EKSODUS 23

Kabujur tuntang katoto

1 # Eks. 20:16; Lew. 19:11-12; Deu. 5:20 “Ela manyiar kabar tanjaro, tuntang ela mandohop oloh papa je manyaksi taloh je dia toto. 2Ela omba-omba dengan oloh are amon ewen mawi taloh sala atawa mampahiwang hukum awim manyaksi taloh je dia toto. 3#Lew. 19:15 Ela mangabeken oloh hong pakara pangadilan, aloh oloh je imutus te oloh ije belom susah.

4 # Deu. 22:1-4 Amon keton tabarong aton mite sapi atawa kalidai musohm layang, imbit haluli akan tempoe. 5Amon kalidai musohm balongkang awi kare taloh etoe, dohop ie mampendeng kalidai te; ela malihie tumon te bewei.

6 # Lew. 19:15; Deu. 16:19 Mutus akan oloh je belom susah sara adil amon ie dumah mimbit pakarae akan pengadilan. 7Ngejau auh dawa tanjaro; ela mawi oloh je dia basala ihukum matei. Awi Aku dia mambujur oloh je malalus kapapa kalote. 8Ela manarima duit suap. Awi duit suap te mawi oloh babute tahiu taloh je toto hayak mamparugi kare oloh je dia basala.

9 # Eks. 22:21; Lew. 19:33-34; Deu. 24:17-18, 27:19 Ela mangapehe oloh bangsa beken. Keton katawan kilen angate jadi oloh bangsa beken, awi bihin keton kea jadi oloh bangsa beken intu Misir.”

Nyelo tuntang andau kauju

10 # Lew. 25:1-7 “Jahawen nyelo katahie ikau tau mimbul taloh intu tanam tuntang manduan taloh je ihasile. 11Tapi hong nyelo je kauju petak te musti inaluam. Katahin nyelo te ikau dia tau manampunan taloh je belom kabuate intu tanam. Nalua jete akan oloh je belom susah, tuntang tisae tau akan meto baliar. Awi kalote kea dengan kabon anggor tuntang kare batang kayu saitun ayum.

12 # Eks. 20:9-11, 31:14-15, 34:21, 35:2; Lew. 23:3; Deu. 5:13-14 Jahawen andau hong ije minggo ikau tau bagawi, tapi intu andau je kauju ikau musti malayan, maggat meto ayum, kare oloh ayum tuntang kare oloh bangsa beken je bagawi akam tau malayan kea.

13Haga kare taloh je jari insanang-Ku akam. Ela manyembah kare dewa beken, aloh manyewut arae mahin dia tau.”

Atoran tahiu kare andau hai

(Eks. 34:18-26; Deu. 16:1-17)

14“Genep nyelo ikau musti malalus telo pesta hapa mahormat Aku. 15#Eks. 12:14-20; Lew. 23:6-8; Num. 28:17-25 Hong bulan Abib, intu katika je inukas, ikau musti mahaga Pesta Rote Je Dia Iragi tumon je jari irentah-Ku akam. Awi hong bulan te keton haguet bara tanah Misir. Ela kuman rote je inampa hapan ragi katahin pesta uju andau te. Gagenep keton dumah sombayang manyembah Aku, keton musti mimbit parapah.

16 # Lew. 23:15-21, 39-43; Num. 28:26-31 Lalus Pesta Manggetem metoh ikau manampara manggetem hasil tanam je solake. Haga Pesta Tingkap Dawen hong lawin nyelo amon keton mamumpong hasil kabon anggor tuntang kabon kare bua.

17Keleh genep nyelo keton mahaga katatelo pesta te, kakare oloh hatue musti dumah sombayang manyembah Aku, Tuhan Hatallan keton.

18Ela maluput parapah rote je iragi metoh keton maluput meto akang-Ku. Enyak meto je iluput akang-Ku katahin kare pesta te dia tau ilihi sampai hanjewu jewue.

19 # Deu. 26:2; Eks. 34:26; Deu. 14:21 Genep nyelo ikau musti akan human Tuhan, Hatallam, mimbit gandom je solake inggetem awim.

Isin anak tabiri atawa anak kambing dia tau impakasak hapan danum toson indue.”

Janji tuntang parentah

20“Aku kareh manyoho malekat-Ku haguet helo hila baum mangat mangalindong ikau hong jalanan hayak mimbit keton akan eka je inatap-Ku. 21Keleh manantuani tuntang manumon auhe. Ela malawan ie, awi ie sarohang-Ku; ie kareh dia mampun kasalam. 22Amon keton manumon auhe tuntang malalus kare taloh je irentah-Ku, aku kareh hakalahi malawan kare musohm. 23Malekat-Ku kareh helo bara ikau tuntang mimbit ikau akan lewu bangsa Amori, Het, Peris, Kanaan, Hewi tuntang Yebusi, palus ewen kareh impalomos-Ku. 24Ela manyembah hampatong pangalindong ewen tuntang ela manyonto cara ewen sombayang. Musit kare hampatong pangalindong ewen, melek kare tihang batu je hapan ewen sombayang. 25Amon ikau manyembah Aku, Tuhan, Hatallam, ikau kareh imberkat-Ku dengan panginan tuntang taloh ihop, palus kare panyakit kareh ingejau-Ku bara ikau. 26Intu lewum kareh jaton oloh bawi je mangelus atawa tamanang. Ikau kareh inenga-Ku umur je panjang.

27Kare bangsa je inalihm iawi-Ku mikeh dengang-Ku. Ewen iawi-Ku tarewen, urase mundur tuntang hadari. 28Kare musohm kareh ingacau-Ku.#23:28: Ingacau-Ku atawa Aku akan mampadumah kare bajanyi akan kare musohm uka mamepet ewen. Kareh bangsa Hewi, Kanaan tuntang Het iharak-Ku bara taharepm mangat keton tau maju. 29Ewen kareh dia iharak-Ku sinde-sindee bewei hong ije nyelo, mangat petake ela bajikut tuntang meto basiak ela sabak. 30Ewen kareh iharak-Ku misut-misut, sampai kare oloh ayum jari sukop karee akan manguasa petak te. 31Kare helat lewum kareh inukas-Ku bara Telok Akaba sampai Sungei Eprat, tuntang bara Tasik Bentok sampai padang pasir. Ikau inenga-Ku kuasa mahunjun oloh lewu te, sampai ewen tau iharakm metoh keton miar marabut tanah te. 32Ela mawi kapakat dengan oloh te atawa dengan kare dewa ain ewen. 33Ela manalua kare oloh te melai hong lewum, mangat ikau ela manyembah kare dewan ewen tuntang badosa intu Aku. Amon ikau manyembah kare dewan ewen, ikau buah jarat pampatei.”

Currently Selected:

EKSODUS 23: NIJ

Highlight

Copy

Compare