EKSODUS 30

Mesbeh eka mamapui garo

(Eks. 37:25-28)

1 Tuhan hamauh tinai dengan Moses, “Tampa bara kayu ije mesbeh eka mamapui garo. 2Tampan mesbeh te lapak epat; kapanjange sama dengan kabukae iete 45 sentimeter, kagantonge 90 sentimeter. Intu epa-epat putinge tampa kare tandok je leket intu mesbeh te. 3Hila hunjue, tamput epa-epat dinding tuntang kare tandoke musti inantilap hapan amas tulen hayak inenga bingkai amas hakalilinge. 4Tampa due galang intu penda bingkai te hong due-due balikate hasansila hapa manahan kayu je hapa meton mesbeh te. 5Kayu je hapa meton te inampa bara kayu panaga hayak inantilap hapan amas. 6Andak mesbeh te intu hila luar benang je aton intu baun Patin Janji, intu eka Aku kareh hasondau dengam. 7Sining hanjewu, metoh Aron dumah manatap sumbo ie mamapui garo manyan intu hunjun mesbeh te. 8Taloh te ilaluse kea metoh ie manotong sumbo amon halemei. Parapah garo te ilalus harajur palus katatahie. 9Ela maluput intu hunjun mesbeh te garo je pali, parapah meto tuntang parapah taloh kinan; ela kea manusoh parapah danum anggor intu hunjue. 10Sinde ije nyelo Aron musti malalus upacara marasih mesbeh hapan cara mambirik epa-epat tandoke dengan dahan meto je iluput indu ampun dosa. Taloh te musti ilalus genep nyelo palus katatahie. Mesbeh te musti barasih urase tuntang ingabeken akang-Ku.”

Pajak akan Kemah Tuhan

11 Tuhan hamauh dengan Moses, 12“Metoh mawi sensus bangsa Israel, genep biti oloh bangsa Israel musti mambayar akang-Ku duit tewus bitie mangat ie dia buah calaka metoh sensus te ilalus. 13#Eks. 38:25-26; Mat. 17:24 Genep biti je tamput ireken intu sensus te musti mambayar duit je inukas karee tumon rega je inukas kemah-Ku kilau panenga je ngabeken akang-Ku. 14Genep biti je buah reken intu sensus te, iete genep biti oloh hatue je umure due puluh nyelo kahunjun, musti manenga panenga te. 15Oloh tatau dia tau mambayar labien tuntang oloh je belom susah dia tau mambayar kurang metoh ewen mambayar duit tewus te akan bitie. 16Duan duit te bara bangsa Israel, akan hapa sombayang intu kemah-Ku. Uras jete duit tewus akan bitin ewen; Aku harajur mingat jete hapa ngalindong ewen.”

Bak bara tambaga

17 Tuhan hamauh dengan Moses, 18#Eks. 38:8 “Tampa ije bak bara tambaga tuntang galang pendae tambaga kea. Andak bak te helat kemah dengan mesbeh, palus nyuang dengan danum. 19Danum te akan Aron tuntang kare anake mangat ewen tau menyau lengee tuntang paie, 20-21helo bara ewen tame kemah atawa manokep mesbeh mangat mimbit parapah je ingehu. Ewen musti malalus jete mangat dia impatei. Atoran te musti inumon ewen tuntang turonan ewen palus katatahie.”

Minyak upacara

22 # Eks. 37:29 Tuhan hamauh dengan Moses, 23“Duan rarampah je pangkahalape, jahawen kilo mur cair, telo kilo kayu manis, telo kilo tewu mangat ewaue, tuntang jahawen kilo jarangau. 24Uras jete inimbang manumon timbangan je aton intu kemah-Ku. Dahang epat liter undus saitun, 25tuntang tampa minyak upacara, je iewoi kilau minyak je mangat ewaue. 26Hapan taloh ewoi te mangat maminyak Kemah-Ku, Patin Janji, 27meja tuntang uras kare pakakase, mesbeh eka mampui garo, 28mesbeh akan parapah je ingehu tuntang hapus pakakase, tuntang bak danum dengan lapik penda. 29Hapan cara te ikau musti mangabeken kare ramo te akang-Ku, mangat kakare taloh te uras barasih. En bewei je buah mesbeh te inyarah akan Tuhan, tuntang eweh bewei je manigonge kareh mandino calaka tagal kaabas karasihe.#30:29: calaka awi kaabas karasihe ite 29:37. 30Keleh maminyak kea Aron tuntang kare anake mangat ewen inahbis jadi imam indu mangat manguan gawi. 31Suman akan bangsa Israel je palus katatahie minyak upacara te ingabeken akang-Ku. 32Minyak te dia tau inusoh akan hunjun oloh awam. Ela manampa minyak sama kilau jete mahapan campuran jete kea. Minyak te barasih tuntang musti itong kilau ramo barasih. 33Oloh je manampa minyak kilau te, atawa mahapae akan oloh je dia imam, dia tinai itong kilau oloh ungkup-Ku.”

Garo

34 Tuhan hamauh dengan Moses, “Duan pire-pire rarampah je sama karee, iete gitan nyating, tutup kalisi, nyating baputi bahenda, tuntang garo tulen. 35Hapan uras jete akam manampa garo iewoi je mangat ewaue. Dahang uyah mangat garo te tetep tulen tuntang tau ihapan akang-Ku. 36-37Belah bara garo te inepe sampai halus. Imbit jete akan kemah-Ku tuntang buwor intu baun Patin Janji. Garo te itong kilau taloh barasih je tantai akang-Ku. Ela mawi garo iewoi dengan taloh je kilau te kea akam kabuat. 38Eweh je mawi taloh mangat ewaue kilau te, dia tinai itong kilau oloh ungkup-Ku.”

Currently Selected:

EKSODUS 30: NIJ

Highlight

Copy

Compare