HOSEA 11

Tuhan sinta ungkup Ayue je darhaka

1 # Eks. 4:22; Mat. 2:15 Tuhan hamauh,

“Aku sinta Israel bara metoh ie korik,

intehau-Ku anak-Ku balua bara Misir.

2Tapi sasar intehau-Ku anak-Ku te

sasar ie mangejau arepe bara Aku.

Ie mimbit parapah tuntang mamapui garo

akan Baal tuntang kare dewa beken.

3Padahal Aku je majar Israel mananjong,

tuntang je mamaluke dengan kasayang.

Aku je mahaga ie

tapi ie dia maku mangaku jete.

4Dengan salepah kasayang-Ku

irantep-Ku ie dengang-Ku.

Uras kapehe inyalawah-Ku, tuntang

dengan sintang-Ku Aku mampakanan ie.#11:4: Uras … mampakanan ie atawa: Sama kilau anak je magon awau Aku manggatang ie tuntang inium-Ku; Aku sampai hajongkong awi-Ku mampasuap ie.

5Kare oloh Israel te dia maku haluli omba Aku, awi te ewen ilian haluli akan Misir, tuntang bangsa Asur kareh marentah ewen. 6Parang sabak toto sampai akan huang kare lewun ewen; kare lawang kareh irusak, tuntang ungkup-Ku kareh imbinasa. Jete manjadi awi ewen manumon kanahuange kabuat, 7tuntang jua-juan malihi Aku. Ewen akan buah henyek, tapi jaton je maliwus ewen aloh ewen mangkariak balaku awat.”

8 # Deu. 29:23 Tuhan hamauh, “O Israel, dia baka ikau inalua atawa ilihi awi-Ku. Tinai en ikau akan impalomos awi-Ku sama kilau Adma? Atawa iawiku sama kilau Seboim?#11:8: Adma tuntang Seboim: Kare lewu toh ihubung dengan Sodom tuntang Gomora. Ite Gen. 14:2 tuntang 14:8. Dia sampai ateiku malalus taloh te, awi sintang-Ku paham hai dengam! 9Ikau dia sampai ihukum awi-Ku huang kasangit-Ku; ikau dia akan imbinasa awi-Ku tinai. Awi aku Hatalla, dia olon. Aku, Je Barasih, mampahayak ikau, tuntang dia maku tinai sangit dengam.”

10 Tuhan hamauh, “Ungkup-Ku akan manuntut Aku amon Aku manyakungkong sama kilau singa tuntang mampikeh musoh ewen. Ungkup-Ku balalu kaje-kajeng dumah bara hila barat uka manyembah Aku. 11Bara Misir ewen akan dumah sama kilau kalias burong, tuntang bara Asur sama kilau kawan burong dara. Palus ewen akan iimbitku haluli akan human ewen. Aku, Tuhan, jari hakotak.”

Currently Selected:

HOSEA 11: NIJ

Highlight

Copy

Compare