HOSEA 5

1 Tuhan hamauh, “Hining, o kare imam! Seneh o oloh Israel. Hining o kare oloh turonan raja! Hukuman jari ilalus akan keton. Awi sapunae keton mamutus hapan kaadilan, tapi kabalikae keton jadi sama kilau jarat intu Mispa, sama kilau jabak intu bukit Tabor, 2tuntang sama kilau rumbak je handalem intu Sitim. Awi te Aku kareh mahukum keton handiai! 3Aku katawan taloh handiai tahiu ikau, o Israel! Dia badai ikau milim taloh en-en bara Aku. Ikau manyembah dewa tuntang dia tinai baketep dengang-Ku. Awi te, kare oloh ayum dia patut tinai manyembah Aku.”

Tingak tahiu gawi manyembah dewa

4Kapapa je ilalus awi oloh Israel mawi ewen dia tau haluli manempo Hatallan ewen. Ewen jari ingaramak awi gawi manyembah dewa, sampai ewen dia paduli Tuhan tinai. 5Kajohon bangsa Israel gitan toto, tuntang jari bukti kasalan ewen. Dosan ewen mawi ewen tantarang tuntang balihang, tuntang bangsa Yuda omba manjato hayak ewen. 6Ewen haguet manggau Tuhan dengan mimbit tabiri tuntang sapi akan parapah, tapi urase taloh te dia baguna. Awi Tuhan jari malihi ewen tuntang ewen dia tau sundau Ie. 7Ewen dia baketep dengan Tuhan; kare anak ewen dia anake. Awi te, dia tahi tinai ewen akan imbinasa hayak dengan kare tanan ewen.

Parang Yuda malawan Israel

8Keleh mahimon tarompet intu Gibea! Pahiau tanda mantehau parang intu Rama! Pahiau lahap parang hong Betel!#5:8: Betel: Ite 4:15. Ayo, oloh Benyamin, miar parang! 9Israel kareh binasa, awi jari dumah andau akan mahukum ie. Hining, o rayat Israel, taloh te musti akan manjadi.

10 Tuhan hamauh, “Aku sangit awi kare kapalan oloh Yuda jari manyarang Israel tuntang marabut petake. Awi te aku akan malalus hukuman akan ewen sama kilau danum soho. 11Israel ihenyek, ie nihau hak akan petake, awi ie jua-juan balaku dohop dengan taloh je katotoe dia tau mandohop. 12Jete bukue Aku kareh mampalomos bangsa Israel, tuntang mambinasa oloh Yuda.

13Bangsa Israel tuntang bangsa Yuda kasene arepe je rusak, palus Israel manalih Asur akan balaku pandohop bara raja hai. Tapi raja dia tau mandohop atawa mangambuah pambelom ewen. 14Sama kilau singa manyarang; kalote Aku akan manyarang oloh Israel tuntang Yuda. Aku kabuat je akan mamisak ewen, palus malihi ewen. Amon Aku akan mihir ewen haguet, jaton oloh je tau maliwus ewen.

15Ungkupku kareh ilihi-Ku sampai ewen jari sukup kapehe awi kare dosae, palus dumah manggau Aku. Awi ewen huang kapehee tau hirahe ewen akan mancoba manyondau Aku.”

Currently Selected:

HOSEA 5: NIJ

Highlight

Copy

Compare