HOSEA 10

1Israel sama kilau batang anggor je mamua labat. Sasar mandahang panataue, sasar are mesbeh je iawie. Sasar sanang, sasar bahalap kea kare turus batu je inyembahe. 2Kare oloh je ateie tulas te, toh akan mananggong kajarian dosae. Hatalla akan mamparotek mesbeh ewen, tuntang mampalongkang kare turus batu ain ewen.

3Dia tahi tinai ewen kareh hamauh, “Itah jaton tempon raja awi itah dia mikeh dengan Tuhan. Narai gunae ije biti raja akan itah?” 4Ewen mangamburau tuntang mawi janji tanjaro hayak mampendeng janji je dia baguna. Kare atoran imutar balik sampai taloh je dia adil lembut sama kilau taloh imbul bawisa intu tana je jari inyangkul.

5Oloh lewu Samaria akan mikeh; ewen tuntang kare imam je manempo sapi amas intu Betel#10:5: Betel, atawa Awen: Ite 4:15. te akan kapehe atei tuntang manangis awi uras kahain hampatong dewan ewen te jari lilap. 6Hampatong te kareh iunda akan Asur uka inenga akan raja hai. Israel omba rencana je mawi ewen mahamen tuntang inawah. 7Samaria akan hancor tuntang rajae akan iimbit haguet sama kilau ije katetek kayu je impahantong intu danum. 8#Luk. 23:30; Pang. 6:16 Kare human taloh intu kare bukit hong Betel #10:8: Betel, atawa Awen: Ite 4:15. eka oloh Israel manyembah hampatong, akan irusak. Duhi tuntang oru akan lembut intu mesbeh ewen. Palus ewen mangkariak akan kare bukit, “Sangkolep ikei!” tuntang akan kare lungkoh “Enyet ikei!”

Israel ihukum

9 # Hak. 19:1-30 Tuhan hamauh, “Bara kajadian intu Gibea, oloh Israel hindai kea terai mawi dosa malawan Aku. Awi te intu Gibea#10:9: Gibea: Ite 9:9. kea ewen akan buah parang. 10Aku akan manyarang kare oloh je badosa te, tuntang mahukum ewen, kare bangsa akan hinje uka malawan ewen, tuntang ewen akan ihukum tagal dosan ewen je are te.

11Bihin Israel kilau sapi tabela je talatih bahalap, tuntang je rajin mihik gandom. Aku dia usah mangkepan gandar intu tekoke je bahalap te. Tapi toh aku jari manukas mamaksa ie bagawi babehat. Yuda inyohoku maluku, Israel inyohoku manyarak petak. 12#Yer. 4:3 Aku hamauh, ‘O Israel! Nguan tana taheta akam, tawor binyin kaadilan, tuntang getem berkat je ihasil awi katoton sintam dengang-Ku. Awi jari katikae ikau manggau Aku, Tuhan ayum. Aku akan dumah tuntang mujan ikau hapan berkat-Ku.’ 13Tapi ikau malalus taloh je hakalawan; ikau mawi kapapa, tuntang manggetem kadarhaka. Ikau jari kuman kare bua hasil tanjarom.”

Tuhan hamauh tinai, “O bangsa Israel, awi ikau mampaandal kare kareta parangm tuntang tantaram je karean, 14maka rayatm kareh intakan parang, tuntang uras kota aim akan inderep. Karusake sama kilau intu andau raja Salman mambinasa kota Bet-Arbel huang parang, tuntang malitek kare indue dengan kare anake. 15Jete je akan manjadi dengam, o oloh je melai Betel, awi ikau jari malalus kapapa je hai. Metoh andau sawah, sana parang manampara, rajam kareh matei.”

Currently Selected:

HOSEA 10: NIJ

Highlight

Copy

Compare