EKSODUS 29

Atoran tahiu mangkat Aron tuntang kare anake kilau imam

(Lew. 8:1-36)

1“Jetoh cara mantahbis Aron tuntang kare anake mangat ewen tau bagawi akang-Ku kilau imam. Duan ije kongan sapi hatue tabela tuntang due kongan tabiri hatue je tinduh. 2Tampa bakal rote je dia iragi bara tepong gandom je pangkapalape. Bara bakal rote te, belahe inampa hewoi undus saitun, belahe tinai dia mahapan undus, tuntang tisae inampa wadai je iohos undus bewei. 3Andak intu kusak palus luput akang-Ku haya-hayak dengan parapah sapi hatue tuntang due kongan tabiri hatue.

4Soho Aron tuntang kare anake dumah akan bauntonggang kemah-Ku tuntang mamenyau arepe. 5Masang pakaian imam intu Aron; kameja, epod, jubah je manutup epod, tutup usok tuntang peteng kahang. 6Andak saruban intu takoloke tuntang nyemat intu saruban te hiasan amas je iukir ‘Ingabeken tantai akan Tuhan.’ 7Palus duan minyak upacara, nusoh intu hunjun takoloke tuntang minyak ie.

8Limbah te soho kare anake dumah hayak hapan kameja 9tuntang peteng kahang intu ewen, palus ingkes saruban intu takolok ewen. Jete carae mantahbis Aron tuntang kare anake. Ewen tuntang turonan ewen musti bagawi akang-Ku kilau imam palus katatahie.

10Limbah te sapi hatue te iimbit akan baun kemah-Ku. Aron tuntang kare anake mingkes lengen ewen intu hunjun kolok meto te. 11Sambalih sapi hatue te intu taharep-Ku intu bauntonggang kemah. 12Duan belah dahan sapi te tuntang ohos hapan tunjukm intu kare tandok mesbeh. Tisan daha te inusohm akan hila penda mesbeh. 13Limbah te duan uras banahat intu kanaie, hila je pangkahalape bara atei tuntang due-due bua kahange dengan enyakke tuntang andak uras te intu hunjun mesbeh tuntang ngehu indu parapah akang-Ku. 14Isie, upak, tuntang kanain sapi hatue te ingehu intu luar kemah. Jetoh parapah indu ampun dosan kare imam.

15Limbah te duan ije bara due sapi hatue te. Aron tuntang kare anake musti mingkes lengen ewen intu hunjun takolok meto te. 16Palus sambalih meto te, duan dahae tuntang nusoh intu kaepa-epat dinding mesbeh. 17Tabiri hatue te iraga. Kanaie tuntang sapake ienyau tuntang iandak intu hunjun takoloke tuntang intu hunjun kare ragae je beken. 18#Ep. 5:2; Plp. 4:18 Luput uras tabiri hatue te intu hunjun mesbeh indu parapah je ingehu. Ewau parapah te manyanang atei-Ku.

19Duan tabiri hatue je ijee tinai, iete tabiri hatue akan hapan upacara mantahbis. Soho Aron tuntang kare anake mingkes lengen ewen intu hunjun takolok meto te. 20Palus sambalih tabiri hatue te; duan isut dahae, ohos intu pinding gantaun Aron tuntang kare anake, intu tunjok indu lengee gantau tuntang tunjok indu paie gantau. Tisan daha te inyiram intu kaepa-epat dinding mesbeh. 21Duan isut daha je aton intu hunjun mesbeh tuntang isut minyak upacara. Palus birik Aron tuntang kare anake hayak pakaian ewen. Hapan cara te Aron tuntang kare anake hayak pakaian ewen ingabeken akang-Ku.

22Duan enyak tabiri hatue te, ikohe je aton enyak, tilap enyak bara huang kanaie, hila ateie je pangkahalape, kadadue bua kahange dengan enyake, tuntang sapak gantaue. 23Bara kusak rote je jari iluput akang-Ku, duan ije rote bara genep macam: ije je inampa hapan undus saitun, ije je dia haminyak, tuntang ije wadai. 24Ingkes kakare panginan te intu lengen Aron tuntang kare anake, soho ewen mamparahae akangku kilau parapah je iayun. 25Palus duan rote te bara ewen tuntang mapui hunjun mesbeh, intu hunjun parapah je ingehu te. Ewau parapah te manyanang atei-Ku.

