulón le yó efet yóm kógówu edini, ne deng tódô dou mata se hol mton du yóm kdéen. Bè ktahuhen, yóm deng gungolu là kô deng gsóólen du he. Yóm alì khulungem hedem bong senta yóm deng tulón le dou. 7Ya tey kligal le kul yó kem kóm tau. Tey kehyu nawa le kul yó kem genlalem tendo nô klohokem ket kdaw ne hmungol du yóm udél hyu lemwót bè khulungem hedem. 8Hol megdóyón Dwata yóm sana kóm Dwata hol gónó mogot. Deng hegfanen yóm tey kehyu nawan ebéléem bè yóm kehbalingen kóm tau hol geta bè Israél. Hlanen béléem yóm kogoten kul. Lemwót bè yóm klaen dù sónen yóm kbong nawa Dwata yó kem tau Israél, nóyóen ke laen dù sónen yóm kogoten kul, nmoen uu mò tau hol geta bélê le anì wen kukum tedeng lem blóng le.”
9Omin yóm libun boi bè Siba bemlay du ke Selumun yó kem basa nwiten. Botong mukas fat libu kilu keblaten yóm tahu blówón blayen, ne tey wen he yóm dê kay som deng hékéng le, ne yó kem tey dê botu sminang alì mebtes. Yóm kwen yóm som blayen du yó, là kô deng hnikót lómónen du yó he kwen yóm som alì hyu deng blay le ke Selumun.
10(Bè kegdek yó kem tau Hiram ne yó kem tau Selumun mit kafal gel lemulón tahu blówón gu bè Ofir, bud wen he kem koyu alì mebtes boluyen almug lulón le, dalang se yó kem tey botu sminang alì mebtes. 11Yó mu Selumun du yóm koyu almug alì mebtes yó mò slikan yóm Gónô Dwata dalang se yóm kun gónô bong. Ne bud wen se nwahen hmoen yó kem gel kenbit yó kem tau hulung kembit. Yóm nmò le ni, ni he kton le du bè Juda yóm alì ktiloben yó kem gel kenbit le.)
12Tódô gotu blay Selumun yóm libun boi lemwót bè Siba yó yóm kdê hnihen, ne tey mebtes yó kem basa Selumun du senta yóm kun basa du yóm boi bè Siba yó. Ominen yó mulék ebè benwuhen bè Siba yóm boi yó, mung du yóm kdê tóbóng lówóhen.
Yó kem kendengen Selumun
(1 Bok Kem Tau Hol Geta 10:4-25)
13Bè ket halay tey wen tahu blówón gel guta Selumun, udì duen gónón là gefet bè lewu folò limu libu kilu. 14Lelen yó he wen kem bwis gel gutahen bè yó kem tau gel hembalù, ne bè yó kem tau gel mò udél swa. Ne bud wen tahu blówón ne blówón bukay gel gutahen lemwót bè yó kem tau hol geta bè benwu Arab, ne dalang se bè yó kem gubérnor bè benwu Israél.
15Botong lewu latu klung lembang hmò Selumun, ne ket klung sal mukas hitu kilu keblat yóm tahu blówón lafin le tahen. 16Ominen bud hmò tlu latu klung lemnek, ne ket sotu wen dô lewu kilu keblat tahu blówón lafin le tahen. Nim kdê klung hmoen ni, gotu suen bè yóm sotu Gónô Bongen boluy le du Dlag Libanun.#9:16 Yó gónó le moluy du Dlag Libanun yóm gónô bong yó, abay se wen tey hehek stodol sbalà bè yóm lan ebè yóm gónô bong yó. Yó kem hehek stodol yó, nmò le bè koyu sidar lemwót bè Libanun.
