HOSEA 8

Tuhan mahukum Israel awi ewen manyembah dewa

1 Tuhan hamauh, “Pahiau tanda bahaya! Musoh manyarang lewung-Ku kilau burong antang manyambar panginae! Ungkup-Ku malanggar janjing-Ku dengan ewen, tuntang malawan kare auh ajar-Ku. 2Aloh ewen manyewut Aku Hatallan ewen, tuntang hamauh iete ewen ungkup-Ku je kasene Aku, 3tapi ewen dia maku manarima taloh je bahalap. Awi te ewen kareh inggoang awi kare musoh ewen.

4Ungkup-Ku mintih raja dia misek tirok ayung-Ku. Ewen mangkat pamimpin dia misek kahandak-Ku. Ewen mimbit amas tuntang perak palus mawi hampatong dewa je mawi kabinasa akan ewen kabuat. 5Aku basingi dengan sapi amas je inyembah oloh lewu Samaria. Aku sangit toto dengan ewen. Sampai hamparea ewen harajur mamapa arep awi manyembah dewa? 6Sapi amas je inyembah intu Samaria te tampan kare tukang intu Israel! Jete dia Hatalla, tuntang musti imparotek! 7Ungkup-Ku manawor riwut, maka ewen kareh manggetem riwut barat! Tana gandom ewen dia mamua, palus dia mahasil tepong akan panginan. Tapi amon tana te mamua kea, palus gandome impalepah awi kare bangsa beken. 8Kilau kenceng je pusit, tumon te Israel jaton aton regae tinai, tuntang jari sama kilau bangsa je jaton kalabiee bara kare bangsa beken. 9Sama kilau kalidai bariar je malawan, kalote kare oloh Israel mado kanahuange kabuat. Ewen manggau pandohop bara Asur, tuntang mamili kapakat bara kare bangsa beken. 10Aloh kalote Aku akan mamumpong tuntang mahukum ewen.#8:10: mahukum ewen atawa: ewen dia tinai akan mangkat raja atawa kare pejabat ain ewen kabuat. Dia tahi hindai ewen akan manarahing awi kapehe, amon ewen ihenyek awi Asur.

11Sasar are mesbeh imangun awi oloh Israel hapa marasih dosa, sasar are kea eka akan ewen mangat mawi dosa! 12Aku manyurat are toto ajar akan ewen, tapi uras inolak ewen awi ewen manirok taloh te jaton gunae akan ewen. 13Ewen rajin maluput parapah akang-Ku, tuntang kuman isin parapah te, tapi Aku, Tuhan, dia sanang dengan kare parapah te. Toh aku akan mingat dosan ewen tuntang mahukum ewen awi kare dosa te; Aku akan mangirim ewen haluli akan Misir!

14Oloh Israel mamangun kare istana, tapi ewen kalapean dengan je manjapa ewen. Oloh Yuda mampaare kare lewu je badinding batu, tapi aku akan mampamohon apui akan manusul lepah kare istana tuntang kare lewun ewen.”

Currently Selected:

HOSEA 8: NIJ

Highlight

Copy

Compare