EKSODUS 36

1Besaleel, Aholiab, tuntang uras tukang je mandino kaapik tuntang pangatawan bara Tuhan, katawan cara malalus uras taloh je ihapan akan mawi Kemah Tuhan. Ewen musti manampa kakare taloh kilau je jari irentah Tuhan.”

Bangsa Israel manenga are panenga

2Moses mantehau Besaleel, Aholiab tuntang kare oloh je mandino pangatawan bara Tuhan tuntang je pahias ateie mandohop, palus manyoho ewen manampara. 3Moses manenga akan ewen kakare taloh je inenga oloh Israel akan gawi mamangun Kemah Tuhan. Tapi bangsa Israel tetep manenga panenga akan Moses sining hanjewu. 4Palus kare tukang je kanjerae bagawi 5mansanan akan Moses, “Kare ramo je inenga awi kare oloh te jadi labih bara je ihapan akan gawi je inyoho awi Tuhan.”

6Moses mansanan akan kakare oloh intu hapus kemah tahiu kare panenga je hapa mamangun Kemah Tuhan jari sukop; awi te kakare oloh te dia usah mimbit taloh en-en tinai. 7Kare ramo je jari inenga ewen labih bara sukop hapa mampajadi uras kare gawi te.

Gawin tukang mawi Kemah Tuhan

(Eks. 26:1-37)

8Limbah te je paling apik bara marak kare tukang te manampa Kemah Tuhan. Kemah te iawi ewen bara sapuluh katetek benang baputi je halus tuntang wol biru, ungu tuntang bahandang, palus inyulam gambar kerub.#36:8: kerub: Ite 25:18. 9Genep katetek sama ukurae; kapanjange due walas meter, tuntang kalombahe due meter. 10Lime katetek benang inontong jadi ije dinding, tuntang lime katetek je beken iawi kalote kea. 11Intu saran due-due dinding te inampa hapa manyangkawite bara benang biru; 12lime puluh eka manyangkawit intu genep dinding, sampai jadi ije kapasang. 13Palus inampa lime puluh kawit amas akan mampahinje kadadue dinding te.

14Limbah ewen mawi sapau kemah te bara sawalas katetek benang bara bulun kambing. 15Genep katetek sama ukurae, kapanjange telo walas meter tuntang kalombahe due meter. 16Lime katetek inontong jadi ije dinding, tuntang jahawen katetek je beken inampa kalote kea. 17Lime puluh eka manyangkawite je imasang intu saran benang dinding je solake tuntang lime puluh eka manyangkawite intu saran dinding benang je kadue. 18Palus inampa lime puluh kawit bara tambaga je mampahinje due-due dinding te jadi sapau kemah. 19Limbah te inampa due tutup, ije bara bulun tabiri hatue je impahandang, tuntang je beken bara upak halus.

20Limbah te ewen manampa kare karangka Kemah je mendeng bujur bara kayu akasia. 21Kagantong genep karangka te epat meter tuntang kalombahe jahawen puluh jahawen sentimeter. 22Intu genep karangka te imasang due patok je ije kakambar sampai kakare karangka te tau hatontong sama arepe. 23Akan Kemah je hila salatan, inampa due puluh karangka, 24je inampa lapike epat puluh karee uras bara perak, jadi genep karangka aton due lapike akan kadadue patok te. 25Akan Kemah je hila utara inampa due puluh karangka, 26je inampa lapike epat puluh karee uras bara perak, jadi genep karangka aton due lapike. 27Akan kemah je hila likut, iete kemah je hila barat, inampa jahawen karangka 28tuntang due karangka akan putinge. 29Kare karangka je manampa puting te palus ihubung dengan paie tarus nyaroroi akan bagian hunjun. Kadadue karangka je manampa puting te inampa hapan cara jete. 30Jadi samandiaie aton hanya karangka tuntang jahawen walas lapik perak, due intu penda genep karangka.

31Palus ewen manampa lime walas kayu hamparang bara kayu panaga, lime akan kare rangka intu ije dinding kemah. 32Lime akan dinding je beken tuntang lime tinai akan likut kemah hila barat. 33Kayu hamparang je intu bentok, imasang kagantong satengah rangka, bara tapakan akan tapakan kemah te. 34Rangka kemah tuntang kare kayu hamparang te ingalukop dengan amas, palus imasang kare galang amas hapa manahan kare kayu te.

35Ewen kea manampa benang bauntonggang bara benang baputi halus je inantang hapan wol biru, ungu tuntang bahandang, palus inyulam dengan gambar kerub.#36:35: kerub: Ite 25:18. 36Eka mangkoak benang te inampa epat tihang bara kayu panaga je ingalukop amas dengan kawit amas tuntang imasang intu hunjun epat lapik perak. 37Palus inampa dinding benang akan bauntonggang kemah bara benang baputi halus je inampa mahapan wol biru, ungu tuntang bahandang tuntang imbungas hapan sulam. 38Akan benang bauntonggang inampa lime tihang je inontong dengan kare kawit. Kare tapakan tuntang kare taloh je hapa manontong kalime-lime tihang te ingalukop hapan amas; lime lapike inampa bara tambaga.

Currently Selected:

EKSODUS 36: NIJ

Highlight

Copy

Compare