1 Tutul Israél 14
14
Kehefdà Dabid gónô bongen
1Lemwót Hiram yóm tau hol geta bè Tayal, wen kem tau hógówen ebè Dabid, hmungen kul yó kem tau hulung hemdà gónô, ne kem tau hulung semsodò botu anì hdà le yóm gónô bong hefdà Dabid. Wen tey kem koyu sidar mò nmò le kfal nwit le ebè Dabid. 2Ne bè yó ne gónó Dabid hol temngón du Dwata yóm deng hembaling du tau hol geta bè yóm benwu Israél, ne hembegel yóm kogoten benwu mò lanen tmóbóng yó kem kun tau Israél.
3Bè yóm knô Dabid bè Jirusalim, bud wen kem yehenen bè yó, ne bud wen kem ngaen logi ne kem ngaen libun. 4Ni se boluy yó kem ngaen logi sut bè Jirusalim, Simya, Subab, Natan, Selumun, 5Ibhar, Ilisuwa, Ilpilit, 6Nuga, Néfég, Jafiya, 7Ilisama, Ilyada ne Ilifilit.
Kegmò Dabid bè yó kem Flistin
8Timbow gungol yó kem Flistin yóm deng kbaling Dabid tau hol geta bè klamang Israél, gotu sentifun le yóm kdê sendalù le anì kenfô le. Okóm wen tmulón du ke Dabid yóm tô nmò le yó, ne yó gónó Dabid semtifun du yó kem sendaluen na le e nundug senlong lu. 9Bè yóm kegdek yó kem Flistin bè datal Rifaim, gotu negef le kimu yó kem tau bè yó. 10Duhen yó, snólók Dabid Dwata, monen, “Mite sfatay bè yó kem Flistin kô? Hegmoem ou bélê le kô?”
Yó balà Dwata du, monen, “El, miti sfatay bélê le, hegmou uu bélê le.”
11Tahu se, kewót le Dabid bè yó ne yó kem sendaluen, mógów le ebè Baal-pirasim, ne bè yó gónó le gemmò bè yó kem Flistin. Yó udél Dabid, monen, “Dwata se deng mò du nim ni hlanen béléu. Yóm kmoen kul hol lómón ke mekto hesloben kul yóm tey dunuk.” Duhen yó, yó gónó le moluy du Baal-pirasim yóm benwu yó. (Yó lanen, “mekto heslob Dwata.”) 12Tódô gotu gtebel yó kem Flistin bè yó, yó kem dwata lennged le, ne tódô gotu htem Dabid lu.
13Okóm kogolen bè yó, bud le mulék yó kem Flistin, bud wen negef le bè yóm datal yó. 14Ne bud snólók Dabid Dwata ke tedu nmoen. Yó balà Dwata du, monen, “Bê ye nundug lu bè yóm seblà gónó le e smolu. Yó nmò ye, hlós ye etu fi bè kwang le, omin ye mundug kul bè sfatà yó kem koyu balsam. 15Ke gungol ye yóm lómón uni lafang ta yó kem koyu balsam yó, tódô kento nundug ye lu. Yóm gungol ye yó, yó se ilóen denge tukô gna kuy naw e genlà yó kem Flistin.” 16Tahu se, nmò Dabid yóm hlolò Dwata du, ngangen kemtes hmatay kul yó kem sendalù Flistin lenwóten bè Gibyun efet kól etu bè Gisur.
17Yóm tey któtól Dabid bè yóm gel nmoen yó, botong gefet bè klamangen. Lemwót bè Dwata se gónó le gotu likò ke Dabid yó kem dumu tau bè yó kem benwu hmilol kul.
Currently Selected:
1 Tutul Israél 14: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
