EKSODUS 31

Hatalla mintih kare oloh je manampa kemah dengan pakakase

(Eks. 35:30–36:1)

1 Tuhan hamuh dengan Moses, 2“Aku jari mintih Basaleel anak Uri, eson Hur bara suku Yuda, 3tuntang manenga akae kuasang-Ku.#31:3: kuasang-Ku atawa roh-Ku. Ie inengaku pangatawan, kataun tuntang kapintar hong kakare macam gawin seni: 4mangat mangarangka taloh je mamerlu kapintar hayak mawie bara amas, perak tuntang tambaga; 5masa batu permata je indu irasuk; mukir kayu tuntang kakare macam gawin seni je beken. 6Oholiab tuntang Ahisamakh bara suku Dan, jari intih-Ku kea mangat mandohop ie. Inenga-Ku kea kapintar je malabien akan kare tukang je pandai, mangat ewen olih mawi en bewei je irentah-Ku: 7kemah-Ku, Patin Janji, kakare pakakas kemah, 8iete meja tuntang pakakase, tantahan sumbo bara amas tulen tuntang pakakase, mesbeh eka mampui garo, 9mesbeh eka parapah je ingehu tuntang kare pakakase, bak danum dengan lapik pendae, 10pakaian sombayang akan Aron tuntang kare anake, je ihapan metoh ewen bagawi kilau imam, 11minyak upacara, tuntang garo je mangat ewaue akan Kamar Ije Barasih. Kakare taloh te patut inampa ewen tumon atoh je inenga-Ku akam.”

Sabat andau malayan

12-13 Tuhan marentah Moses mangat mansanan akan bangsa Israel, “Haga andau Sabat, andau je jari inukas-Ku kilau andau akan malayan. Palus katatahie andau te jadi pampingat akan keton dengang-Ku, mangat keton katawan je Aku toh Tuhan, tuntang je aku jari manampa keton bangsa ayung-Ku kabuat. 14-15#Eks. 20:8-11, 23:12, 34:21, 35:2; Lew. 23:3; Deu. 5:12-14 Andau malayan te musti ihormat kilau andau je Barasih. Keton inenga-Ku jahawen andau hapan bagawi, tapi andau je kauju jete andau hai je ingabeken akang-Ku. Eweh je dia mahormat jete, tapi bagawi hong andau te musti ihukum matei. 16Bangsa Israel musti mamesta andau te girir-manggirir kilau tanda andau janji. 17#Eks. 20:11 Andau te iete andau pampingat je tetep ayun oloh Israel dengang-Ku. Awi Aku, Tuhan, jari manampa langit tuntang petak hong jahawen andau, tuntang hong andau je kauju Aku tende bagawi tuntang malayan.”

18Limbah jari hakotak dengan Moses intu hunjun Bukit Sinai, Hatalla manenga akae kadadue bindang batu je jari inyurat awi Hatalla dengan kare parentah Aie.

Currently Selected:

EKSODUS 31: NIJ

Highlight

Copy

Compare