2 Tutul Israél 7
7
Kehfun Selumun du ke Dwata yóm Gónóen
(1 Bok Kem Tau Hol Geta 8:62-66)
1Timbow deng kni Selumun bè Dwata, tódô wen ofi mkal lemwót gu bè longit, gotu kenen yóm dsù hkekeb le ebè Dwata, ne yó kem dumu dsù le ebéléen, ne tódô tfengen lem yóm Gónô Dwata yó yóm tey keslinang Dwata. 2Yó kem tau gel blóng ebè Dwata, là kô le gusek elem yóm Gónô Dwata, abay se tódô tfeng keslinang Dwata lem yóm kun Gónô. 3Timbow ton yó kem tau Israél yóm ofi mkal lemwót gu bè longit yó, ne tódô tfengen lem yóm Gónô Dwata yóm tey keslinang Dwata, tódô le gotu lemfen bè tonok, tmaba le ebè Dwata, mung du yóm kdóyón le du, mon le,
“Tey hyu yóm Dwata, yóm kun kbong nawa là kóen monol ne laen kô dù tul sónen.”
4Ominen wen hedsù yóm tau hol geta ebè Dwata dalang se yóm kdéen tau Israél. 5Botong lewu folò lewu libu safì hedsù Selumun yóm tau hol geta, ne bud lematu lewu folò libu ubihahen. Duhen yó, lemwót Selumun yóm tau hol geta ne kdê yó kem tau Israél, hfun le ebè Dwata yóm Gónóen yó. 6Lemwót yó kem tau gel blóng ebè Dwata, mdà le bè yóm gónó le hdà kul lem Gónô Dwata, senged se yó kem sfu Libay, semngal le, mon le, “Yóm là konol yóm kbong nawan, laen kô dù tul sónen.” Yóm kesngal le yó, hmung le bè yó kem nuni tehe hmò Dabid yóm tau hol geta, bè yóm gel kdóyónen ke Dwata. Mdà sbalà yó kem sfu Libay yó kem tau gel blóng ebè Dwata fen mféw yóm igò le mdà bè yó se yóm kdéen tau Israél.
7Omin Selumun bud hfun du ebè Dwata snéen yóm hol gónón sóól yóm lósól bè solu yóm Gónô Dwata, anì bè yó gónó le demsù yóm dsù gel hkekeb le, dalang se yóm abù yóm ógóf gel hkekeb le mò mit sefyu bè Dwata. Yó gónón mò du yóm yó, abay se yóm gónó demsù tembaga hmoen, là kóyówen tahen yóm kdê dsù gel hkekeb le, ne yó kem halay gel blay le ebè Dwata, dalang se yóm abù ógóf gel hkekeb le.
8Bè yóm kmoen yó, nmò Selumun ne yóm kdéen tau Israél yóm Kehligal bè Slung, hitu kdaw le hmigal du. Tey tau wen sbung ebè yó lemwót bè kdéen ból Israél, kem tau lemwót bè Lebo-hamat hol fi debwak efet kól bè El Idyip hol fi leged. 9Tikóng bè gwoluhen kdaw, bud le sbung mò són yóm kestifun le, abay se deng hitu kdaw le hmigal du yóm kehfun le du ebè Dwata yóm gónó demsù ebéléen ne bud hitu kdaw le se hmigal du yóm Kehligal bè Slung. 10Bè yóm gewuhen folò tlu kdaw bè yóm ghituhen bulón, gotu hulék Selumun lu ebè benwu le yó kem tau. Ya tey kehligal le yóm kdê le lemwót bè yóm alì kehyu nmò Dwata bè tehe Dabid ne bè Selumun, dalang se bè yó kem kun tau Israél.
Kbalà Dwata ke Selumun
(1 Bok Kem Tau Hol Geta 9:1-9)
11Duhen yó, deng gotu deng kehdà Selumun du yóm Gónô Dwata ne yóm kun gónô bong. Deng gotu deng yóm kdê nóyô hmoen. 12Omin Dwata hegfan béléen bè yóm kifu yó, ne monen mò du, “Deng gotu gungolu yóm knihem béléu. Deng néléku yóm Gónô ni mò gónó ye gel demsù ebéléu. 13Ke wen kdawu là hkulón du, duhen ke dóku kem tlangas mò mken kem hulu ye, duhen ke wen des mit hatay hwitu elem blóng ye, 14ke mni le béléu yó kem tau mit du yóm dou boluy, ne ke heglaan le béléu, ne ke hnebel le ou, ne ke knogol le yó kem sidek gel nmò le, hnungolu lu gu ditu bè longit, ne hnifótu yó kem salà le, bud hetbasu yóm tonok le. 15Tendo knudungu yóm Gónô ni, hnungolu yóm kdê hni le bè yóm Gónô ni. 16Yakà deng néléku du yóm Gónô ni, ne deng hetfingu anì laen dù tul sónen yóm kwiten du yóm dou boluy. Angat tendo tnanudu ne eles tendo nô du nawahu.
17Ke béléem kóm, ke hol loloem ou lómón yóm tehe kun klolò dou maem, ne ke tendo nimónem yó kem dou hlau ne yó kem dumu dou hlolò kóm, 18angat laen dù tul sónen yóm khogotu du yó kem lugodem yóm benwu Israél, yakà ni du se deng tehe fasadu ke maem Dabid bè yóm kmonu du mò du, ‘Là kóen skas tendo kesetles le kmamal bè Israél yó kem lugodem.’
19Okóm ke knogolem ou, ne ke là nimón ye du yó kem dou hlau kuy ne yó kem dumu dou hlolò kuy, ne ke tmaba ye ebè yó kem dwata kéng, 20angat hdóhu yó kem tau Israél bè yóm tonok deng tehe blayu kul. Angat kenbéu snéen yóm Gónóu ni, balù yóm deng kfunu du mò mit yóm dou boluy. Angat henbalingu mò sendekà yó kem tau bè dumu benwu. 21Balù yóm tey keklóónen yóm Gónóu ni, kaem angat hegbau, baling sidek kton le du yó kem tau mlan bè yó. Angat tey sidek ketnga le, mon le, ‘Moen ni du ke alì hensidek Dwata yóm tonoken ne yóm Gónóen?’ 22Yó angat balà kem tau du, mon le, ‘Abay se deng knogol le Dwata yó kem kun tau yóm sana kul Dwata hol gónó mogot yó kem tehe fù le, yóm Dwata deng hewà kul gu bè Idyip. Deng le mom beklil ebè yó kem dwata kéng, lel le tmaba ebélê le. Yó se gónó Dwata mò du bélê le nim tey glumfàk le ni.’ ”
Currently Selected:
2 Tutul Israél 7: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
