1 Tutul Israél 13
13
Tô kili le du ebè Jirusalim yóm Slungan Dwata
1Yó nmò Dabid, gotu sentifunen yóm kdê tau genlalen, gomong yó kem kmandér fen malak lemibu sendalù ne yó kem kfitan fen malak lematu sendalù anì smólók bélê le. 2Ominen heglalag du ebè kdê yó kem tau Israél deng stifun bè yó, monen mò kul, “Ke móyô ye, ne ke kun kóyô yóm sana Dwata hol gónó tekuy mogot, hemwit tekuy udél ebè kdê yó kem tau Israél, gomong yó kem tau gel blóng ebè Dwata ne yó kem sfu Libay nô bè yóm kul benwu ne nô bè yó kem gónó le gel hótób ógóf. Tinok tekuy lu anì mung le bélê tekuy. 3Bud nwit tekuy mulék yóm Slungan Dwata, abay se bè yóm tehe kun kogot Sol là kô kenmón tekuy du.”
4Tahu se, gotu le móyô yóm kdéen tau stifun, abay se tngón le tey hyu ke nmò le nim ni. 5Duhen yó, gotu sentifun Dabid yó kem tau bè klamangen benwu Israél, lenwóten hol fi leged efet kól bè yóm hol fi bwak anì slomong le mangay yóm Slungan Dwata tolo nô bè Kiryat-dyirim. 6Gotu nwit Dabid lu etu bè Baala yóm benwu snakuf Juda (sotu boluy le du, Kiryat-dyirim) anì na le e nwa yóm Slungan Dwata, yóm bnoluy le Slungan yóm Dwata nô lem blóng yóm lewu kem lennged hógów Dwata boluyen sirubim, nô ta yóm Slungan Dwata. 7Yóm Slungan Dwata yó, nwa le bè gónô Abinadab, omin le lemulón du ta yóm klitun hanà lomi.#13:7 Yó kegenen deng nô bè gónô Abinadab yóm Slungan Dwata, botong wolu folò halayen. Yó fen mit du yóm klitun yó, Usa ne Ahiyu. 8Yó nmò Dabid ne yóm kdéen tau Israél, gotu le hligal bè solu Dwata, tódô hotu le gel le semngal ne huni yóm kdê gel nuni le, wen se kenbit le, ne wen se knokot le, ne wen se sentutuk le, ne wen se nféw le bè yóm igò le mógów.
9Tikóng le kól bè yóm gónón gel kmusu halay Nakon, tlokob yó kem safì mit klitun, ne tódô nogot Usa yóm Slungan Dwata anì là btangen. 10Ya tey kebut Dwata ke Usa lanen mogot yóm Slungan gónóhen nô, ne tódô hnatayen Usa bè yó bè soluhen. 11Ne tey kebut Dabid bè yóm alì kebut Dwata ke Usa yó, yóm tódô kekto khatayen du. Ne yó gónón moluy du Pérés-usa yóm benwu yó efet nim kmoen ni. (Yó lanen, “matay mekto Usa.”)
12Bè yóm kdaw yó, tey sidek klikò Dabid ke Dwata, mon nawahen, “Tedu kmò kwitu du yóm Slungan Dwata anì ou fen semgifà du?” 13Yó hendemen là dog dohò nwiten du ebè yóm kun syudad bè Jirusalim ne yóm Slungan Dwata yó, mom nwiten ebè Gat bè gónô Ubid-idom. 14Botong tlu bulónen na nô bè gónô Ubid-idom yóm Slungan Dwata yó, ne tey któbóng Dwata ke Ubid-idom dalang se yóm kdê fes lówóhen.
Currently Selected:
1 Tutul Israél 13: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
