EKSODUS 27

Mesbeh

(Eks. 38:1-7)

1“Tampa ije mesbeh bara kayu panaga. Lapak epat tampae kapanjange tuntang kalombahe uras 2,2 meter tuntang kagantonge 1,3 meter. 2Intu genep puting hunjue inampa kare tandok je leket intu mesbeh. Uras ingalukop hapan tambaga. 3Tampa kare ketel kawo, sendok kawo, kare mangkok, kare garpu tuntang eka apui. Uras pakakas te inampa bara tambaga. 4Tampa jawet kawat bara tambaga tuntang hapan epat galang eka kayu pikul intu epa-epat puting pendae. 5Kambo jawet kawat te satengah bara kambo mesbeh. Jawet kawat te intu mesbeh silan hila pendae. 6Tampa due kayu pikul bara kayu panaga ingalukop hapan tambaga; 7Namean akan huang kare galang intu due-due balikat mesbeh metoh meton mesbeh te. 8Tampa mesbeh te bara papan je buang silan huange, manumon atoh je imparahang-Ku akam intu hunjun bukit toh.”

Sarambi Kemah Tuhan

(Eks. 38:9-20)

9“Tampa sarambi kaliling kemah-Ku je ingarambang dinding-benang bara benang baputi halus. Intu hila salatan 44 meter kapanjange, 10inahan awi due puluh tihang tambaga, gagenep tihang ilapik tambaga, kawit tuntang eka mangkawite uras bara perak. 11Tampa kalote kea intu hila utara. 12Intu hila barat, dinding-benang te 22 meter kapanjange, dengan sapuluh tihang tuntang sapuluh lapike. 13Intu hila timor te aton bauntonggange, panjang dinding-benang te 22 meter kea. 14-15Intu sambil gantau bauntonggang te imasang dinding-benang, je kapanjange uras 6,6 meter dengan telo tihang intu telo lapik. 16Akan bauntonggange imasang dinding-benang 9 meter kapanjange bara benang baputi halus je inampa bara wol biru, ungu tuntang bahandang, je inyulam. Hapa manahan dinding-benang bauntonggang te inampa epat tihang dengan epat lapik. 17Uras tihang kaliling sarambi te inontong hapan kawit perak; kawite bara perak tuntang lapike bara tambaga. 18Dinding-benang kaliling sarambi te kapanjange 44 meter, kalombahe 22 meter tuntang kagantonge 2,2 meter. Dinding-benang te inampa bara benang baputi halus tuntang lapike bara tambaga. 19Hapus pakakas je ihapan huang Kemah, tuntang kakare patok akan Kemah, tuntang je akan dinding benang inampa bara tambaga.”

Cara maharago sumbo

(Lew. 24:1-4)

20“Soho oloh Israel mimbit undus saitun je pangkahalape akan sumbo intu huang Kemah-Ku mangat tau inotong tuntang hanyala harajur. 21Aron tuntang kare anake musti halaluan sumbo te bara halemei sampai hanjewu intu ekaku aton, intu luar dinding benang hong baun Patin Janji. Parentah te musti ilalus katatahie awi oloh Israel tuntang turonae.”

Currently Selected:

EKSODUS 27: NIJ

Highlight

Copy

Compare