EKSODUS 28

Pakaian Imam

(Eks. 39:1-7)

1“Tehau Aron kakam dengan kare anake Nadab, Abihu, Eleasar tuntang Itamar, ngabeken ewen mangat tau bagawi kilau imam akang-Ku. 2Tampa pakaian Imam akan Aron, mangat aton gitan hormat akae. 3Tehau hapus tukang jahit je jari inengaku kapintar mitor. Soho ewen mawi pakaian Aron mangat ie tau ingabeken mangat bagawi kilau imam akang-Ku. 4Soho ewen mawi tutup usok, epod, jubah, kameja basulam, saruban tuntang peteng-kahang. Pakaian Imam te patut ewen manampae akan Aron, kakam, tuntang kare anake mangat tau bagawi kilau imam akang-Ku. 5-6Pakaian te musti ewen manampae bara benang wol biru, ungu tuntang bahandang, lawai amas tuntang benang lena baputi halus. Tinai epod musti ihias hapan sulam. 7Due tali hunjun baha hapa mameteng epod iitor intu sarae. 8Ije peteng kahang benang halus bara benang je sama iitor intu epod te mangat jadi ije. 9-12Duan due batu dalima. Gau ije biti tukang amas je pintar maukir intu batu te due walas aran anak Yakob hagilir tumon umure, jahawen intu genep batu. Palus due-due batu permata te musti imasang huang bingkai amas tuntang iingkes intu talin hunjun baha epod kilau tanda pampingat akan due walas suku Israel. Tumon te Aron mimbit aran ewen intu hunjun bahae, sampai aku, Tuhan, harajur mingat ewen. Beken bara due-due bingkai amas te, 13-14inampa kea due rantai bara amas tulen je inali kilau tali, imasang intu bingkai amas te.”

Tutup usok

(Eks. 39:8-21)

15“Tampa akan Imam Hai ije tutup usok akan indu hapan metoh ie handak mangatawan kahandak Hatalla. Taloh je ihapan uka manampa tutup usok tuntang sulame sama dengan taloh je ihapan manampa epod tuntang sulame. 16Tampae lapak epat hayak ilipet due, panjang tuntang kalombahe 22 sentimeter. 17Masang epat kabaris batu permata intu tutup usok te. Intu baris batu je solake batu delima, tupas tuntang baiduri. 18Intu baris je kaduee, jamrud, nilam tuntang intan. 19Intu baris je kateloe, lasuardi, akik tuntang kacubung. 20Intu baris kaepate, pirus, yakut tuntang ratna campaka. Due walas permata te imeteng hapan amas. 21Intu genep permata iukir ije bara aran due walas anak Yakob kilau tanda pampingat akan kare suku Israel. 22Tampa akan tutup usok te due rantai bara amas tulen je injalin jadi tali. 23Tampa kea due galang amas tuntang masang intu kadadue tapakan hila hunjun tutup usok te, 24palus namean due rantai amas te akan huang kare galang nah. 25Kadadue tapakan je beken bara rantai te imeteng intu kadadue bingkai, mangat tutup usok te tau inontong dengan je silae intu hila baun tali hunjun bahan epod. 26Tampa due galang amas tinai, palus masang intu tutup usok te intu tapakan penda hila huange je buah epod. 27Limbah te tampa due galang amas tinai tuntang masang intu hila baun kadadue tali hunjun baha epod tokep tontong itore hila pendae isut, intu hila hunjun peteng kahang bara benang halus. 28Galang tutup usok inontong dengan tali biru intu galang epod mangat tutup usok te tetep aton intu hunjun peteng kahang tuntang dia tau balekak.

29Metoh Aron tame akan eka barasih, ie patut mimbit kare aran suku Israel je iukir intu tutup usoke, mangat Aku, Tuhan, harajur mingat ungkup ayung-Ku. 30#Num. 27:21; Esr. 2:63; Neh. 7:65 Ingkes Urim tuntang Tumim#28:30: Urim tuntang Tumim: Due macam taloh je ihapan imam hapa mangatawan kahandak Hatalla. Dia ingatawan dengan batantu kilen ampie cara mahapan kare taloh te. intu huang tutup usok te indu ihapan Aron amon ie manaharep Aku. Intu katika kalote ie patut harajur mahapan tutup usok, mangat ie tau mangatawan kahandak-Ku akan ungkup Israel.”

Pakaian beken akan Imam

(Eks. 39:22-31)

31“Jubah je ihapan intu hunjun epod urase inampa bara wol biru. 32Tatas uyate indehen hapan pita benang mangat dia murah barabit. 33-34Hakaliling saran pendae musti inampa hiasan kilau bua delima bara wol biru, ungu tuntang bahandang, inyangkelang awi garanuhing amas. 35Jubah te musti ihapan Aron amon ie bagawi kilau imam. Metoh ie manaharep aku intu Kamar Ije Barasih atawa malihi eka te, kareh tarahining auh garanuhing te, mangat ie ela matei.

36Tampa ije hiasan amas tulen, ukir bawak kotak toh: ‘Ingabeken tantai akan Tuhan.’ 37Peteng jete intu saruban hapan tali biru. 38Hiasan amas te imasang Aron intu lingkauae, mangat Aku, tau manarima hapus parapah je imbit oloh Israel akang-Ku; aloh metoh mimbit parapah te ewen jari mawi kasalan.

39Kameja ain Aron musti inampa bara benang lena halus. Tampa kea ije saruban bara benang halus tuntang peteng kahang je inyulam.

40Tampa kemeja, peteng kahang tuntang saruban akan kare anak Aron mangat ewen te gitan kilau oloh je patut ihormat. 41Masang pakaian te intu Aron, paharim, tuntang kare anake. Minyak ewen hapan minyak saitun; hapan te ewen intahbis jadi imam tuntang ingabeken uka bagawi akangku. 42Tampa akan ewen salawar pandak bara benang lena halus, kapanjange bara kahang sampai sapak hapan manutup bagian biti je dia patut inampayah. 43Salawar te patut harajur ihapan ewen metoh tame akan Kemah-Ku atawa manokep mesbeh uka mawi sombayang kilau imam intu Kamar Ije Barasih. Mangat ewen dia matei awi gitan hila bitie je dia pantas inampayah. Atoran toh tetep ilalus awi Aron tuntang turonae.”

Currently Selected:

EKSODUS 28: NIJ

Highlight

Copy

Compare