YO"EL 2

Pampingat tahiu Andau ain Tuhan je kareh dumah

1Keleh mahimon tarompet, pahiau auh tanda bahaya

intu bukit Sion je barasih, eka Hatalla melai.

Keleh hagenjeh, o oloh lewu Yuda!

Basa Andau ain Tuhan jari tokep tuntang bajeleng sampai.

2Andau te kaput tuntang kalam,

paham kabus hayak marindem.

Agas sangkalap dumah-dumaha

sama kilau baun andau je maniring arepe intu hunjun kare bukit.

Taloh je kilau te dia puji aton,

tuntang dia kareh manjadi tinai sampai katatahie.

3Sama kilau apui je manyeha tuntang mangehu

ewen mampalomos kakare taloh imbul.

Helo bara te, lewo te kilau Eden kabun ain Tuhan,

rahian tinai, sama kilau padang keang kamahau.

Jaton ije taloh en-en je batisa,

jaton ije je luput bara amok asang ewen te.

4 # Pang. 9:7-9 Ampin ewen sama kilau kuda;

darie sama kilau kuda intu padang eka kalahi.

5Ewen bara kajok intu tantan kare bukit gantong,

auhe mangandarat sama kilau auh karetan oloh parang

tuntang sama kilau kadarat apui je manyeha tampilai.

Ewen habaris sama kilau pasukan mamot-menteng

je tatap miar akan padang eka oloh kalahi.

6Katika ewen mantakan, uras kare oloh hagenjeh,

ampin kare oloh uras mucat tuntang baputi kalas.

7Sama kilau pangkalima, ewen mawi

tuntang mandai dinding sama kilau oloh paceh parang.

Ewen babaris bujur akan baun,

dia mahiwang atawa mobah haluan.

8Ewen dia hajuju sama arep ewen

intu jalan ayue-ayue.

Rami-rami ewen manelak kakare eka oloh manahan,

barisan ewen dia olih impatende.

9Ewen manyarang akan huang lewu,

tuntang dari-daria intu hunjun dinding.

Ewen mandai akan huang kare huma;

sama kilau maling ewen tame jalan baun sengok.

10 # Pang. 8:12 Metoh ewen miar, petak hagerek,

tuntang langit mahin hagenjeh.

Matanandau tuntang bulan palus kaput,

tuntang kalawan kare bintang nihau.

11 # Pang. 6:17 Auh Tuhan mangguntur manenga tanda,

akan kawan oloh parang Ayue.

Lalehan kapaham kare kawan oloh parang Ayue!

Lalehan kahain kaabas je malalus parentah!

Toto tamam tuntang andal Andau ije ain Tuhan!

Jaton ije oloh je olih manahan.

Auh pansanan mangat mangambuah pambelom

12 Tuhan hamauh, “Tapi toh keleh,

haluli manalih Aku hapan salepah atei,

sambil puasa, manatum tuntang manangis.

13Ela marabit pakaiam, tapi rabit ateim.”

Mules arepm talih Tuhan, Hatallam.

Ie olih manyarenan kalaite

tuntang sintae jaton bara tikas,

Ie tau tuntang kontep asi dengan ungkup Ayue

Ie sanang mampun tuntang dia rajin mahukum.

14Aya-ayau Tuhan Hatallam mobah tiroke,

tuntang Ie manenga kutoh berkat akam.

Sampai ikau olih maluput

parapah anggor tuntang gandom, akan Tuhan Hatallam.

15Keleh mahimon tarompet intu Sion,

bukit ain Hatalla,

keleh mansanan andau puasa,

keleh malalus pumpong hai.

16Keleh mamumpong hapus rayat

keleh mirak oloh are akan pumpong ungkup.

Soho kare oloh bakas dumah,

kare anak korik tuntang kare anak awau kea.

Kare panganten taheta keleh dumah kea.

Soho ewen malihi kamare.