26Duan usok tabiri hatue tuntang luput indu parapah je iayun akangku. Jete bagin ayum.

27Intu upacara mantahbis imam, usok tuntang sapak tabiri hatue je ihapan intu upacara te musti iluput kilau parapah je iayun akangku tuntang imisah akan kare imam. 28Jetoh auh tukas ayungku je dia tau iubah: Metoh ungkup-Ku dumah maluput parapah hapa badamai, usok tuntang sapak kare meto te indu bagin kare imam. Jete parapah ungkup-Ku je akang-Ku.

29Pakaian sombayang Aron musti iwaris awi kare anake mangat ewen tau mahapae metoh inahbis. 30Anak Aron je jadi imam mangganti bapae tuntang tame kemah-Ku indu malalus sombayang intu Kamar Ije Barasih, musti mahapan pakaian te uju andau katahie.

31Duan isin tabiri hatue je ihapan intu upacara mantahbis Aron tuntang kare anake; pakasak isin meto te intu eka je barasih. 32Isin meto te patut ewen kumae intu bauntonggang kemah-Ku dengan tisan rote je aton intu kusak. 33Ewen musti kuman panginan je iluput indu parapah intu upacara ampun dosa metoh mantahbis. Baya imam bewei je tau kuman panginan je jari ingabeken akang-Ku te. 34Amon hanjewu jewue isin meto atawa rote te magon batisa, maka tisae te musti ingehu lepah, tuntang dia tau kinan awi jari ingabeken.

35Upacara mantahbis Aron tuntang kare anake musti ilalus katahin uju andau, kilau je jari irentah-Ku akam. 36Genep andau musti iluput ije kongan sapi hatue indu ampun dosa. Tagal parapah te mesbeh imparasih. Palus mesbeh te musti iminyiakm hapan undus saitun mangat ingabeken akang-Ku. 37Lalus jete sining andau katahin uju andau. Palus uras mesbeh barasih. En bewei je buah mesbeh te musti inyarah akan Tuhan, eweh bewei je manigonge kareh dinon calaka awi kaabas karasihe.”#29:37: calaka awi kaabas karasihe: Hong katika te aton kapercayan oloh je oloh kalunen biasa atawa taloh je babanda akan calaka amon kana taloh je barasih.

Parapah akan genep andau

(Num. 28:1-8)

38“Sining andau palus katatahie intu hunjun mesbeh te musti iluput parapah due kongan tabiri je ije nyelo umure. 39Je ije kongan akan indu parapah hanjewu, tuntang je beken akan indu parapah halemei. 40Hayak anak tabiri je akan indu parapah hanjewu, musti iluput ije kilo tepong je pangkahalape iewoi dengan ije liter undus saitun tulen. Beken bara te tinai ije liter danum anggor. 41Anak tabiri je akan indu parapah halemei musti iliput hapan cara je sama, impahayak tepong, undus saitun tuntang danum anggor. Ewau parapah je ingehu te manyanang atei-Ku. 42Palus katatahie je ingehu te musti iluput intu taharep-Ku intu bauntonggang kemah-Ku. Intu hete Aku kareh hasondau dengan ungkup-Ku tuntang hakotak dengam. 43Intu hete Aku hasondau dengan bangsa Israel, tuntang kalawan panumah-Ku kareh mawi eka te barasih. 44Aku kareh mawi kemah-Ku tuntang mesbeh te barasih. Aron tuntang kare anake ingabeken bara je beken mangat ewen bagawi akang-Ku kilau imam. 45Aku kareh melai intu bentok bangsa Israel, tuntang jadi Hatallan ewen. 46Ewen kareh katawan je aku toh Tuhan, Hatallan ewen je mimbit ewen balua bara Misir, mangat Aku tau melai intu bentok ewen. Aku toh Tuhan, Hatallan ewen.”

Currently Selected:

EKSODUS 29: NIJ

Highlight

Copy

Compare