17Ne bud hmoen se yóm bangkù alì bong mò gónón myón kmamal lemwót bè uluk nihi ilifanti ne alì mebtes. Hyu lenafinen tahu blówón. 18Yóm gónó myón kmamal hmoen yó, nem slikanen, ne wen gónón hemsù tihen hono lenafin tahu blówón mogot edu. Ne bè sfatà kilil yóm gónó myón kmamal yó, wen mò gónón hmasà sigelen, ne wen lennged liyun mdà sbalà du. 19Ne bud wen sfolò lewu lennged liyun hmò Selumun, ket sotu mdà sfatà kilil yóm gónó mdà bè yóm aut slikan yó. Yóm bangkù gónón myón kmamal yó, laen kô dù gemsenged du bè klamangen benwu.
20Yóm kdê tegayan gónón gel minum Selumun yóm tau hol geta, tódô hono tahu blówón. Ne kdê yó kem ngom ken nô lem yóm Gónô Bongen boluy le du Dlag Libanun, bud hono tahu blówón snéen. Laen dù blówón bukayen, abay se bè yóm tehe kun kdaw Selumun, là mebtesen yóm blówón bukay.
21Hyu wen yó kem kafalen mò mit udél swa ebè dumu benwu, ne kem tau Hiram fen mit kul. Ket tlu halayen omin le bud gel mulék yó kem kafalen yó, wen lulón le tahu blówón, ne blówón bukay, ne yóm uluk nihi ilifanti, ne yóm sotu kay yó kem iwas lembang, ne yóm onuk tilob alì mebtes boluyen pikak.
22Duhen yó, nim Selumun tau hol geta ni, laen kô dù dumu tau hol geta talak tonok ke gemsenged du yóm tey kwen kendengenen ne yóm tey khulungen hedem. 23Tódô kdê yó kem tau hol geta lemwót bè ket benwu mógów ebéléen na a hmungol du yóm tey kehulung hedem deng blay Dwata du. 24Yó kem tau gel mógów ebéléen ket halay, sal wen basa le du blówón bukay, ne tahu blówón, ne kem nes, ne yó kem ngom sfatay, ne yó kem dê kay som, ne kem kudà, ne yó kem kudà asnu gotu basa le du.
25Botong fat libu kukub ógóf hmò Selumun, kukub yó kem kudà demyol klitun tók ne mò gónón hemsù yó kem klitun. Ne bud wen sfolò lewu libu he kem dumu kudà gel nit ebè gida suen bè yó kem tey syudad wen deng hetfingen mò gónón hemsù kul, ne bud wen se suen bè benwuhen bè Jirusalim anì moni béléen. 26Gotu gomong knamal Selumun yó kem tau hol geta lenwóten bè Él Yufratis fi dmata kdaw efet kól bè kilil benwu Idyip fi leged. 27Bè yóm kun kogot Selumun, yóm blówón bukay bè Jirusalim hol lómó kwen le botu. Ne yóm koyu sidar alì mebtes, hol lómó kwen le yó kem koyu sikamor mteg bè but bulul bè Juda. 28Yó kem kudà Selumun, lemwót le gu bè benwu Idyip ne gu bè yóm tey dê dumu benwu.
Yóm kogot Selumun benwu
(1 Bok Kem Tau Hol Geta 11:41-43)
29Yóm kdê dumu deng gendeng Selumun bè yóm klawihen kmamal benwu lenwóten bè buten efet kól bè sónen, deng nô lem yóm Bok Snulat Natan yóm Tugod Dwata, ne bè yóm sotu Bok Snulat Ahidya yóm tau lemwót bè Silu. Ne bud snulat bè yóm bok boluyen, Yóm Kdê Deng Hton Dwata ke Ido, yóm tau wen tulónen gbak bè klowil Jirubuam ngà Nibat. 30Yó kegen Selumun nô bè Jirusalim kmamal klamangen Israél, botong fat folò halayen. 31Tikóng matay, lebeng le bè syudad maen Dabid. Yóm ngaen Rihubuam bud tles tau hol geta.
Currently Selected:
2 Tutul Israél 9: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
