HOSEA 7

1 Tuhan hamauh, “Sining katika aku nahuang mampakeleh ungkup-Ku Israel, tuntang halalian pambelom ewen, palus je gitangku baya dosa tuntang kapapan ewen. Ewen hatanjaro sama arepe, ewen tame human oloh awi handak manakau, tuntang ewen marampok intu kare jalan. 2Dia puji lembut hong tirok ewen je Aku toh mingat kare kapapa te. Tapi dosan ewen mangalukop ewen sampai tarang gitang-Ku.”

Pakat intu istana

3 Tuhan hamauh, “Hapan akal bakalilit tuntang kare gawi je papa rayat manyanang atei raja tuntang kare pagawai pamarentah. 4Ewen uras oloh darhaka tuntang oloh je dia baketep. Kasingin ewen sama kilau apui huang dapur je dia ingipas awi tukang rote helo bara bakal rote te jari tatap akan imapui. 5Hong andau pesta ain raja, ewen mawi raja tuntang kare pagawai ayue mihop anggor sampai babusau tuntang malalus kare taloh je humong. Tepa kajariae raja barami-rami dengan kare oloh darhaka te. 6Sama kilau apui huang dapur tumon te tirok papa tuntang kasangit ewen balasot huang ateie hapus alem tuntang hong hanjewo banyala sama kilau nyalan apui je mamok.

7Huang kasabak kasangite ewen mampatei kare pamimpin ewen. Uras rajan ewen jari impatei tuntu-tuntut. Tapi aloh pambelom jari kalote kapapae, jaton je balakudoa manintu Aku balaku dohop.”

Israel tuntang kare bangsa

8 Tuhan hamauh, “Bangsa Israel pakat dengan kare bangsa hakaliling ewen, sampai ewen ampie sama kilau rote je masak silae. 9Ewen dia kasene je gawi pakat dengan kare bangsa hakaliling te, kaabas ewen palus nihau. Kahapus pambelom ewen jari tokep, tapi ewen dia katawae. 10Kajohon oloh Israel gitan tarang tuntang bukti akan kasalan ewen. Tapi aloh kakare taloh te jari manjadi, ewen dia kea manggau Aku atawa haluli talih Aku, je Tuhan Hatallan ewen. 11Israel kanih-kate sama kilau burong dara je humong. Solake kare oloe balaku awat dengan Misir, limbah te ewen hadari tanggoh Asur! 12Tapi genep katika ewen mahalau Aku akan manenan jarat tuntang manyingkap ewen sama kilau oloh manyingkap burong. Aku akan mahukum ewen awi kare kapapan ewen je jari ingatawang-Ku.

13Calaka ewen, awi ewen jari malihi Aku. Ewen akan hancor awi jari malawan Aku. Aku nahuang manyalamat ewen tapi sombayang ewen akang-Ku dia dengan katoton atei. 14Ewen dia toto-toto balakudoa manintu Aku. Amon ewen balakudoa, ewen mahampas arep akan eka batiroh, tuntang manatum kilau je ilalus awi kare oloh je manyembah dewa. Ewen toto-toto malawan Aku! 15Aloh Aku je mampahai tuntang mampaabas ewen, tapi ewen paham malawan Aku. 16Ewen tetep ih manempo kare dewa je samasinde jaton kuasae en-en. Ewen dia olih iandal kilau panah je tendur. Kare pamimpin ewen hakotak dengan bajoho, awi te ewen kareh impatei hapan padang, tuntang inantawe oloh Misir.”

Currently Selected:

HOSEA 7: NIJ

Highlight

Copy

Compare