17Soho kare imam je bagawi akan

Tuhan, manangis helat mesbeh

tuntang parantaran hila baun,

sambil hamauh, “Keleh ikau manyayang ungkup Ayum, o Tuhan;

ela manalua kare oloh Ayum inawah,”

sampai kare bangsa beken manyindir tuntang hamauh,

“Hong kueh Hatallan ewen?”

Hatalla mawi petak basiwoh haluli

18Palus Tuhan manantuani petak Ayue, tuntang masi ungkup Ayue.

19Ie tombah auh ewen kalotoh,

“Toh keton samandiai uras inenga-Ku:

gandom, anggor, tuntang undus saitun akan panginan,

mangat keton uras besoh.

Aku kareh dia manalua keton inawah

atawa inantawe awi kare bangsa.

20Agas sangkalap bara hila utara kareh iharak-Ku.

Belahe iharak-Ku akan padang.

Akan Tasik Matei Aku maharak barisan je hila baun,

akan Tasik Bentok Aku manggian barisan je hila likute.

Kare hantue kareh bahewau.

Ewen imbinasa-Ku awi ewen jari mangapehe keton.

21Ela mikeh, o tana, keleh ikau manyanang ateim;

ingat taloh hai je ilalus Tuhan akam!

22O kare meto, ela bagalabah.

Kare padang oru kanjerae bahijau.

Kare batang bua mamua labat,

bua anggor tuntang bua ara paham manjadi.

23O rayat Sion, keleh keton hanjak!

Keleh keton hanjak barami-rami tuntang basasurak!

Tagal kakare kahalap bara Tuhan, Hatallam.

Intu wayah dawen baduroh inengae sukup danum ujan akam.#2:23: Intu wayah … akam atawa: Inengae akam ujan intu wayah dawen baduroh awi Ie adil.

Hong wayah sadingen ujan impalabat,

kalote kea wayah kambang lembut sama kilau bahut.

24Palus gandom kareh basuang tinai eka mihik;

anggor tuntang undus saitun kareh mamulak bara eka mahamis.

25Aku kareh mangganti kakare karugim

hong kare nyelo katika sangkalap kuman hasil getem aim.

Basa aku manyoho agas sangkalap te manalih ikau.

26Panginan kareh sukup akan keton sampai keton besoh.

Keton kareh akan maninduh mampahai Tuhan Hatallan keton,

basa Ie malalus are taloh heran akan keton.

Oloh dia tinai manawah ungkup aing-Ku!

27Maka keton Israel palus katawan, je Aku aton marak keton,

tuntang je Aku toh Tuhan, Hatallan keton.

Jaton Hatalla beken, baya Aku bewei.

Ungkup-Ku kareh dia impahawen tinai.”

Andau ain Tuhan

28 # Gaw. Ras. 2:17-21 “Limbah te kareh kakare oloh inyuang-Ku hapan roh-Ku.

Maka kare anak keton bawi hatue kareh manyampai kare auh peteh-Ku;

kare oloh bakas marak keton kareh sondau nupi

panampayah kareh inenga akan kare oloh tabela.

29Katika te roh-Ku kareh inusoh-Ku kea

akan kare jipen bawi tuntang hatue.”

30Intu langit tuntang hunjun petak kareh aku mawi are taloh heran. Kareh aton pampatei, nyalan apui tuntang kangkewul asep. 31#Mat. 24:29; Mrk. 13:24-25; Luk. 21:25; Pang. 6:12-13 Matanandau kareh kaput tuntang bulan palus bahandang sama kilau daha. Uras taloh te kareh manjadi helo bara Andau ain Tuhan sampai, andau je manarewen tuntang bakaike-ikeh! 32#Rm. 10:13 Tapi eweh bewei je balaku pandohop bara Tuhan, kareh inyalamat. Tuhan hamauh, “Hong Yerusalem kare oloh je iintih-Ku kareh salamat!”

Currently Selected:

YO"EL 2: NIJ

Highlight

Copy

Compare