EKSODUS 35

Atoran tahiu andau Sabat

1Moses mamumpong hapus bangsa Israel palus hamauh dengan ewen, “Toh parentah Tuhan akan keton: 2#Eks. 20:8-11, 23:12, 31:14-15, 34:21; Lew. 23:3; Deu. 5:12-14 Aton jahawen andau akan bagawi, tapi andau je kauju iete andau akan malayan, andau hai je ingabeken tantai akan Tuhan. Eweh je bagawi intu andau Sabat musti ihukum matei. 3Hong andau te keton dia tau mambelom apui intu human keton.”

Parapah akan Kemah Tuhan

(Eks. 25:1-9)

4Moses hamauh dengan hapus bangsa Israel, “Toh parentah Tuhan: 5Imbit parapah akan Tuhan. Eweh je mahian ateie, musti maluput amas, perak tuntang tambaga; 6Benang baputi halus, wol biru, ungu tuntang bahandang; benang bara bulun kambing; 7upak tabiri hatue je impahandang, upak halus, kayu panaga, 8minyak akan sumbo; rarampah akan minyak upacara tuntang akan garo je mangat ewaue; 9permata dalima tuntang permata beken akan irasuk intu baju epod tuntang tutup usok Imam Hai.”

Ramo akan Kemah Tuhan

(Eks. 39:32-43)

10“Uras tukang tuntang oloh pintar marak keton dumah mawi kare taloh je irentah Tuhan, iete: 11kemah, sapau tuntang tutupe, kawit tuntang rangkae, kare kayu hamparang tuntang tihang bauntonggang dengan lasehe; 12Patin Janji dengan kayu pikule, tutupe dengan benang panutupe; 13Meja dengan kayu pikule, uras pakakase tuntang rote, 14tantahan sumbo akan kalawa dengan pakakase, sumbo dengan minyak; 15mesbeh eka mamapui garo dengan kayu pikule, minyak upacara, garo je mangat ewaue; dinding-benang akan bauntonggang kemah, 16mesbeh akan parapah je ingehu dengan galang tambaga, kayu pikul dengan uras pakakase; bak eka menyau dengan lapike, 17dinding-benang akan perantaran, kare tihang tuntang lapike, dinding-benang lawang parantaran, 18kare pasak tuntang tali akan kemah tuntang akan parantarae; 19pakaian sombayang akan kare imam metoh ewen bagawi intu Kamar Ije Barasih tuntang pakaian je ingabeken akan imam Aron, tuntang kare anake.”

Bangsa Israel mimbit parapah ewen

20Palus uras oloh Israel je hapumpong te haguet, 21tuntang eweh bewei je pahias ateie mimbit parapah akan Tuhan hapa manyukop Kemah Tuhan. Ewen kea mimbit uras taloh je ihapan hapa sombayang tuntang ramo akan pakaian imam. 22Eweh bewei je handak, aloh hatue atawa bawi, dumah mimbit tusok hiasan, sowang, tisin, giwang, tuntang kakare macam hiasan amas uka iluput akan Tuhan. 23Genep biti je aton benang baputi halus, wol biru, ungu tuntang bahandang, benang bara bulun kambing, upak tabiri hatue je impahandang, atawa upak halus balalu maluput ramo te. 24Genep biti je tau manenga perak atawa tambaga, mimbite akan Tuhan. Kalote kea ilalus awi kare oloh je aton kayu panaga akan gawi te. 25Kare oloh bawi je tau manantang mimbit benang baputi halus tuntang wol biru, ungu tuntang bahandang je jari iawi ewen. 26Ewen kea manantang benang bara bulun kambing. 27Kare pamimpin mimbit permata dalima tuntang kare permata beken indu irasuk intu epod tuntang tutup usok. 28Ewen kea mimbit rarampah tuntang minyak akan sumbo, minyak upacara tuntang garo je mangat ewaue. 29Uras oloh Israel dengan kahias atei mimbit panengan ewen akan Tuhan indu gawi je irentah Tuhan mahalau Moses.

Kare tukang inyoho mawi Kemah Tuhan

(Eks. 31:1-11)

30Limbah te Moses hamauh dengan oloh Israel, “Tuhan jari mintih Besaleel anak Uri, eson Hur, bara suku Yuda, 31tuntang manenga kuasan Ayue;#35:31: Kuasan Ayue atawa roh ayue. Hatalla manenga kaharati, kaapik tuntang katau hong narai bewei kare ampin macam gawi, 32uka mawi rencana kare gawi je mahapan kapintar, palus manampae bara amas, perak tuntang tambaga; 33uka masa batu permata je handak irasuk; uka mukir kayu tuntang kakare macam gawi beken je tau mandahang kahalap ampin kare ramo. 34Akan Besaleel tuntang Aholiab, anak Ahisamakh bara suku Dan, Tuhan manenga kapintar majar kaapik ewen akan oloh beken. 35Ewen inenga pangatawan sepsimpan macam gawi je ilalus awi tukang pahat, tukang marancana ampin tampan kare ramo, tukang je apik manantang lena halus, wol biru, ungu tuntang bahandang, tuntang benang je beken. Ewen te tukang marancana ampin tampan kare ramo je tau manguan sepsimpan kare gawi.

Currently Selected:

EKSODUS 35: NIJ

Highlight

Copy

Compare